Sat-bó͘-jíⁿ siōng-kòan 第 26 章 - 巴克禮全羅

1

Se-hut lâng kàu Ki-pí-a kìⁿ Sò-lô kóng, Tāi-pı̍t kiám m̄-sī ka-kī bih tī Iâ-sī-bûn thâu-chêng ê Hap-ki-la̍h soaⁿ mah?

2

Sò-lô chiū khí-lâi, chhōa Í-sek-lia̍t tiong kéng-sóan ê peng saⁿ-chheng, lo̍h-khì kàu Se-hut ê khòng-iá, beh tī Se-hut ê khòng-iá chhē Tāi-pı̍t.

3

Sò-lô tī Iâ-sī-bûn thâu-chêng ê Hap-ki-la̍h soaⁿ, Chat-iâⁿ tī lō͘-nih. Tāi-pı̍t tiàm tī khòng-iá, chai Sò-lô lâi khòng-iá beh tui-jip i.

4

Tāi-pı̍t chiū chhe kúi-nā ê cheng-thàm, chiah chai Sò-lô chin-chiàⁿ lâi.

5

Tāi-pı̍t chiū khí-lâi, kàu Sò-lô chat-iâⁿ ê só͘-chāi; Tāi-pı̍t khòaⁿ-kìⁿ Sò-lô kap i ê kun-tiúⁿ Nî-jíⁿ ê kiáⁿ Ap-nî-jíⁿ khùn ê só͘-chāi, Sò-lô khùn tī pâi-lia̍t chhia ê lāi-bīn, peh-sìⁿ chat-iâⁿ tī i ê sì-ûi.

6

Tāi-pı̍t tùi Hek-lâng A-hi-bí-le̍k, kap Sé-ló͘-ngá ê kiáⁿ Iok-ap ê hiaⁿ-tī A-pí-su kóng, Chī-chūi beh kap góa lo̍h-khì, kàu iâⁿ-pôaⁿ, kàu Sò-lô hia? A-pí-su kóng, Góa kap lí lo̍h-khì.

7

Tāi-pı̍t kap A-pí-su thàu-mî kàu peh-sìⁿ hia, khòaⁿ-kìⁿ Sò-lô tó tī pâi-lia̍t chhia ê lāi-bīn teh khùn; i ê chhiuⁿ tī thâu-khak-piⁿ, chhah tī tōe-nih; Ap-nî-jíⁿ kap peh-sìⁿ khùn tī i ê sì-ûi.

8

A-pí-su kā Tāi-pı̍t kóng, Siōng-tè kin-á-jı̍t chiong lí ê tùi-te̍k kau tī lí ê chhiú, kiû lí chún góa ēng chhiuⁿ kā i chha̍k tī tōe-nih, chha̍k chı̍t-ē, m̄-bián nn̄g-ē.

9

Tāi-pı̍t kā A-pí-su kóng, M̄-thang hāi-sí i; chī-chūi khí-chhiú hāi Iâ-hô-hoa só͘ boah-iû-ê iā bô chōe ah?

10

Tāi-pı̍t koh kóng, Góa kí éng-o̍ah ê Iâ-hô-hoa lâi chiù-chōa, Iâ-hô-hoa beh phah i; kiám-chhái i sí-jı̍t beh kàu, á-sī i beh lo̍h chiàn-tīn lâi sí.

11

Góa tùi-tī Iâ-hô-hoa koat-tòan m̄-káⁿ khí-chhiú phah Iâ-hô-hoa só͘ boah-iû-ê; taⁿ lí thang chhú i thâu-khak-piⁿ ê chhiuⁿ kap chúi-pân, lán thang the̍h lâi khì.

12

Tāi-pı̍t tùi Sò-lô ê thâu-khak-piⁿ chhú i ê chhiuⁿ kap chúi-pân; nn̄g-lâng chiū khì; bô lâng khòaⁿ-kìⁿ, bô lâng chai, iā bô lâng chhíⁿ, sī in lóng teh khùn, in-ūi Iâ-hô-hoa hō͘ in khùn tāng-bîn.

13

Tāi-pı̍t kè-khì kàu hit-pêng, hn̄g-hn̄g khiā tī soaⁿ-téng, kap in saⁿ-lī put-chí hn̄g.

