Sat-bó͘-jíⁿ siōng-kòan 第 18 章 - 巴克禮全羅

1

Tāi-pı̍t kap Sò-lô kóng bêng-pe̍k, Iok-ná-tan ê sìⁿ-miā kap Tāi-pı̍t ê sìⁿ-miā siⁿ saⁿ-liân; Iok-ná-tan thiàⁿ i chhin-chhiūⁿ ka-kī ê sìⁿ-miā.

2

Hit-jı̍t Sò-lô lâu i, bô hō͘ i tò-khì lāu-pē ê ke.

3

Iok-ná-tan kap Tāi-pı̍t nn̄g-lâng kiat-iok, in-ūi i thiàⁿ i chhin-chhiūⁿ ka-kī ê sìⁿ-miā.

4

Iok-ná-tan thǹg i sin-khu ê gōa-saⁿ, hō͘ Tāi-pı̍t; koh chiong i ê kun-ho̍k, liân i ê to, i ê keng, i ê io-tòa, iā hō͘ i.

5

Kìⁿ-nā Sò-lô chhe i khì toh-lo̍h, Tāi-pı̍t só͘ khì bô m̄ cheng-thong; Sò-lô chiū siat-lı̍p i chòe chiàn-sū ê thâu-lâng. Chèng peh-sìⁿ kap Sò-lô ê jîn-sîn lóng khòaⁿ-chòe hó.

6

Tāi-pı̍t phah-sí hit ê Hui-lī-sū lâng tò-tńg, in tò-lâi ê sî, hiah ê hū-lú tùi Í-sek-lia̍t ta̍k ê siâⁿ chhut-lâi, chhiùⁿ-koa, thiàu-bú, ēng lin-long-kó͘, ēng hoaⁿ-hí, ēng chok-ga̍k ê khì-kū, lâi ngiâ-chih Sò-lô ông.

7

Hiah ê hū-lú thiàu-bú, ū-ê chhiùⁿ, ū-ê hō, kóng, Sò-lô thâi-sí in chheng-chheng, Tāi-pı̍t thâi-sí in bān-bān.

8

Sò-lô put-chí siū-khì, bô hoaⁿ-hí chit ê ōe, chiū kóng, Chiong bān-bān hō͘ Tāi-pı̍t, chheng-chheng hō͘ góa, chí-ū chhun kok-ūi bē hō͘ i nā-tiāⁿ.

9

Tùi hit-jı̍t khí, Sò-lô khòaⁿ-kìⁿ Tāi-pı̍t chiū gîn i.

10

Keh-jı̍t tùi Siōng-tè hia lâi ê pháiⁿ-sîn tōa-tōa lîm-kàu Sò-lô, i chiū tī chhù-lāi kóng sian-ti ōe. Tāi-pı̍t chiàu-siông ēng chhiú tôaⁿ-khîm, Sò-lô chhiú-nih ū chhiuⁿ.

11

Sò-lô ēng chhiuⁿ cho̍h-khì, in-ūi kóng, Góa beh chhì Tāi-pı̍t, tèng i tī piah-nih. Tāi-pı̍t tī i ê bīn-chêng siám-pī nn̄g-pái.

12

Sò-lô kiaⁿ Tāi-pı̍t, in-ūi Iâ-hô-hoa kap i tī-teh, lī-khui Sò-lô.

13

Sò-lô chiah hō͘ Tāi-pı̍t lī-khui i, siat-lı̍p i chòe chhian-chóng; i tī peh-sìⁿ ê bīn-chêng chhut-jı̍p.

14

Tāi-pı̍t kìⁿ só͘ chòe ê tāi-chì bô m̄ cheng-thong, Iâ-hô-hoa kap i tī-teh.

15

Sò-lô khòaⁿ-kìⁿ Tāi-pı̍t só͘ chòe ê tāi-chì chin cheng-thong, put-chí kiaⁿ i.

16

To̍k-to̍k Í-sek-lia̍t kap Iû-tāi ê chèng lâng lóng thiàⁿ Tāi-pı̍t, in-ūi i tī in bīn-chêng chhut-jı̍p.

