Sat-bó͘-jíⁿ siōng-kòan 第 29 章 - 巴克禮全羅

1

Hui-lī-sū lâng chū-chı̍p in ê kun-peng kàu A-hut. Í-sek-lia̍t lâng chat-iâⁿ tī Iâ-su-lia̍t ê chúi-chôaⁿ-piⁿ.

2

Hui-lī-sū lâng hiah ê siú-léng chhōa peng, ū-ê chı̍t-pah, ū-ê chı̍t-chheng, chìn-chêng khì. Tāi-pı̍t kap tè i ê lâng, kap A-kiat, tè tī āu-bīn.

3

Hui-lī-sū lâng ê siú-léng kóng, chiah ê Hi-pek-lâi lâng tī-chia chòe sím-mı̍h? A-kiat kā Hui-lī-sū lâng ê siú-léng kóng, Chit-ê kiám m̄-sī Í-sek-lia̍t ông Sò-lô ê jîn-sîn Tāi-pı̍t mah? i kap góa tòa í-keng ū chiah ê jı̍t, chiah ê nî; tùi i tâu-hâng góa kàu kin-á-jı̍t, góa bē-bat khòaⁿ-kìⁿ i ū kè-sit.

4

Hui-lī-sū lâng ê siú-léng siū-khì i; Hui-lī-sū lâng ê siú-léng kā i kóng, Tio̍h hō͘ chit-lâng tò-khì, tò-khì lí só͘ an-tì i ê só͘-chāi, m̄-thang hō͘ i kap lán lo̍h-tīn, kiaⁿ-liáu i tī tīn-lāi chòe lán ê tùi-te̍k; i beh kap i ê chú-lâng koh hô, beh ēng sím-mı̍h ah? Kiám m̄-sī chiah ê lâng ê thâu-khak?

5

Chêng in ū lâng thiàu-bú chhiùⁿ-hō kóng, Sò-lô thâi-sí in ê chheng-chheng, Tāi-pı̍t thâi-sí in ê bān-bān;só͘ kóng ê, kiám m̄-sī chit ê Tāi-pı̍t mah?

6

A-kiat kiò Tāi-pı̍t lâi, kā i kóng, Góa kí éng-o̍ah ê Iâ-hô-hoa lâi chiù-chōa, lí sī chèng-tı̍t, lí kap góa chhut-jı̍p tī kun-tūi tiong, góa khòaⁿ sī hó; in-ūi tùi lí lâi góa chia ê sî, kàu kin-á-jı̍t, góa m̄-bat khòaⁿ-kìⁿ lí ū sím-mı̍h kè-sit; to̍k-to̍k chiah ê siú-léng khòaⁿ lí chòe m̄-hó;

7

taⁿ lí tò-khì, an-jiân khì, kiaⁿ-liáu lí só͘ chòe, Hui-lī-sū lâng ê siú-léng bô hoaⁿ-hí.

8

Tāi-pı̍t kā A-kiat kóng, Góa bat chòe sím-mı̍h? tùi góa khí-thâu lâi lí ê bīn-chêng ê sî kàu kin-á-jı̍t, lí tī lí ê lô͘-po̍k ū khòaⁿ-chhut sím-mı̍h tāi-chì, hō͘ góa bô thang kap ông góa ê chú ê tùi-te̍k kau-chiàn ah?

9

A-kiat ìn Tāi-pı̍t kóng, Góa chai lí tī góa ê ba̍k-chiu-chêng sī hó, chhin-chhiūⁿ Siōng-tè ê sù-chiá chı̍t-iūⁿ; chóng-sī Hui-lī-sū lâng ê siú-léng kóng, Chit-lâng m̄-thang kap lán khì kau-chiàn.

10

Só͘-í lí í-kı̍p lí ê chú ê lô͘-po̍k kap lí lâi-ê, tio̍h chá-chá khí-lâi; lí í-keng khí-lâi, kàu thiⁿ-kng chiū tio̍h khì.

11

Keh chá-khí Tāi-pı̍t kap tè i ê lâng chá-chá khí-lâi, khí-sin tò-khì Hui-lī-sū ê tōe. Hui-lī-sū lâng iā chiūⁿ-khì Iâ-su-lia̍t.