Sat-bó͘-jíⁿ siōng-kòan 第 20 章 - 巴克禮全羅

1

Tāi-pı̍t tùi La̍h-má ê Ná-iok tô-cháu, kàu Iok-ná-tan ê bīn-chêng, kóng, Góa chòe sím-mı̍h? góa ū sím-mı̍h pháiⁿ? tī lí ê lāu-pē ê bīn-chêng ū sím-mı̍h chōe, i kéng-jiân teh siàu-siūⁿ góa ê sìⁿ-miā mah?

2

Iok-ná-tan kā i kóng, Koat-tòan m̄-sī, lí bōe kàu sí; góa ê lāu-pē chòe tāi-chì, bô-lūn tōa-sòe, bô chı̍t-hāng bô hō͘ góa chai; góa ê lāu-pē kiám kan-ta ún-môa góa chit hāng sū mah? koat-tòan bô án-ni.

3

Tāi-pı̍t koh chiù-chōa kóng, Lí ê lāu-pē chún-chún chai góa tī lí ê bīn-chêng tit-tio̍h un-tián; i ê sim kóng, M̄-thang hō͘ Iok-ná-tan chai, kiaⁿ-liáu i ōe iu-būn; góa kí Iâ-hô-hoa ê éng-o̍ah kap lí ê o̍ah-miā lâi chiù-chōa, góa lī-khui sí chí-ū chı̍t-pō͘ nā-tiāⁿ.

4

Iok-ná-tan kā Tāi-pı̍t kóng, Lí ê sim só͘ ài, góa beh kā lí chòe.

5

Tāi-pı̍t kā Iok-ná-tan kóng, Bîn-á-jı̍t sī chhoe-it, góa eng-kai tio̍h kap ông chē-toh; kiû lí iông-ún góa khì bih tī chhân-nih, kàu tē-saⁿ jı̍t ê-hng.

6

Lí ê lāu-pē nā khòaⁿ góa bô tī-teh, lí chiū kóng, Tāi-pı̍t chhiat-chhiat kiû góa chún i tò-khì pún-siâⁿ Pek-lī-hêng, in-ūi i thong-ke tī-hia hiàn nî-chè.

7

I nā kóng, Hó lah, chiū lí ê lô͘-po̍k ū pêng-an; i nā hoat siū-khì, chiū chai i koat-ì beh hāi góa.

8

Taⁿ lí tio̍h si-un hō͘ lí ê lô͘-po̍k; in-ūi lí chêng ū hō͘ lí ê lô͘-po̍k kap lí kí Iâ-hô-hoa lâi kiat-iok; góa nā ū chōe, chhiáⁿ lí pún-sin thâi góa; siáⁿ-sū tòa góa kàu lí ê lāu-pē hia?

9

Iok-ná-tan kóng, Koat-tòan bô tùi lí án-ni kiâⁿ; in-ūi góa nā chin chai góa ê lāu-pē koat-ì beh hāi lí, góa kiám bô kā lí kóng mah?

10

Tāi-pı̍t kā Iok-ná-tan kóng, Lí ê lāu-pē nā ēng pháiⁿ siaⁿ-sàu ìn lí, chī-chūi beh lâi kā góa kóng ah?

11

Iok-ná-tan kā Tāi-pı̍t kóng, Lâi lah, lán chhut-lâi khì chhân-nih; nn̄g-lâng chiū chhut-khì chhân-nih.

12

Iok-ná-tan kā Tāi-pı̍t kóng, Gōan Iâ-hô-hoa Í-sek-lia̍t ê Siōng-tè chòe kan-chèng, bîn-á-jı̍t chit-sî, á-sī tē-saⁿ jı̍t, góa thàm-khòaⁿ góa ê lāu-pē, nā ū hó ì-sù ǹg Tāi-pı̍t, góa kiám bô chhe lâng kā lí kóng mah?

