Sat-bó͘-jíⁿ siōng-kòan 第 23 章 - 巴克禮全羅

1

Ū lâng pò Tāi-pı̍t kóng, Khòaⁿ ah, Hui-lī-sū lâng phah Ki-i-la̍h, chhiúⁿ gō͘-kak-tiûⁿ.

2

Tāi-pı̍t chiū mn̄g Iâ-hô-hoa kóng, Góa thang khì phah hiah ê Hui-lī-sū lâng á m̄-thang? Iâ-hô-hoa kā Tāi-pı̍t kóng, Lí thang khì phah Hui-lī-sū lâng, kiù Ki-i-la̍h.

3

Tè Tāi-pı̍t ê lâng kā i kóng, Lán tī Iû-tāi tōe chia siōng-chhiáⁿ kiaⁿ-hiâⁿ, hô-hòng khì Ki-i-la̍h phah Hui-lī-sū lâng ê kun-tūi ah?

4

Tāi-pı̍t koh mn̄g Iâ-hô-hoa; Iâ-hô-hoa ìn kóng, Lí khí-lâi, lo̍h-khì Ki-i-la̍h, in-ūi Góa beh ēng Hui-lī-sū lâng kau tī lí ê chhiú.

5

Tāi-pı̍t kap tè i ê lâng khì Ki-i-la̍h, kap Hui-lī-sū lâng kau-chiàn; chhiúⁿ in ê cheng-siⁿ, thâi-sí in chōe-chōe lâng; án-ni Tāi-pı̍t kiù Ki-i-la̍h khiā-khí ê peh-sìⁿ.

6

A-hi-bí-le̍k ê kiáⁿ A-pí-a-tha cháu-khì kàu Ki-i-la̍h kìⁿ Tāi-pı̍t ê sî, chhiú-nih tòa í-hut-tek lo̍h-khì.

7

Ū lâng kā Sò-lô kóng, Tāi-pı̍t kàu Ki-i-la̍h; Sò-lô kóng, Siōng-tè chiong i kau tī góa ê chhiú, in-ūi i jı̍p ū mn̂g ū chhòaⁿ ê siâⁿ, koaiⁿ-tiâu tī hit lāi-bīn.

8

Sò-lô chiū chio-chı̍p chèng peh-sìⁿ beh khì kau-chiàn, lo̍h-khì Ki-i-la̍h, ûi-khùn Tāi-pı̍t kap tè i ê lâng.

9

Tāi-pı̍t chai Sò-lô siat kè-bô͘ beh hāi i, chiū kā A-pí-a-tha kóng, Lí tòa í-hut-tek lâi.

10

Tāi-pı̍t kóng, Iâ-hô-hoa Í-sek-lia̍t ê Siōng-tè ah, Lí ê lô͘-po̍k khak-sı̍t thiaⁿ-kìⁿ Sò-lô ài-beh lâi Ki-i-la̍h, beh ūi-tio̍h góa ê iân-kò͘ bia̍t chit ê siâⁿ;

11

Ki-i-la̍h lâng beh chiong góa kau tī i ê chhiú á-bô? Sò-lô beh chiàu Lí ê lô͘-po̍k só͘ thiaⁿ-kìⁿ-ê lo̍h-lâi á-bô? Iâ-hô-hoa Í-sek-lia̍t ê Siōng-tè ah, kiû Lí chí-sī Lí ê lô͘-po̍k. Iâ-hô-hoa kóng, Sò-lô beh lo̍h-lâi.

12

Tāi-pı̍t koh kóng, Ki-i-la̍h lâng beh chiong góa kap tè góa ê lâng kau tī Sò-lô ê chhiú mah? Iâ-hô-hoa kóng, In beh chiong lí kau hō͘ i.

13

Tāi-pı̍t kap tè i ê lâng, iok-lio̍k la̍k-pah, chiū khí-sin chhut Ki-i-la̍h, khì in só͘ khì ê só͘-chāi. Ū lâng kā Sò-lô kóng, Tāi-pı̍t í-keng tùi Ki-i-la̍h tô-cháu; Sò-lô chiū bô chhut-khì.

14

Tāi-pı̍t tiàm tī khòng-iá ê ōe-só͘, siông-siông tī Se-hut khòng-iá ê soaⁿ-tōe. Sò-lô ta̍k-jı̍t chhē i; chóng-sī Siōng-tè bô chiong Tāi-pı̍t kau tī i ê chhiú.

