Sat-bó͘-jíⁿ siōng-kòan 第 25 章 - 巴克禮全羅

1

Sat-bó͘-jíⁿ sí, Í-sek-lia̍t chèng lâng chū-chı̍p, ūi-tio̍h i thî-khàu, bâi-chòng i tī i ka-kī ê chhù, chiū-sī tī La̍h-má. Tāi-pı̍t khí-sin lo̍h-khì tī Pa-lân ê khòng-iá.

2

Tī Má-hûn ū chı̍t-lâng, i ê sán-gia̍p tī Ka-bı̍t, sī tōa hó-gia̍h lâng, ū mî-iûⁿ saⁿ-chheng chiah, soaⁿ-iûⁿ chı̍t-chheng chiah; i tī Ka-bı̍t chián iûⁿ-mn̂g.

3

Hit-lâng sī Ka-le̍k cho̍k ê lâng, miâ kiò Ná-pat, i ê bó͘ miâ kiò A-pí-kai, sī chhang-miâ koh súi ê hū-jîn-lâng, chóng-sī hit-lâng ê kiâⁿ-chòe sī ngī-sim koh hiong-ok.

4

Tāi-pı̍t tī khòng-iá thiaⁿ-kìⁿ Ná-pat teh chián iûⁿ-mn̂g,

5

Tāi-pı̍t chiū chhe cha̍p ê siàu-liân lâng; Tāi-pı̍t hoan-hù hiah ê siàu-liân lâng kóng, Lín tio̍h chiūⁿ-khì Ka-bı̍t, kìⁿ Ná-pat, ēng góa ê miâ kā i chhéng-an.

6

Tio̍h kā hit ê hó-miā lâng kóng, Gōan lí pêng-an, gōan lí ê ke pêng-an, gōan lí it-chhè só͘-ū-ê lóng pêng-an.

7

Taⁿ góa thiaⁿ-kìⁿ kóng, ū lâng tī lí hia, kā lí chián iûⁿ-mn̂g; lí ê bo̍k-chiá bat kap góan tòa, góan bô khi-hū i; in tī Ka-bı̍t ê sî, lóng bē-bat sit-lo̍h sím-mı̍h;

8

thang mn̄g lí ê siàu-liân lâng, in beh kā lí kóng; só͘-í gōan góa ê siàu-liân lâng tī lí ê ba̍k-chiu chêng tit-tio̍h un-tián; in-ūi góan lâi sī hó jı̍t-chí, kiû lí chiàu lí ê chhiú sûi-piān the̍h tām-po̍h hō͘ lí ê lô͘-po̍k, kap lí ê kiáⁿ Tāi-pı̍t.

9

Tāi-pı̍t ê siàu-liân lâng kàu, chiū chiong chiah ê ōe ēng Tāi-pı̍t ê miâ, lóng kā Ná-pat kóng, chiū chēng-chēng thèng-hāu.

10

Ná-pat ìn Tāi-pı̍t ê lô͘-po̍k kóng, Tāi-pı̍t sī chī-chūi? Iâ-se ê kiáⁿ sī chī-chūi? kūn-lâi chōe-chōe lô͘-po̍k pōe i ê chú-lâng.

11

Góa ê piáⁿ, góa ê chúi, kap ūi-tio̍h kā chián iûⁿ-mn̂g ê lâng góa só͘ thâi cheng-siⁿ ê bah, beh hō͘ chián iûⁿ-mn̂g ê lâng, góa kiám thang hō͘ hiah ê góa m̄-chai i tùi toh-lo̍h lâi ê lâng mah?

12

Tāi-pı̍t ê siàu-liân lâng chiū o̍at-tńg-sin, tùi gôan-lō͘ tò-khì, chiàu chiah ê ōe lóng kā Tāi-pı̍t kóng.

13

Tāi-pı̍t tùi tè i ê lâng kóng, Lín ta̍k-lâng lóng tio̍h pē to; in chiū lóng pē to. Tāi-pı̍t iā pē to; tè Tāi-pı̍t chiūⁿ-khì-ê iok-lio̍k ū sì-pah lâng, lâu nn̄g-pah lâng kò͘-siú cha̍p-mı̍h.

14

Ná-pat hiah ê siàu-liân lâng tiong ū chı̍t-ê lâi kā Ná-pat ê bó͘ A-pí-kai kóng, Tāi-pı̍t tùi khòng-iá chhe sù-chiá lâi chhéng-an góan chú-lâng, chú-lâng hóan-tńg sau-phî in.

15

Chóng-sī hiah ê lâng khóan-thāi góan chin hó, góan tī chhân-iá kap in óng-lâi ê sî, lóng bô siū siong-hāi, iā bô sit-lo̍h sím-mı̍h;

16

góan tī in hia chhī-iûⁿ ê sî, in mî-jı̍t chòe góan ê chhiûⁿ-ûi.

