Sat-bó͘-jíⁿ siōng-kòan 第 24 章 - 巴克禮全羅

1

Sò-lô tui-jip Hui-lī-sū lâng tò-lâi ê sî, ū lâng kā i kóng, Khòaⁿ ah, Tāi-pı̍t tiàm tī Ún-ki-tí ê khòng-iá.

2

Sò-lô chiū tùi Í-sek-lia̍t tiong chhōa kéng-sóan ê peng saⁿ-chheng, khì chhē Tāi-pı̍t, kap tè i ê lâng, khì iá-soaⁿ-iûⁿ ê chio̍h-pôaⁿ;

3

kàu lō͘-piⁿ ê iûⁿ-tiâu, tī-hia ū tōng, Sò-lô jı̍p-khì beh tāi-piān. Tāi-pı̍t kap tè i ê lâng bih tī tōng-lāi khah chhim ê só͘-chāi.

4

Kun-tè Tāi-pı̍t ê lâng kā i kóng, Iâ-hô-hoa bat kā lí kóng, Góa beh chiong lí ê tùi-te̍k kau tī lí ê chhiú, chiàu lí só͘ khòaⁿ-chòe hó-ê khóan-thāi i; khòaⁿ ah, hit ê jı̍t kàu lah. Tāi-pı̍t chiū khí-lâi, àm-chīⁿ koah Sò-lô gōa-ho̍k ê saⁿ-á-ku.

5

Āu-lâi Tāi-pı̍t sim-lāi ka-kī chek-pī; in-ūi koah Sò-lô ê saⁿ-á-ku.

6

Tùi tè i ê lâng kóng, Gōan Iâ-hô-hoa kìm-chí góa, tùi góa ê chú Iâ-hô-hoa só͘ boah-iû-ê kiâⁿ chit ê sū, khí-chhiú lâi kong-kek i, in-ūi i sī Iâ-hô-hoa só͘ boah-iû-ê.

7

Tāi-pı̍t ēng chiah ê ōe chó͘-chí tè i ê lâng , m̄-chún in khí-lâi kong-kek Sò-lô. Sò-lô khí-lâi, tùi tōng-lāi chhut-khì kiâⁿ i ê lō͘.

8

Āu-lâi Tāi-pı̍t iā khí-lâi, tùi tōng-lāi chhut-khì, tī Sò-lô ê āu-bīn kiò kóng, Góa ê chú, góa ê ông. Sò-lô o̍at-thâu khòaⁿ; Tāi-pı̍t chiū khut-sin phak tī tōe-nih pài.

9

Tāi-pı̍t tùi Sò-lô kóng, Lí siáⁿ-sū thiaⁿ lâng ê ōe, kóng, Tāi-pı̍t siūⁿ beh hāi lí ah?

10

Kin-á-jı̍t lí chhin-ba̍k khòaⁿ-kìⁿ, kin-á-jı̍t lí tī tōng-lāi, Iâ-hô-hoa chiong lí kau tī góa ê chhiú; ū lâng kah góa thâi lí; chóng-sī góa thiàⁿ-sioh lí; góa kóng, Góa bô beh chhun-chhiú hāi góa ê chú; in-ūi i sī Iâ-hô-hoa só͘ boah-iû-ê.

11

Góa ê pē ah, lí khòaⁿ cheh, khòaⁿ lí gōa-ho̍k ê saⁿ-á-ku tī góa ê chhiú; góa koah lí ê gōa-ho̍k saⁿ-á-ku, bô thâi lí; tùi án-ni lí thang khòaⁿ-chhut chiū chai góa ê chhiú bô chòe sím-mı̍h pháiⁿ, bô pōe-ge̍k lí; góa m̄-bat tek-chōe lí, chóng-sī lí chhin-chhiūⁿ phah-la̍h siàu-siūⁿ góa ê sìⁿ-miā.

12

Gōan Iâ-hô-hoa tī lí góa ê tiong-kan phòaⁿ-tòan, Iâ-hô-hoa beh tī lí ê sin-chiūⁿ kā góa sin-oan; chóng-sī góa ê chhiú bô beh hāi lí.

13

Chhin-chhiūⁿ kó͘-chá lâng ū chı̍t-kù sio̍k-gú kóng, Pháiⁿ-sū tùi pháiⁿ-lâng chhut; chóng-sī góa ê chhiú m̄ kāng lí.

14

Í-sek-lia̍t ông chhut-lâi beh chhē chī-chūi ah? lí tui-jip chī-chūi ah? put-kò chhē chı̍t chiah sí-káu, chı̍t lia̍p kā-cháu.

15

Só͘-í gōan Iâ-hô-hoa chòe sím-phòaⁿ-si, phòaⁿ-tòan tī lí góa ê tiong-kan; koh kàm-chhat lâi piān-hō͘ góa ê àn-kiāⁿ, kiù góa chhut lí ê chhiú.

16

Tāi-pı̍t tùi Sò-lô kóng chiah ê ōe soah, Sò-lô kóng, Góa ê kiáⁿ Tāi-pı̍t, che sī lí ê siaⁿ mah? Sò-lô chiū chhut-siaⁿ thî-khàu;

17

kā Tāi-pı̍t kóng, Lí pí góa khah kong-gī, in-ūi lí ēng hó pò góa, chóng-sī góa ēng pháiⁿ pò lí;

18

lí kin-á-jı̍t sī piáu-bêng ēng hó khóan-thāi góa, in-ūi Iâ-hô-hoa chiong góa kau tī lí ê chhiú, chóng-sī lí bô thâi-sí góa.

19

Lâng nā tú-tio̍h i ê tùi-te̍k, kiám ū pàng i pêng-an khì mah? Gōan Iâ-hô-hoa in-ūi lí kin-á-jı̍t tùi góa só͘ kiâⁿ-ê, ēng hó pò lí;

20

khòaⁿ ah, taⁿ góa chai lí tek-khak beh chòe-ông, Í-sek-lia̍t kok beh kian-kò͘ tī lí ê chhiú.

21

Taⁿ lí tio̍h kí Iâ-hô-hoa tùi góa chiù-chōa, góa kè-sin liáu, bô chián-tû góa ê hō͘-è, tī góa ê pē ê ke bô bia̍t-bô góa ê miâ.

22

Tāi-pı̍t chiū ǹg Sò-lô chiù-chōa. Sò-lô chiū tò-khì i ê chhù. Tāi-pı̍t kap tè i ê lâng chiūⁿ-khì ōe-só͘.