14

Tāi-pı̍t kiò peh-sìⁿ kap Nî-jíⁿ ê kiáⁿ Ap-nî-jíⁿ, kóng, Ap-nî-jíⁿ ah, lí bô ìn mah? Ap-nî-jíⁿ kóng, Lí sī chī-chūi, teh kiò ông ah?

15

Tāi-pı̍t tùi Ap-nî-jíⁿ kóng, Lí kiám m̄-sī chı̍t ê ióng-sū mah? Í-sek-lia̍t tiong chī-chūi pí-tit lí ah? Lí siáⁿ-sū bô pó-hō͘ lí ê chú, lí ê ông ah? in-ūi peh-sìⁿ tiong ū chı̍t-lâng jı̍p-khì beh hāi lí ê ông lí ê chú.

16

Lí chit-hō só͘-chòe sī m̄-hó; góa kí éng-o̍ah ê Iâ-hô-hoa chiù-chōa, lín lóng sī kai-sí ê, in-ūi bô pó-hō͘ lín ê chú, chiū-sī Iâ-hô-hoa só͘ boah-iû-ê; taⁿ, lí khòaⁿ, ông thâu-khak-piⁿ ê chhiuⁿ kap chúi-pân tī toh-lo̍h?

17

Sò-lô jīn-tit sī Tāi-pı̍t ê siaⁿ, chiū kóng, Góa ê kiáⁿ Tāi-pı̍t, che sī lí ê siaⁿ mah? Tāi-pı̍t kóng, Ông ah, góa ê chú, sī góa ê siaⁿ;

18

koh kóng, Góa ê chú siáⁿ-sū tui-jip lô͘-po̍k? góa chòe sím-mı̍h? góa ê chhiú ū sím-mı̍h pháiⁿ?

19

Ông ah, góa ê chú ah, taⁿ kiû lí thiaⁿ lô͘-po̍k ê ōe; nā sī Iâ-hô-hoa kek-tōng lí kong-kek góa, gōan I kàm-la̍p chè-mı̍h; nā sī lâng kek-tōng lí, gōan in tī Iâ-hô-hoa ê bīn-chêng siū chiù-chó͘, in-ūi in kin-á-jı̍t kek-tio̍k góa, hō͘ góa bô hūn tī Iâ-hô-hoa ê gia̍p, kóng, Lí khì ho̍k-sāi pa̍t ê siōng-tè.

20

Taⁿ bo̍h-tit hō͘ góa ê huih lâu tī lī-khui Iâ-hô-hoa bīn-chêng ê tōe; in-ūi Í-sek-lia̍t ông chhut-lâi, sī chhē chı̍t chiah kā-cháu, chhin-chhiūⁿ lâng tī soaⁿ-nih jip chı̍t chiah chià-ko͘.

21

Sò-lô kóng, Góa ū-chōe lah; góa ê kiáⁿ Tāi-pı̍t, lí thang tò-lâi; góa bô beh koh hāi lí; in-ūi lí kin-á-jı̍t khòaⁿ góa ê sìⁿ-miā chòe pó-pòe; khòaⁿ ah, góa só͘-chòe sī chin-gōng, chhò-gō͘ kàu-ke̍k.

22

Tāi-pı̍t ìn kóng, Ông ah, lí ê chhiuⁿ tī-chia, lí tio̍h kiò chı̍t ê siàu-liân lâng kè-lâi kia̍h.

23

Iâ-hô-hoa beh chiàu ta̍k-lâng ê kong-gī kap tiong-sìn lâi pò i; in-ūi kin-á-jı̍t Iâ-hô-hoa chiong lí kau tī góa ê chhiú; chóng-sī góa m̄-khéng chhun-chhiú hāi Iâ-hô-hoa só͘ boah-iû-ê.

24

Góa kin-á-jı̍t khòaⁿ-tāng lí ê sìⁿ-miā, gōan Iâ-hô-hoa iā án-ni khòaⁿ-tāng góa ê sìⁿ-miā; koh kiù góa thoat-lī lóng-chóng ê hōan-lān.

25

Sò-lô kā Tāi-pı̍t kóng, Góa ê kiáⁿ Tāi-pı̍t, gōan lí siū chiok-hok; lí beh kiâⁿ-chhut tōa ê tāi-chì, iā ún-tàng beh khah-iâⁿ. Tāi-pı̍t chiū chòe i kiâⁿ. Sò-lô tò-khì i ê pún só͘-chāi.