17

Taⁿ lí tio̍h chai, iā tio̍h táⁿ-sǹg, khòaⁿ lí beh cháiⁿ-iūⁿ kiâⁿ; in-ūi ū tiāⁿ-tio̍h ì-sù beh hāi góan ê chú-lâng kap i ê chôan-ke; i ê sèng-chêng hiong-ok, bô lâng káⁿ kap i kóng-ōe.

18

A-pí-kai chiū kóaⁿ-kín chiong nn̄g-pah ê piáⁿ, nn̄g phê-tē chiú, gō͘-chiah pī-pān hó ê iûⁿ, gō͘ sè-a hang ê gō͘-kak, chı̍t-pah pha phû-tô-koaⁿ, nn̄g-pah ê bû-hoa-kó piáⁿ, hō͘ kúi-nā chiah lû pē.

19

Kā i hiah ê siàu-liân lâng kóng, Lín chòe-thâu khì, góa beh tè lín ê āu-bīn khì; chóng-sī bô kā i ê tiōng-hu Ná-pat kóng.

20

I chiū khiâ lû, tú-á lo̍h-soaⁿ ê oat-kak hut-jiân khòaⁿ-kìⁿ Tāi-pı̍t kap tè i ê lâng tī tùi-bīn lo̍h-lâi; i chiū tú-tio̍h in.

21

Tāi-pı̍t bat kóng, Chit-lâng tī khòng-iá it-chhè só͘ ū-ê, góa kā i kò͘-siú tì-kàu sio̍k tī i-ê bô sit-lo̍h chı̍t-hāng, sı̍t-chāi sī khang-khang; i ēng pháiⁿ pò góa ê hó.

22

Hōan-nā sio̍k i ê, góa nā lâu i chı̍t ê ta-po͘-kiáⁿ kàu bîn-á-thiⁿ-kng, gōan Siōng-tè chiàu án-ni khóan-thāi Tāi-pı̍t ê tùi-te̍k, iā pí án-ni iáu khah-tāng.

23

A-pí-kai khòaⁿ-kìⁿ Tāi-pı̍t, chiū kóaⁿ-kín tùi i ê lû lo̍h-lâi, tī Tāi-pı̍t ê bīn-chêng àⁿ-thâu phak tī tōe-nih, pài i.

24

Phak tī i ê kha-ē, kóng, Góa ê chú ah, gōan chit ê chōe kui tī góa, kiû lí chún lí ê lú-pī kóng hō͘ lí thiaⁿ, koh kiû lí thiaⁿ lí ê lú-pī ê ōe.

25

Kiû góa ê chú bo̍h-tit tì-ì chit ê bô hē-lo̍h ê lâng Ná-pat, in-ūi i ê miâ cháiⁿ-iūⁿ, i ê lâng-khóan iā sī án-ni; i ê miâ kiò Ná-pat, i chòe-lâng kó-jiân gû-gōng. Chóng-sī góa ê chú só͘ chhe-lâi ê siàu-liân lâng, lí ê lú-pī iā bô khòaⁿ-kìⁿ.

26

Góa ê chú ah, Iâ-hô-hoa kì-jiân kìm-chí lí hōan-tio̍h thâi-sí lâng ê chōe, ēng lí ê chhiú pò ka-kī ê kiû-siû, só͘-í góa kí éng-o̍ah ê Iâ-hô-hoa kap lí ê o̍ah-miā lâi chiù-chōa, kóng, Gōan lí ê tùi-te̍k, kap kè-bô͘ hāi góa ê chú ê, lóng chhin-chhiūⁿ Ná-pat.

27

Taⁿ lí ê lú-pī só͘ tòa lâi hō͘ góa ê chú ê lé-mı̍h, thang hō͘ kun-tè góa ê chú ê siàu-liân lâng;

28

kiû lí khoan-sù lí ê lú-pī ê chōe-kòa; in-ūi Iâ-hô-hoa tek-khak kā góa ê chú kiàn-lı̍p kian-kò͘ ê ke, in-ūi góa ê chú ūi-tio̍h Iâ-hô-hoa kau-chiàn; koh tī lí it-seng ê jı̍t bô chhâ-chhut lí ū sím-mı̍h kè-sit.

29

Sui-jiân ū lâng khí-lâi tui-jip lí, siàu-siūⁿ lí ê sìⁿ-miā, chóng-sī góa ê chú ê sìⁿ-miā beh tī Iâ-hô-hoa lí ê Siōng-tè hia, pau tī o̍ah-miā ê pau-lāi; lí ê tùi-te̍k ê sìⁿ-miā Iâ-hô-hoa beh kā i hìⁿ-chhut-lâi, chhin-chhiūⁿ tùi hìⁿ-soh ê tiong-kan hìⁿ-chhut-khì chı̍t-iūⁿ.

