Sat-bó͘-jíⁿ siōng-kòan 第 30 章 - 巴克禮全羅

1

Tē-saⁿ jı̍t Tāi-pı̍t kap tè i ê lâng kàu Sé-kek-la̍h. A-má-le̍k lâng í-keng chhim-hōan lâm-hng kap Sé-kek-la̍h, iā phah Sé-kek-la̍h, ēng hé sio i;

2

lia̍h siâⁿ-lāi ê hū-lú, bô-lūn tōa-sòe, bô thâi-sí chı̍t-ê, kan-ta lia̍h i khì.

3

Tāi-pı̍t kap tè i ê lâng kàu hit ê siâⁿ, khòaⁿ-kìⁿ siâⁿ í-keng hō͘ hé sio-khì, in ê bó͘, kiáⁿ, cha-bó͘-kiáⁿ, lóng hō͘ i lia̍h-khì.

4

Tāi-pı̍t kap tè i ê lâng chiū khui-siaⁿ háu, háu kàu bô la̍t thang háu.

5

Tāi-pı̍t nn̄g ê bó͘, Iâ-su-lia̍t lâng A-hi-lóan, kap bat chòe Ka-bı̍t lâng Ná-pat ê bó͘ A-pí-kai, iā hō͘ i lia̍h-khì.

6

Tāi-pı̍t chin tio̍h-kip, in-ūi peh-sìⁿ kóng, Tio̍h ēng chio̍h-thâu tìm i; sī peh-sìⁿ lâng-lâng ūi-tio̍h in ê kiáⁿ cha-bó͘-kiáⁿ chin hôan-ló; chóng-sī Tāi-pı̍t óa-khò Iâ-hô-hoa i ê Siōng-tè, ka-kī kian-kò͘.

7

Tāi-pı̍t kā A-hi-bí-le̍k ê kiáⁿ, chè-si A-pí-a-tha, kóng, Chhiáⁿ lí kā góa tòa í-hut-tek lâi. A-pí-a-tha chiū tòa í-hut-tek kàu Tāi-pı̍t hia.

8

Tāi-pı̍t mn̄g Iâ-hô-hoa kóng, Góa jip chit ê kun-tūi, jip ōe tio̍h á-bōe? Iâ-hô-hoa kóng, Lí tio̍h jip i, in-ūi jip ún-tàng tio̍h, iā ún-tàng kiù in lóng tò-lâi.

9

Tāi-pı̍t chiū kap tè i ê la̍k-pah lâng kàu Pí-so ê khoe; lâu-teh ê lâng hioh tī-hia.

10

Chóng-sī Tāi-pı̍t kap sì-pah lâng khì tui-jip; ū nn̄g-pah lâng ià-siān, bōe-ōe kè Pí-so ê khoe, chiū lâu tī-hia.

11

In tī chhân-iá tú-tio̍h chı̍t ê Ai-kı̍p lâng, chiū tòa i kàu Tāi-pı̍t hia; ēng piáⁿ hō͘ i, i chiū chia̍h, ēng chúi hō͘ i lim;

12

koh hō͘ i chı̍t tè bû-hoa-kó piáⁿ, nn̄g pha phû-tô-koaⁿ; i chia̍h-liáu, cheng-sîn ho̍k-tò; in-ūi i saⁿ-jı̍t saⁿ-mî bô chia̍h piáⁿ bô lim chúi.

13

Tāi-pı̍t mn̄g i kóng, Lí sio̍k chī-chūi? tùi toh-lo̍h lâi? I ìn kóng, Góa sī Ai-kı̍p ê siàu-liân lâng, sī A-má-le̍k lâng ê lô͘-po̍k; in-ūi góa saⁿ-jı̍t chêng phòa-pīⁿ, góa ê chú-lâng chiū pàng-sak góa;

14

góan chhim-hōan Ki-lī-thê ê lâm-sì, kap sio̍k Iû-tāi ê tōe, kap Ka-le̍k tōe ê lâm-sì; koh ēng hé sio Sé-kek-la̍h.

15

Tāi-pı̍t mn̄g i kóng, Lí ōe chhōa góa kàu hit ê kun-tūi hia á-bōe? I ìn kóng, Lí tio̍h kā góa kí Siōng-tè lâi chiù-chōa, bô thâi-sí góa, iā bô chiong góa kau tī góa ê chú-lâng ê chhiú, góa chiū beh chhōa lí lo̍h-khì kàu hit ê kun-tūi hia.

