Sat-bó͘-jíⁿ siōng-kòan 第 8 章 - 巴克禮全羅

1

Sat-bó͘-jíⁿ í-keng lāu, chiū siat-lı̍p i ê kiáⁿ chòe Í-sek-lia̍t ê sū-su.

2

I ê tōa-kiáⁿ miâ-kiò Iok-jíⁿ, tē-jī-kiáⁿ miâ-kiò A-pí-a; in tī Pia̍t-sī-pa chòe sū-su.

3

Chóng-sī i ê kiáⁿ bô kiâⁿ i ê lō͘, phian-su tham-châi, siū pò͘-lō͘, bô chiàu-tı̍t phòaⁿ-tòan.

4

Í-sek-lia̍t ê tiúⁿ-ló lóng chū-chı̍p, kàu La̍h-má kìⁿ Sat-bó͘-jíⁿ;

5

kā i kóng, Khòaⁿ ah, lí í-keng lāu, lí ê kiáⁿ bô kiâⁿ lí ê lō͘; taⁿ kiû lí kā góan siat-lı̍p chı̍t ê ông phòaⁿ-tòan góan, chhin-chhiūⁿ lia̍t-kok chı̍t-iūⁿ.

6

In kóng, Kiû lí kā góan siat-lı̍p chı̍t ê ông phòaⁿ-tòan góan, hit ê sū Sat-bó͘-jíⁿ bô hoaⁿ-hí. Sat-bó͘-jíⁿ chiū kî-tó Iâ-hô-hoa.

7

Iâ-hô-hoa tùi Sat-bó͘-jíⁿ kóng, Peh-sìⁿ tùi lí só͘ kóng it-chhè ê ōe, lí tio̍h thàn; in-ūi in m̄-sī khì-sak lí, sī khì-sak Góa, bô hō͘ Góa chòe in ê ông.

8

Tùi Góa chhōa in chhut Ai-kı̍p kàu kin-á-jı̍t, in it-chhè ê só͘-kiâⁿ lī-khui Góa, khì ho̍k-sāi pa̍t ê siōng-tè, taⁿ iā chiàu án-ni khóan-thāi lí;

9

só͘-í lí tio̍h thàn in ê ōe; chóng-sī tio̍h giâm-giâm kéng-kài in, hō͘ in chai chiong-lâi kóan-lí in ê ông ê chè-tō͘ sī cháiⁿ-iūⁿ.

10

Sat-bó͘-jíⁿ ēng Iâ-hô-hoa ê ōe lóng kā peh-sìⁿ kóng, chiū-sī hiah ê tùi i thó chı̍t ê ông ê, kóng,

11

Chiong-lâi kóan-lí lín ê ông ê chè-tō͘ chiū-sī án-ni, i beh chhú lín ê kiáⁿ, ūi ka-kī siat-lı̍p i kā i kóan-chhia, chòe i ê bé-peng, cháu tī chhia ê thâu-chêng;

12

koh beh ūi ka-kī siat-lı̍p in chòe chhian-chóng, ngó͘-sı̍p-hu-tióng; iā beh siat-lı̍p lâng kā i choh-hn̂g, siu gō͘-kak, chè-chō kun-khì, kap chhia-nih ê khì-kū;

13

beh chhú lín ê cha-bó͘-kiáⁿ kā i chè-chō phang-iû, chòe chú-chia̍h-ê, chòe pek-piáⁿ-ê;

14

lín ê chhân-hn̂g, phû-tô-hn̂g, kaⁿ-ná-hn̂g, hit ê siōng-hó-ê, i beh chhú i lâi hō͘ i ê lô͘-po̍k;

15

lín só͘ chèng-choh-ê, kap lín ê phû-tô-hn̂g, i beh chhú cha̍p-hūn-chı̍t, hō͘ i ê thài-kàm kap lô͘-po̍k.

16

Koh beh chhú lín ê lô͘-po̍k, lú-pī, ióng-kiāⁿ ê siàu-liân lâng, kap lín ê lû, lâi chòe i ê chhe-ēng;

17

lín ê iûⁿ-kûn, i beh chhú cha̍p-hūn ê chı̍t-hūn; lín iā beh chòe i ê lô͘-po̍k;

18

hit-sî lín beh in-ūi só͘ kéng ê ông lâi âu-kiò; chóng-sī Iâ-hô-hoa tī hit-sî m̄-thiaⁿ lín.

19

Chóng-sī peh-sìⁿ m̄-khéng thiaⁿ Sat-bó͘-jíⁿ ê ōe, kóng, M̄-ah, góan tek-khak beh chı̍t ê ông tī-lí góan;

20

hō͘ góan chhin-chhiūⁿ lia̍t-kok chı̍t-iūⁿ, góan ê ông phòaⁿ-tòan góan, chòe-thâu chhōa góan, thòe góan kau-chiàn.

21

Sat-bó͘-jíⁿ í-keng thiaⁿ-kìⁿ peh-sìⁿ lóng-chóng ê ōe, chiū kóng hiah ê ōe hō͘ Iâ-hô-hoa thiaⁿ.

22

Iâ-hô-hoa tùi Sat-bó͘-jíⁿ kóng, Lí tio̍h thiaⁿ in ê ōe, kā in siat-lı̍p chı̍t ê ông. Sat-bó͘-jíⁿ kā Í-sek-lia̍t lâng kóng, Lín ta̍k-ê tò-khì ka-kī ê siâⁿ.