13

Góa ê lāu-pē nā ū ì-sù hāi lí, góa beh kā lí kóng, hō͘ lí pêng-an khì; nā-bô, gōan Iâ-hô-hoa ka-pē chek-ho̍at Iok-ná-tan; gōan Iâ-hô-hoa kap lí tī-teh, chhin-chhiūⁿ I bat kap góa ê lāu-pē tī-teh chı̍t-iūⁿ.

14

M̄-nā góa o̍ah-teh ê sî, lí tio̍h tùi góa hián-bêng Iâ-hô-hoa ê chû-ài, bián-tit góa sí-bô;

15

chiū Iâ-hô-hoa tùi tōe-chiūⁿ it-chīn chián-tû Tāi-pı̍t ê tùi-te̍k ê sî, lí iā éng-óan m̄-thang tùi góa ê ke cho̍at-tn̄g lí ê un-hūi.

16

Iok-ná-tan chiū kap Tāi-pı̍t ê ke kiat-iok, kóng, Gōan Iâ-hô-hoa tùi Tāi-pı̍t chiah ê tùi-te̍k ê chhiú lâi thó i.

17

Iok-ná-tan in-ūi thiàⁿ Tāi-pı̍t, chiū kah i koh chiù-chōa; in-ūi i thiàⁿ i chhin-chhiūⁿ thiàⁿ ka-kī ê sìⁿ-miā.

18

Iok-ná-tan kā i kóng, Bîn-á-jı̍t sī ge̍h ê chhoe-it, lí ê ūi pàng-khang, beh kóng lí bô tī-teh.

19

Tán kàu saⁿ-jı̍t, lí tio̍h kín-kín lo̍h-khì kàu lí chêng tú-tio̍h tāi-chì só͘ bih ê só͘-chāi, tī Í-sek ê chio̍h-pôaⁿ hia thèng-hāu;

20

góa beh siā saⁿ ki chìⁿ tī chio̍h-pôaⁿ piⁿ, ná chhin-chhiūⁿ khó-pé chı̍t-iūⁿ;

21

góa beh chhe chı̍t ê gín-ná, kóng, Lí khì chhē hiah ê chìⁿ; góa nā kā gín-ná kóng, Khòaⁿ ah, chìⁿ tī lí chit-pêng, tio̍h khioh i; lí chiū thang tò-lâi; góa kí o̍ah ê Iâ-hô-hoa lâi chiù-chōa, lí ū pêng-an bô hāi.

22

Góa nā kā gín-ná kóng, Khòaⁿ ah, chìⁿ tī lí hit-pêng, lí chiū tio̍h khì; in-ūi sī Iâ-hô-hoa chhe lí khì.

23

Lūn-kàu lí góa kin-á-jı̍t só͘-kóng-ê, ū Iâ-hô-hoa tī lí góa ê tiong-kan, tı̍t-kàu éng-óan.

24

Tāi-pı̍t chiū khì bih tī chhân-nih; kàu chhoe-it jı̍t, ông chē-toh tit-beh chia̍h.

25

Ông chiàu-siông chē i ê ūi, chiū-sī óa tī piah-nih ê ūi; Iok-ná-tan teh khiā; Ap-nî-jíⁿ chē tī Sò-lô ê sin-piⁿ; Tāi-pı̍t ê ūi pàng-khang.

26

Chóng-sī chit-jı̍t Sò-lô bô kóng sím-mı̍h; i phah-sǹg Tāi-pı̍t tú-tio̍h tāi-chì, bô chheng-khì, i tek-khak sī bô chheng-khì.

27

Keh-jı̍t, chiū-sī hit ge̍h ê chhoe-jī, Tāi-pı̍t ê ūi iû-gôan pàng-khang; Sò-lô mn̄g i ê kiáⁿ Iok-ná-tan kóng, Iâ-se ê kiáⁿ cháiⁿ-iūⁿ chā-á-jı̍t kin-á-jı̍t bô lâi chia̍h?