16

I chhōa i lo̍h-khì ê sî, khòaⁿ-kìⁿ in sì-sòaⁿ tī piàn-tōe, lim-chia̍h thiàu-bú; in-ūi tùi Hui-lī-sū tōe kap Iû-tāi tōe só͘ chhiúⁿ ê mı̍h chin-chōe.

17

Tāi-pı̍t phah in tùi hông-hun-àm kàu keh-jı̍t ê-hng; chí-ū sì-pah ê khiâ lo̍k-tô ê siàu-liân lâng cháu-khì, í-gōa bô chı̍t-lâng cháu-lī.

18

A-má-le̍k lâng só͘ chhiúⁿ-khì ê châi-bu̍t, Tāi-pı̍t lóng kiù tò-tńg, Tāi-pı̍t iā kiù i nn̄g ê bó͘ tò-lâi.

19

Kìⁿ-nā A-má-le̍k lâng só͘ chhiúⁿ-khì-ê, bô-lūn tōa-sòe, kiáⁿ, cha-bó͘-kiáⁿ, châi-bu̍t, Tāi-pı̍t lóng tòa tò-tńg, bô sit-lo̍h chı̍t-ê.

20

Tāi-pı̍t koh chhiúⁿ só͘ ū ê iûⁿ-kûn, gû-kûn, in kóaⁿ i tī cheng-siⁿ ê thâu-chêng, kóng, Che sī Tāi-pı̍t só͘ chhú-lâi-ê.

21

Tāi-pı̍t kàu hiah ê ià-siān bōe-ōe kun-tè Tāi-pı̍t khì, lâu tī Pí-so khoe ê nn̄g-pah lâng hia. In chhut-lâi ngiâ-chih Tāi-pı̍t kap tè i ê peh-sìⁿ. Tāi-pı̍t chìn-chêng kàu peh-sìⁿ hia, chhéng-an in.

22

Kap Tāi-pı̍t khì ê lâng, kî-tiong ū pháiⁿ-lâng húi-lūi lóng-chóng kóng, In-ūi in bô kap lán khì, lán só͘ kiù tò-tńg ê mı̍h, tek-khak m̄ pun hō͘ in, kan-ta ēng in ta̍k-lâng ê bó͘, kiáⁿ-jî, hō͘ in, hō͘ in chhōa khì.

23

Tāi-pı̍t kóng, Hiaⁿ-tī ah, m̄-thang chiong Iâ-hô-hoa só͘ siúⁿ-sù lán ê mı̍h, án-ni chòe; in-ūi I pó-hō͘ lán, chiong kong-kek lán ê kun-tūi kau tī lán ê chhiú.

24

Chit ê tāi-chì chī-chūi beh thiaⁿ-thàn lín ah? kò͘-siú cha̍p-mı̍h ê lâng só͘ tit-tio̍h ê hūn-gia̍h tio̍h chhin-chhiūⁿ chhut-tīn ê lâng ê hūn-gia̍h, tāi-ke tio̍h pîⁿ-pun.

25

Tùi hit-jı̍t í-āu Tāi-pı̍t siat-lı̍p chit-ê chòe Í-sek-lia̍t ê lu̍t-lē hoat-tō͘, tı̍t-kàu kin-á-jı̍t.

26

Tāi-pı̍t kàu Sé-kek-la̍h ê sî, tùi só͘ chhiúⁿ ê mı̍h ê tiong-kan the̍h-khí-lâi, kià khì sàng i ê pêng-iú, Iû-tāi ê tiúⁿ-ló, kóng, Khòaⁿ ah, chiah-ê sī tùi Iâ-hô-hoa ê tùi-te̍k chhiúⁿ lâi ê, sàng hō͘ lín chòe lé-mı̍h.

27

Chiū-sī sàng hō͘ tiàm tī Pek-te̍k-lī ê, tiàm tī lâm-hng ê La̍h-bo̍at ê, tiàm tī Ngá-thê-jíⁿ ê;

28

tiàm tī A-lô-jíⁿ ê, tiàm tī Sek-bo̍at ê, tiàm tī Í-sı̍t-thê-bo̍k ê;

29

tiàm tī La̍h-hap-le̍k ê, tiàm tī Iâ-la̍h-bia̍t lâng chiah ê siâⁿ ê, tiàm tī Ki-nî lâng hiah ê siâⁿ ê;

30

tiàm tī Hô-jíⁿ-má ê, tiàm tī Ko-la̍h-san ê, tiàm tī A-that ê;

31

tiàm tī Hi-pek-lûn ê, í-kı̍p Tāi-pı̍t kap tè i ê lâng pêng-sò͘ só͘ óng-lâi ê só͘-chāi, lóng hō͘ i.