17

Sò-lô kā Tāi-pı̍t kóng, Khòaⁿ ah, góa beh ēng tōa cha-bó͘-kiáⁿ Bí-la̍h hō͘ lí chòe-bó͘, to̍k-to̍k ài lí chòe góa ê ióng-sū, thòe Iâ-hô-hoa kau-chiàn. Sò-lô sim-lāi kóng, Góa m̄-thang chhin-chhiú hāi i, tio̍h chioh Hui-lī-sū lâng ê chhiú hāi i.

18

Tāi-pı̍t kā Sò-lô kóng, Góa sī chī-chūi, góa ū sím-mı̍h sin-hūn, góa lāu-pē ê ke tī Í-sek-lia̍t tiong sī sím-mı̍h hō ê ke, góa thang chòe ông ê kiáⁿ-sài mah?

19

Sò-lô ê cha-bó͘-kiáⁿ Bí-la̍h tiāⁿ-tio̍h hō͘ Tāi-pı̍t ê kî kàu lah, kéng-jiân hō͘ Bí-hô-la̍h lâng A-tek-lia̍t chòe-bó͘.

20

Sò-lô ê cha-bó͘-kiáⁿ Bí-kah thiàⁿ Tāi-pı̍t; ū lâng kā Sò-lô kóng; Sò-lô hoaⁿ-hí chit ê sū.

21

Sò-lô sim-lāi kóng, Góa chiong chit ê cha-bó͘-kiáⁿ hō͘ Tāi-pı̍t chòe lô-bāng lâi bāng i; thang chioh Hui-lī-sū lâng ê chhiú hāi i. Sò-lô chiū kā Tāi-pı̍t kóng, Taⁿ chit ê tē-jī pái lí thang chòe góa ê kiáⁿ-sài.

22

Sò-lô hoan-hù jîn-sîn kóng, Lín àm-chīⁿ kā Tāi-pı̍t kóng, Ông hoaⁿ-hí lí, jîn-sîn iā thiàⁿ lí; só͘-í lí thang chòe ông ê kiáⁿ-sài.

23

Sò-lô ê jîn-sîn chiū chiong chiah ê ōe kóng hō͘ Tāi-pı̍t thiaⁿ; Tāi-pı̍t kóng, Lín phah-sǹg chòe ông ê kiáⁿ-sài sī sió-khóa sū mah? góa sī sòng-hiong pi-bî ê lâng.

24

Sò-lô ê jîn-sîn hê-hok, kóng, Tāi-pı̍t só͘ kóng ê, án-ni, án-ni.

25

Sò-lô kóng, Lín tio̍h tùi Tāi-pı̍t án-ni kóng, ông m̄-ài sím-mı̍h phèng-lé, chí-ū beh chı̍t-pah ê Hui-lī-sū lâng iông-bu̍t ê phê, thang pò-siû tī ông ê tùi-te̍k. Sò-lô ê ì-sù beh hō͘ Tāi-pı̍t sí tī Hui-lī-sū lâng ê chhiú.

26

I ê jîn-sîn chiong chiah ê ōe kā Tāi-pı̍t kóng; Tāi-pı̍t hoaⁿ-hí beh chòe ông ê kiáⁿ-sài.

27

Jı̍t-kî iáu-bē kàu, Tāi-pı̍t khí-lâi kap tè i ê lâng, khí-sin khì, thâi-sí nn̄g-pah ê Hui-lī-sū lâng. Tāi-pı̍t tòa hiah ê iông-bu̍t ê phê, in chiū chiàu siàu-gia̍h it-chīn hiàn hō͘ ông, hō͘ i thang chòe ông ê kiáⁿ-sài. Tùi án-ni Sò-lô chiong cha-bó͘-kiáⁿ Bí-kah hō͘ i chòe-bó͘.

28

Sò-lô khòaⁿ-kìⁿ, koh chai Iâ-hô-hoa kap Tāi-pı̍t tī-teh; koh Sò-lô ê cha-bó͘-kiáⁿ Bí-kah iā thiàⁿ i.

29

Sò-lô it-hoat kiaⁿ Tāi-pı̍t; Sò-lô siông-siông chòe Tāi-pı̍t ê tùi-te̍k.

30

Hui-lī-sū hiah ê siú-léng chhut-lâi kau-chiàn; in ta̍k-pái chhut-lâi, Tāi-pı̍t só͘ kiâⁿ pí Sò-lô hiah ê jîn-sîn khah cheng-thong; tùi án-ni i ê miâ hō͘ lâng koh chun-tiōng.