15

Tāi-pı̍t chai Sò-lô í-keng chhut-lâi teh siàu-siūⁿ i ê sìⁿ-miā, hit-sî Tāi-pı̍t tī Se-hut ê khòng-iá, tiàm tī chhiū-nâ-lāi.

16

Sò-lô ê kiáⁿ Iok-ná-tan khí-sin, khì hit ê chhiū-nâ-lāi kìⁿ Tāi-pı̍t, hō͘ i khò Siōng-tè lâi kian-kò͘.

17

Chiū kā i kóng, M̄-bián kiaⁿ, góa ê pē Sò-lô ê chhiú chhē lí bōe tio̍h; lí beh chòe Í-sek-lia̍t ông, góa beh chòe lí ê tē-jī; chit ê sū góa ê pē Sò-lô í-keng chai;

18

tùi án-ni nn̄g-lâng tī Iâ-hô-hoa ê bīn-chêng kiat-iok. Tāi-pı̍t tiàm chhiū-nâ, Iok-ná-tan tò-khì i ê chhù.

19

Se-hut lâng chiūⁿ-khì Ki-pí-a kìⁿ Sò-lô kóng, Tāi-pı̍t kiám m̄-sī tiàm tī góan hia, bih tī chhiū-nâ-lāi ê ōe-só͘, tī Iâ-sī-bûn lâm-pêng ê Hap-ki-la̍h soaⁿ mah?

20

Ông ah, chhiáⁿ lí chiàu lí ê sim só͘ ài lo̍h-khì-ê, lo̍h-khì; chiong i kau tī ông ê chhiú sī góan ê tāi.

21

Sò-lô kóng, Gōan Iâ-hô-hoa sù-hok lín, in-ūi lín khó-lîn góa.

22

Chhiáⁿ lín tò-khì, koh tāi-seng pī-pān, siông-sè chai, thàm-khòaⁿ i kiâⁿ-ta̍h ê só͘-chāi; sím-mı̍h lâng khòaⁿ-kìⁿ i tī-hia; in-ūi ū lâng kā góa kóng, i chin káu-kòai.

23

Só͘-í lín tio̍h chhâ-khòaⁿ chai i it-chhè ka-kī bih-ba̍t ê só͘-chāi, tò-tńg lâi ēng sı̍t-chêng kā góa kóng; góa chiū beh kap lín khì; i nā tī chit ê kéng-lāi, góa beh tī Iû-tāi ê chèng hiuⁿ-siā kā i chhiau-chhut-lâi.

24

In chiū khí-sin, tāi-seng Sò-lô khì Se-hut. Tāi-pı̍t kap tè i ê lâng tiàm tī Má-hûn ê khòng-iá, tī Iâ-sī-bûn lâm-sì ê A-la̍h-pa.

25

Sò-lô kap tè i ê lâng khì chhē i; ū lâng kā Tāi-pı̍t kóng, i chiū lo̍h-khì kàu chio̍h-pôaⁿ, tiàm tī Má-hûn ê khòng-iá. Sò-lô thiaⁿ-kìⁿ, chiū tī Má-hûn ê khòng-iá tui-jip Tāi-pı̍t.

26

Sò-lô kiâⁿ tī soaⁿ ê chit-pêng, Tāi-pı̍t kap tè i ê lâng kiâⁿ tī soaⁿ ê hit-pêng; Tāi-pı̍t kín-kip kiâⁿ, siám-pī tī Sò-lô ê bīn-chêng; in-ūi Sò-lô kap tè i ê lâng, sì-bīn ûi Tāi-pı̍t kap tè i ê lâng, beh lia̍h in.

27

Ū sù-chiá kàu lâi pò Sò-lô kóng, Lí tio̍h kín-kín tò-lâi, in-ūi Hui-lī-sū lâng chhim-hōan kéng-kài.

28

Tùi án-ni Sò-lô bô jip Tāi-pı̍t, tò-khì tí-te̍k Hui-lī-sū lâng; in-ūi án-ni, hit ê só͘-chāi miâ-kiò Se-la̍h-hap-má-hi-lô-kiat.

29

Tāi-pı̍t tùi hia chiūⁿ-khì; tiàm tī Ún-ki-tí ê ōe-só͘.