Sat-bó͘-jíⁿ siōng-kòan 第 7 章 - 巴克禮全羅

1

Ki-lia̍t-iâ-lîm lâng lâi, tòa Iâ-hô-hoa ê iok-kūi chiūⁿ-khì, kàu tī soaⁿ-téng A-pí-ná-ta̍t ê chhù, hun-piat i ê kiáⁿ Í-lī-a-sat, kò͘-siú Iâ-hô-hoa ê iok-kūi.

2

Iok-kūi tī Ki-lia̍t-iâ-lîm jı̍t-chí kú-kú, le̍k-kè jī-cha̍p nî; Í-sek-lia̍t chôan-ke tui-liām Iâ-hô-hoa.

3

Sat-bó͘-jíⁿ kā Í-sek-lia̍t chôan-ke kóng, Lín nā chı̍t-sim kui-sūn Iâ-hô-hoa, chiū tio̍h tùi lín tiong-kan tû-khì gōa-pang ê siōng-tè kap A-su-tha-lio̍k, kian-sim kui-ǹg Iâ-hô-hoa, toaⁿ-toaⁿ ho̍k-sāi I, I beh kiù lín thoat-lī Hui-lī-sū lâng ê chhiú.

4

Í-sek-lia̍t lâng chiū tû-khì chiah ê Pa-le̍k kap A-su-tha-lio̍k, toaⁿ-toaⁿ ho̍k-sāi Iâ-hô-hoa.

5

Sat-bó͘-jíⁿ kóng, Tio̍h chū-chı̍p Í-sek-lia̍t chèng-lâng tī Bí-su-pa, góa beh thòe lín kî-tó Iâ-hô-hoa.

6

In chiū chū-chı̍p tī Bí-su-pa, chhiūⁿ-chúi piàⁿ tī Iâ-hô-hoa ê bīn-chêng, tī hit-jı̍t kìm-chia̍h, tī-hia kóng, Góan ū tek-chōe Iâ-hô-hoa. Sat-bó͘-jíⁿ chiū tī Bí-su-pa phòaⁿ-tòan Í-sek-lia̍t lâng.

7

Hui-lī-sū lâng thiaⁿ-kìⁿ Í-sek-lia̍t lâng chū-chı̍p tī Bí-su-pa. Hui-lī-sū ê siú-léng chiū chiūⁿ-lâi beh kong-kek Í-sek-lia̍t lâng; Í-sek-lia̍t lâng thiaⁿ-kìⁿ chiū kiaⁿ Hui-lī-sū lâng.

8

Í-sek-lia̍t lâng kā Sat-bó͘-jíⁿ kóng, Gōan lí thòe góan kiû-kiò Iâ-hô-hoa lán ê Siōng-tè bô soah, hō͘ I kiù lán thoat-lī Hui-lī-sū lâng ê chhiú.

9

Sat-bó͘-jíⁿ chiū ēng chı̍t chiah chia̍h-lin ê iûⁿ-á, kui-chiah sio hiàn-hō͘ Iâ-hô-hoa chòe sio-chè; Sat-bó͘-jíⁿ thòe Í-sek-lia̍t lâng kiû-kiò Iâ-hô-hoa; Iâ-hô-hoa ìn i.

10

Sat-bó͘-jíⁿ teh hiàn sio-chè ê sî, Hui-lī-sū lâng chìn-chêng lâi, beh kap Í-sek-lia̍t lâng kau-chiàn; tī hit-jı̍t Iâ-hô-hoa khí tōa-siaⁿ ê lûi kong-kek Hui-lī-sū lâng, phah-lōan in; in chiū thâi-su tī Í-sek-lia̍t lâng ê bīn-chêng.

11

Í-sek-lia̍t lâng tùi Bí-su-pa chhut-lâi, tui-kóaⁿ Hui-lī-sū lâng, phah in tı̍t-kàu Pek-kah ê ē-bīn.

12

Sat-bó͘-jíⁿ ēng chı̍t tè chio̍h khiā tī Bí-su-pa kap Siān ê tiong-kan, kiò i ê miâ Í-piān-í-siā, kóng, Kàu chit-tia̍p Iâ-hô-hoa pang-chān lán.

13

Tùi chit-tia̍p Hui-lī-sū lâng chiū khut-ho̍k, m̄-káⁿ koh jı̍p Í-sek-lia̍t lâng ê kéng-lāi; Sat-bó͘-jíⁿ it-seng ê jı̍t, Iâ-hô-hoa ê chhiú kong-kek Hui-lī-sū lâng.

14

Hui-lī-sū lâng só͘ ū chhú Í-sek-lia̍t lâng ê siâⁿ, tùi Í-kek-lûn kàu Ka-te̍k, lóng hêng Í-sek-lia̍t lâng; in hiah ê kéng-kài Í-sek-lia̍t lâng iā tùi Hui-lī-sū lâng ê chhiú siu tò-tńg; hit-sî Í-sek-lia̍t lâng kap A-mô͘-lī lâng hô-hó.

15

Sat-bó͘-jíⁿ it-seng chòe Í-sek-lia̍t ê sū-su.

16

I ta̍k-nî sûn-sī Pek-te̍k-lī, Kiat-kah, Bí-su-pa chiah ê só͘-chāi phòaⁿ-tòan Í-sek-lia̍t lâng;

17

chiū tò-tńg-khì, kàu La̍h-má, in-ūi i ê ke tī-hia; iā tī hia phòaⁿ-tòan Í-sek-lia̍t lâng; iā tī-hia kā Iâ-hô-hoa khí chı̍t chō tôaⁿ.