30

Kàu āu-jı̍t Iâ-hô-hoa chiàu I só͘ èng-ún góa ê chú ê hok-khì, lâi it-chīn kiâⁿ tī lí, siat-lı̍p lí chòe Í-sek-lia̍t ê thâu,

31

tng hit-sî, góa ê chú m̄-bián ūi-tio̍h lâu bô-chōe ê lâng ê huih, sin ka-kī ê oan, tì-kàu ū sím-mı̍h iu-būn, á-sī sim-lāi ka-kī chek-pī; Iâ-hô-hoa sù-hok hō͘ góa ê chú ê sî, kiû lí kì-liām lí ê lú-pī.

32

Tāi-pı̍t kā A-pí-kai kóng, Iâ-hô-hoa Í-sek-lia̍t ê Siōng-tè, sī eng-kai o-ló ê; in-ūi I kin-á-jı̍t chhe lí lâi tú-tio̍h góa;

33

lí ê tì-hūi thang o-ló, lí pún-sin iā thang o-ló; in-ūi lí kin-á-jı̍t chó͘-tòng góa hōan-tio̍h thâi-sí lâng ê chōe, bô ēng ka-kī ê chhiú pò ka-kī ê kiû-siû.

34

Kìm-chí góa siong-hāi lí ê Iâ-hô-hoa Í-sek-lia̍t ê Siōng-tè, góa kí I ê éng-o̍ah lâi chiù-chōa, nā lí bô kín-kín lâi chih góa, kàu bîn-á-chá-khí kìⁿ-nā sio̍k Ná-pat ê, koat-tòan bô lâu chı̍t ê ta-po͘-kiáⁿ.

35

Tāi-pı̍t siu A-pí-kai tòa lâi hō͘ i ê mı̍h, chiū kā i kóng, Lí thang pêng-an tò-khì lí ê ke; khòaⁿ ah, góa ū thiaⁿ lí ê ōe, tòa-tio̍h lí.

36

A-pí-kai kàu Ná-pat hia, khòaⁿ-kìⁿ i tī ke-lāi pâi-siat iân-sia̍h, chhin-chhiūⁿ ông ê iân-sia̍h; Ná-pat sim tōa hoaⁿ-hí, in-ūi i chin tōa chùi. Só͘-í A-pí-kai bô-lūn tōa-sòe ê sū, lóng bô kā i kóng; thèng-hāu kàu keh chá-khí.

37

Kàu keh chá-khí, Ná-pat chiú thè; i ê bó͘ chiong chiah ê sū kā i kóng; i ê sim tī lāi-bīn chhin-chhiūⁿ sí, i piàn chhin-chhiūⁿ chio̍h-thâu.

38

Iok-lio̍k cha̍p-jı̍t Iâ-hô-hoa phah Ná-pat; i chiū sí.

39

Tāi-pı̍t thiaⁿ-kìⁿ Ná-pat í-keng sí, chiū kóng, Eng-kai tio̍h o-ló Iâ-hô-hoa, in-ūi góa tùi Ná-pat ê chhiú só͘ siū ê lêng-jio̍k, I ū kā góa sin-oan, koh chó͘-chí lô͘-po̍k kiâⁿ-pháiⁿ; Iâ-hô-hoa iā hō͘ Ná-pat ê pháiⁿ kui kàu Ná-pat ê thâu-khak. Án-ni Tāi-pı̍t chiū chhe lâng khì kap A-pí-kai kóng, Beh chhōa i chòe-bó͘.

40

Tāi-pı̍t ê lô͘-po̍k kàu Ka-bı̍t kìⁿ A-pí-kai, kā i kóng, Tāi-pı̍t chhe góan lâi kìⁿ lí, siūⁿ beh chhōa lí chòe-bó͘.

41

A-pí-kai chiū khí-lâi, phak tī tōe-nih, kóng, Lí ê lú-pī tī-chia, gōan chòe chhe-ēng, lâi sóe góa ê chú hiah ê lô͘-po̍k ê kha.

42

A-pí-kai kín-kín khí-lâi, khiâ-lû, ū i gō͘ ê lú-pī saⁿ-kap khì; i chiū tè Tāi-pı̍t ê sù-chiá khì chòe Tāi-pı̍t ê bó͘.

43

Tāi-pı̍t iā chhōa Iâ-su-lia̍t lâng A-hi-lóan; in nn̄g-lâng lóng chòe i ê bó͘.

44

Sò-lô í-keng chiong i ê cha-bó͘-kiáⁿ Bí-kah, chiū-sī Tāi-pı̍t ê bó͘, hō͘ Ka-lîm lâng, La̍h-ek ê kiáⁿ Phàⁿ-thê chòe bó͘.