Sat-bó͘-jíⁿ siōng-kòan 第 21 章 - 巴克禮全羅

1

Tāi-pı̍t kàu Lô-pek, kàu chè-si A-hi-bí-le̍k hia. A-hi-bí-le̍k kiaⁿ-hiâⁿ lâi chih Tāi-pı̍t, tùi i kóng, Lí siáⁿ-sū ka-kī lâi, bô lâng kap lí lâi ah?

2

Tāi-pı̍t ìn chè-si A-hi-bí-le̍k kóng, Ông bēng-lēng góa chı̍t kiāⁿ sū, koh kā góa kóng, Góa só͘ chhe lí ê sū, kap góa só͘ bēng-lēng lí ê, lóng m̄-thang hō͘ lâng chai; góa í-keng phài siàu-liân lâng tī bó͘ só͘-chāi thèng-hāu góa;

3

taⁿ lí ê chhiú ū sím-mı̍h mı̍h, chhiáⁿ lí ēng gō͘ ê piáⁿ hō͘ góa, á-sī pa̍t-hāng.

4

Chè-si tùi Tāi-pı̍t kóng, Góa ê chhiú-nih bô pêng-siông ê piáⁿ, chí-ū sèng ê piáⁿ; nā siàu-liân lâng bô chhin-kūn hū-jîn-lâng, chiah thang.

5

Tāi-pı̍t ìn chè-si kā i kóng, Kàu-taⁿ iok-lio̍k ū saⁿ-jı̍t, bē-bat chhin-kūn hū-jîn-lâng; góa chhut-mn̂g ê sî, sui-jiân sī pêng-siông ê tāi-chì, siàu-liân lâng ê khì-kū sī chheng-khì; hô-hòng kin-á-jı̍t in ê khì-kū kiám bô sèng mah?

6

Chè-si chiū the̍h sèng ê piáⁿ hō͘ i, in-ūi tī-hia bô pa̍t-mı̍h ê piáⁿ, chí-ū pâi-lia̍t ê piáⁿ, tùi Iâ-hô-hoa ê bīn-chêng the̍h-khí-lâi ê; the̍h-khí-lâi hit-jı̍t, sī beh hē sio ê piáⁿ lâi pâi i.

7

Tng hit-jı̍t tī-hia, ū Sò-lô ê lô͘-po̍k lâu tī Iâ-hô-hoa ê bīn-chêng, miâ kiò To-ek, sī Í-tong lâng, chòe Sò-lô kò͘ cheng-siⁿ-ê ê thâu-lâng.

8

Tāi-pı̍t mn̄g A-hi-bí-le̍k kóng, Lí chhiú-ē ū chhiuⁿ á-sī to á-bô? in-ūi ông ê tāi-chì chin kín-kip, góa lóng bô tòa to kap khì-hâi.

9

Chè-si kóng, Ū Hui-lī-sū lâng Ko-lī-à ê to, chiū-sī lí chêng tī Í-la̍h ê soaⁿ-kok só͘ thâi-sí-ê, tī-chia, pau tī pò͘-nih, tī í-hut-tek ê āu-bīn; lí nā beh ēng, chiū kia̍h-khì, in-ūi hit-ki í-gōa bô pa̍t-hāng. Tāi-pı̍t kóng, Chit ki to bô chı̍t-ki ōe pí tit i, chhiáⁿ lí hō͘ góa.

10

Hit-jı̍t Tāi-pı̍t khí-sin, siám-pī Sò-lô, cháu kàu Ka-te̍k ông A-kiat hia.

11

A-kiat hiah ê jîn-sîn kā i kóng, Chit-ê kiám m̄-sī hit-kok ê ông Tāi-pı̍t mah? in tī thiàu-bú-tiong chhiùⁿ-hō kóng, Sò-lô thâi-sí in ê chheng-chheng, Tāi-pı̍t thâi-sí in ê bān-bān,kiám m̄-sī chí chit-lâng mah?

12

Tāi-pı̍t chiong chiah ê ōe chûn tī sim-lāi, chin kiaⁿ Ka-te̍k ông A-kiat;

13

chiū tī chèng-lâng ê bīn-chêng, kóe-ōaⁿ kú-tōng; tī in ê chhiú-ē ké tian-kông, tī siâⁿ-mn̂g ê mn̂g-sìⁿ lōan-siá lōan-u̍ih, hō͘ nōa lâu tī chhùi-chhiu-nih.

14

A-kiat kā i ê jîn-sîn kóng, Lín khòaⁿ, chit ê lâng sī tian-kông siáⁿ-sū tòa i lâi góa chia ah?

15

Góa kiám ū khiàm-ēng tian-kông ê, lín chiah chhōa chit-lâng lâi tian-kông tī góa ê bīn-chêng ah? chit-lâng kiám thang jı̍p góa ê chhù mah?