Sat-bó͘-jíⁿ siōng-kòan 第 19 章 - 巴克禮全羅

1

Sò-lô tùi i ê kiáⁿ Iok-ná-tan kap chèng jîn-sîn kóng, Tio̍h thâi-sí Tāi-pı̍t; chóng-sī Sò-lô ê kiáⁿ Iok-ná-tan put-chí hoaⁿ-hí Tāi-pı̍t.

2

Iok-ná-tan kā Tāi-pı̍t kóng, Góa ê lāu-pē Sò-lô siūⁿ beh thâi lí; só͘-í bîn-á-chá-khí lí tio̍h sió-sim, kàu chı̍t-ê phian-phiah ê só͘-chāi, ka-kī bih.

3

Góa beh khì lí só͘ bih ê chhân, khiā tī góa ê lāu-pē sin-piⁿ; góa kap góa ê lāu-pē gī-lūn lí ê sū, góa só͘ khòaⁿ-kìⁿ ê góa beh kā lí kóng.

4

Iok-ná-tan tùi i ê lāu-pē Sò-lô lūn Tāi-pı̍t, thòe i kóng hó-ōe, kóng, Ông m̄-thang tek-chōe lí ê lô͘-po̍k Tāi-pı̍t, in-ūi i bē bat tek-chōe lí; i tùi lí só͘-kiâⁿ-ê, lóng sī hó;

5

in-ūi i bat piàⁿ-miā thâi-sí hit ê Hui-lī-sū lâng, Iâ-hô-hoa ūi Í-sek-lia̍t chèng-lâng tōa kiâⁿ chín-kiù; hit-sî lí khòaⁿ-kìⁿ, put-chí hoaⁿ-hí; taⁿ siáⁿ-sū bô iân-kò͘ beh thâi-sí Tāi-pı̍t, lâu bô-chōe ê lâng ê huih, lâi hōan-chōe ah?

6

Sò-lô thiaⁿ Iok-ná-tan ê ōe; Sò-lô kí Iâ-hô-hoa ê o̍ah lâi chiù-chōa kóng, Góa bô beh hō͘ i sí.

7

Iok-ná-tan kiò Tāi-pı̍t lâi; Iok-ná-tan chiong che it-chhè ê ōe kā i kóng; Iok-ná-tan chhōa Tāi-pı̍t khì kìⁿ Sò-lô; i iû-gôan khiā tī Sò-lô ê bīn-chêng.

8

Í-āu koh ū kau-chiàn; Tāi-pı̍t chhut-khì kap Hui-lī-sū lâng kau-chiàn, tōa-tōa thâi-sí in; in chiū tī i ê bīn-chêng tô-cháu.

9

Sò-lô chē tī chhù-lāi, chhiú kia̍h chhiuⁿ; hit-sî tùi Iâ-hô-hoa hia lâi ê pháiⁿ-sîn koh lîm-kàu i; Tāi-pı̍t ēng chhiú tôaⁿ-khîm.

10

Sò-lô beh ēng chhiuⁿ chhì Tāi-pı̍t, tèng i tī piah-nih; i chiū tùi Sò-lô ê bīn-chêng siám-khui; hit ki chhiuⁿ chha̍k-jı̍p piah. Hit-mî Tāi-pı̍t chiū cháu lâi siám-pī i.

11

Sò-lô chhe lâng kàu Tāi-pı̍t ê chhù siú i, thèng-hāu thiⁿ-kng beh thâi i. Tāi-pı̍t ê bó͘ Bí-kah tùi i kóng, Lí kim-mî nā bô tô-miā, bîn-á-jı̍t lí beh siū-thâi.

12

Bí-kah chiū tùi thang-á tūi Tāi-pı̍t lo̍h-khì; i chiū cháu-khì, lâi siám-pī.

13

Bí-kah ēng ke-lāi ê ngó͘-siōng hē tī bîn-chhn̂g, thâu-khak khòa tī soaⁿ-iûⁿ-mn̂g ê chím-thâu, ēng phē khàm i.

14

Sò-lô chhe lâng khì lia̍h Tāi-pı̍t; Bí-kah kóng, I phòa-pīⁿ.

15

Sò-lô koh chhe lâng khì khòaⁿ Tāi-pı̍t, kóng, Liân bîn-chhn̂g kng-lâi góa chia, góa thang thâi-sí i.

16

Sù-chiá jı̍p-khì, khòaⁿ-kìⁿ chhn̂g-nih ū ngó͘-siōng, thâu-khak khòa tī soaⁿ-iûⁿ-mn̂g ê chím-thâu.

17

Sò-lô tùi Bí-kah kóng, Lí siáⁿ-sū án-ni phiàn góa, pàng góa ê tùi-te̍k tô-cháu ah? Bí-kah ìn kóng, I kā góa kóng, Lí pàng góa khì, góa kiám tio̍h thâi-sí lí mah?

18

Tāi-pı̍t cháu-khì, tô-siám kàu La̍h-má, kìⁿ Sat-bó͘-jíⁿ, chiong Sò-lô tùi i só͘ kiâⁿ ê sū, lóng-chóng kā i kóng. I kap Sat-bó͘-jíⁿ chiū khì Ná-iok khiā-khí.

19

Ū lâng kā Sò-lô kóng, Khòaⁿ ah, Tāi-pı̍t tī La̍h-má ê Ná-iok.

20

Sò-lô chhe sù-chiá khì lia̍h Tāi-pı̍t; in khòaⁿ-kìⁿ chı̍t tīn sian-ti teh kóng sian-ti ōe, koh Sat-bó͘-jíⁿ khiā tī in tiong-kan kam(**kàm)-tok in, Siōng-tè ê Sîn lîm-kàu Sò-lô ê sù-chiá, in iā kóng sian-ti ōe.

21

Ū lâng chiong chit ê sū kā Sò-lô kóng; i chiū chhe pa̍t ê sù-chiá khì; in iā kóng sian-ti ōe. Sò-lô tē-saⁿ pái chhe sù-chiá khì, in iā kóng sian-ti ōe.

22

Āu-lâi i pún-sin iā khì La̍h-má; kàu Se-ko͘ ê tōa-chíⁿ hia, mn̄g lâng kóng, Sat-bó͘-jíⁿ kap Tāi-pı̍t tī toh-lo̍h? Ū lâng kā i kóng, Khòaⁿ ah, tī La̍h-má ê Ná-iok.

23

I chiū khì La̍h-má ê Ná-iok; Siōng-tè ê Sîn iā lîm-kàu i; i ná-kiâⁿ ná-kóng sian-ti ōe, tı̍t-kàu La̍h-má ê Ná-iok.

24

I chiū thǹg-saⁿ, tī Sat-bó͘-jíⁿ ê bīn-chêng kóng sian-ti ōe; thong-jı̍t thong-mî thǹg-theh tó-teh; tùi án-ni lâng teh kóng, Sò-lô iā lia̍t tī sian-ti tiong mah?