28

Iok-ná-tan ìn Sò-lô kóng, Tāi-pı̍t chhiat-chhiat kiû góa chún i khì Pek-lī-hêng;

29

i kóng, Kiû lí chún góa khì, in-ūi góan tau tī siâⁿ-lāi ū chè-sū, góa ê hiaⁿ hoan-hù góa khì; taⁿ góa nā tī lí ê ba̍k-chiu-chêng tit-tio̍h un-tián, kiû lí chún khì kìⁿ góa hiah ê hiaⁿ; só͘-í i bô lâi kap ông chē-toh.

30

Sò-lô tùi Iok-ná-tan hoat siū-khì, kā i kóng, Lí chit ê ngī-sim pōe-ge̍k ê hū-jîn-lâng ê kiáⁿ góa kiám m̄-chai lí kéng Iâ-se ê kiáⁿ ka-kī chhú lêng-jio̍k, tì-kàu lí ê lāu-bú tú-tio̍h thǹg-theh ê lêng-jio̍k mah?

31

In-ūi Iâ-se ê kiáⁿ o̍ah tī tōe-chiūⁿ ê sî, lí kap lí ê kok tek-khak bōe kian-kò͘; taⁿ tio̍h chhe lâng khì lia̍h i kàu góa chia, i tek-khak tio̍h sí.

32

Iok-ná-tan ìn i ê lāu-pē Sò-lô, tùi i kóng, I siáⁿ-sū tio̍h sí ah? i ū chòe sím-mı̍h ah?

33

Sò-lô cho̍h hit ki chhiuⁿ, beh chha̍k Iok-ná-tan; Iok-ná-tan chiū chai i ê lāu-pē koat-ì beh thâi Tāi-pı̍t.

34

Tùi án-ni Iok-ná-tan chin siū-khì, chiū tùi toh-nih khí-lâi, tī chí chhoe-jī jı̍t bô chia̍h sím-mı̍h; i in-ūi Tāi-pı̍t hôan-ló, sī in-ūi i ê lāu-pē lêng-jio̍k i.

35

Keh chá-khí, Iok-ná-tan chiàu i kap Tāi-pı̍t só͘ iok ê sî, chhut-khì kàu chhân-nih; ū chı̍t ê gín-ná kap i khì.

36

Kā gín-ná kóng, Lí cháu-khì chhē góa só͘ siā ê chìⁿ; gín-ná cháu-khì; i chiū siā chı̍t ki chìⁿ tī i ê thâu-chêng.

37

Gín-ná kàu Iok-ná-tan chìⁿ siā kàu ê só͘-chāi, Iok-ná-tan tī gín-ná ê āu-bīn kiò kóng, Chìⁿ kiám m̄-sī tī lí ê thâu-chêng mah?

38

Iok-ná-tan koh kiò gín-ná kóng, Kóaⁿ-kín o͘h, kín-kín khì, m̄-thang iân-chhiân. Iok-ná-tan ê gín-ná chiū khioh hiah ê chìⁿ, tò-tńg lâi i ê chú-lâng hia.

39

Chóng-sī gín-ná m̄-chai che sī sím-mı̍h ì-sù, chí-ū Iok-ná-tan kap Tāi-pı̍t chai chit ê tāi-chì.

40

Iok-ná-tan chiong khì-hâi kau-tài gín-ná, hoan-hù kóng, Lí the̍h tò-khì siâⁿ-lāi.

41

Gín-ná khì liáu-āu, Tāi-pı̍t chiū tùi lâm-sì chı̍t só͘-chāi chhut-lâi, phak tī tōe-nih, pài saⁿ-pài, nn̄g-lâng saⁿ-chim, saⁿ-kap thî-khàu, Tāi-pı̍t koh khah kàu-ke̍k.

42

Iok-ná-tan kā Tāi-pı̍t kóng, Lí taⁿ pêng-an khì; lán nn̄g-lâng í-keng kí Iâ-hô-hoa ê miâ chiù-chōa kóng, Gōan Iâ-hô-hoa tī lí góa ê tiong-kan koh tī lí ê hō͘-è kap góa ê hō͘-è ê tiong-kan, tı̍t-kàu éng-óan. I chiū khí-lâi khì; Iok-ná-tan iā tò-khì siâⁿ-lāi.