Sat-bó͘-jíⁿ siōng-kòan 第 22 章 - 巴克禮全羅

1

Tāi-pı̍t chiū lī-khui hia, cháu kàu A-tō͘-lân ê tōng; i ê hiaⁿ-tī kap i ê lāu-pē chôan-ke thiaⁿ-kìⁿ, chiū lóng lo̍h-khì kàu i hia.

2

Kìⁿ-nā khún-pek-ê, khiàm-chè-ê, sim-lāi ut-chut-ê, lóng chū-chı̍p kàu i hia; Tāi-pı̍t chiū chòe in ê thâu; óa i ê iok-lio̍k ū sì-pah lâng.

3

Tāi-pı̍t tùi hia khì Mô͘-ap ê Bí-su-pa, kā Mô͘-ap ông kóng, Kiû lí iông-ún góa ê lāu-pē, góa ê lāu-bú chhut-lâi, tiàm lín chia khiā, thèng-hāu góa chai Siōng-tè beh kā góa cháiⁿ-iūⁿ kiâⁿ.

4

I chhōa in kàu Mô͘-ap ông ê bīn-chêng. Tāi-pı̍t tiàm tī soaⁿ-chē ê sî-chūn, i ê pē-bú iā tiàm tī Mô͘-ap ông hia.

5

Sian-ti Ka-tek kā Tāi-pı̍t kóng, Lí m̄-thang tiàm tī ōe-só͘, tio̍h khì Iû-tāi tōe. Tāi-pı̍t chiū lī-khui hia, khì kàu Hap-lia̍t ê chhiū-nâ.

6

Sò-lô tī Ki-pí-a ê La̍h-má, chē tī sûi-si-liú ê chhiū-kha, chhiú-nih kia̍h chhiuⁿ, chèng jîn-sîn ûi-lûi tī i ê chó-iū. Sò-lô thiaⁿ-kìⁿ kóng, Tāi-pı̍t kap tè ê lâng hō͘ lâng tú-tio̍h.

7

Sò-lô chiū kā ûi i ê jîn-sîn kóng, Piān-ngá-bín lâng ah, lín tio̍h thiaⁿ; Iâ-se ê kiáⁿ ōe ēng chhân kap phû-tô-hn̂g hō͘ lín ta̍k-lâng mah? ōe siat-lı̍p lín ta̍k-lâng chòe chhian-chóng, peh-chóng mah?

8

Lín kéng-jiân saⁿ-kap kè-bô͘ kong-kek góa; góa ê kiáⁿ bat kap Iâ-se ê kiáⁿ kiat-iok, bô lâng pò góa chai; lín tiong-kan bô chı̍t-lâng khó-lîn góa; góa ê kiáⁿ kàu-so góa ê jîn-sîn kong-kek góa, tng-tán góa, chhin-chhiūⁿ kin-á-jı̍t ê khóan, lín lóng bô pò góa chai.

9

Hit-sî Í-tong lâng To-ek khiā tī Sò-lô jîn-sîn ê tiong-kan, kā i kóng, Góa bat khòaⁿ-kìⁿ Iâ-se ê kiáⁿ kàu Lô-pek, kàu A-hi-tu̍t ê kiáⁿ A-hi-bí-le̍k hia.

10

A-hi-bí-le̍k thòe i mn̄g Iâ-hô-hoa, koh hō͘ i chia̍h-mı̍h, iā ēng Hui-lī-sū lâng Ko-lī-à ê to hō͘ i.

11

Ông chiū chhe lâng tiàu A-hi-tu̍t ê kiáⁿ, chè-si A-hi-bí-le̍k, kap i lāu-pē chôan-ke, chiū-sī tiàm tī Lô-pek hiah ê chè-si; in chiū lóng lâi ông hia.

12

Sò-lô kóng, A-hi-tu̍t ê kiáⁿ ah, tio̍h thiaⁿ. I ìn kóng, Góa ê chú ah, góa tī-chia.

13

Sò-lô kā i kóng, Lín siáⁿ-sū kap Iâ-se ê kiáⁿ kè-bô͘ kong-kek góa, lí kéng-jiân ēng piáⁿ kap to hō͘ i; koh thòe i mn̄g Siōng-tè, hō͘ i khí-lâi kong-kek góa, tng-tán góa, chhin-chhiūⁿ kin-á-jı̍t ê khóan?

14

A-hi-bí-le̍k ìn ông kóng, Lí ê jîn-sîn tiong, chī-chūi ōe pí-tit Tāi-pı̍t ê chīn-tiong ah? i sī ông ê kiáⁿ-sài, koh chòe lí ê chham-bô͘, iā tī lí ê ke-tiong sī chun-kùi ê;

15

góa kiám-sī tùi kin-á-jı̍t chiah thòe i mn̄g Siōng-tè mah? Góa koat-tòan bô hit-hō ì-sù; ông bo̍h-tit ēng sím-mı̍h kui tī lô͘-po̍k kap góa ê lāu-pē chôan-ke; in-ūi chiah-ê it-chhè ê sū, bô-lūn tōa-sòe, lí ê lô͘-po̍k lóng m̄-chai.

16

Ông kóng, A-hi-bí-le̍k ah, lí kap lí ê lāu-pē chôan-ke lóng tek-khak tio̍h sí.

17

Ông bēng-lēng chó-iū ê sī-ōe kóng, Lín o̍at-tńg khì thâi Iâ-hô-hoa ê chè-si; in-ūi in iā pang-chān Tāi-pı̍t, koh in-ūi in chai Tāi-pı̍t tô-cháu, kéng-jiân bô pò góa chai. Chóng-sī ông ê jîn-sîn m̄-khéng chhun-chhiú phah-sí Iâ-hô-hoa ê chè-si.

18

Ông kā To-ek kóng, Lí o̍at-tńg khì phah hiah ê chè-si. Í-tong lâng To-ek chiū o̍at-tńg khì phah chè-si; hit-jı̍t thâi-sí chhēng iù-tōe-pò͘ ê í-hut-tek poeh-cha̍p-gō͘ lâng.

19

Koh ēng to phah chè-si ê siâⁿ Lô-pek kî-tiong ê lâm-lú, gín-ná, chia̍h-lin ê eⁿ-á, kap gû, lû, iûⁿ, lóng ēng to thâi-sí.

20

A-hi-tu̍t ê kiáⁿ, A-hi-bí-le̍k ū chı̍t ê kiáⁿ, miâ kiò A-pí-a-tha, thoat-lī cháu-khì tè Tāi-pı̍t.

21

A-pí-a-tha kā Tāi-pı̍t kóng, Sò-lô ū thâi-sí Iâ-hô-hoa ê chè-si.

22

Tāi-pı̍t kā A-pí-a-tha kóng, Hit-jı̍t Í-tong lâng To-ek tī-hia, góa chai i tek-khak ōe kā Sò-lô kóng; lí ê lāu-pē chôan-ke sit-lo̍h sìⁿ-miā, lóng sī in-ūi góa ê iân-kò͘.

23

Lí tio̍h kap góa tòa, m̄-bián kiaⁿ; in-ūi siàu-siūⁿ góa ê sìⁿ-miā-ê chiū-sī siàu-siūⁿ lí ê sìⁿ-miā; lí kap góa tòa, ōe tit-tio̍h pó-chôan.