Thê-mô͘-thài chiân 第 6 章 - 巴克禮全羅

1

Kìⁿ-nā tī lâng ê hat-ē chòe lô͘-po̍k ê, tio̍h khòaⁿ ka-kī ê chú-lâng kham-tit siū chiâu-chn̂g ê chun-kèng, bián-tit Siōng-tè ê miâ kap tō-lí tú-tio̍h húi-pòng.

2

Siat-sú i ê chú-lâng sī sìn tō-lí ê, chiū m̄ thang in-ūi i sī hiaⁿ-tī lâi khòaⁿ-khin i; hóan-tńg koh khah tio̍h ho̍k-sāi i, in-ūi siū lī-ek ê chiū-sī sìn kap tit-tio̍h thiàⁿ ê. Lí tio̍h ēng chiah-ê kà-sī lâi khó͘-khǹg in.

3

Nā ū lâng thôan pa̍t iūⁿ ê kàu, bô sūn-ho̍k lán ê Chú Iâ-so͘ Ki-tok toan-chèng ê ōe, kap chiàu kèng-khiân ê kàu-hùn ê;

4

i sī ka-kī phòng-hong, m̄ chai pòaⁿ-hāng, ū hò͘ⁿ piān-lūn kap saⁿ-chìⁿ ōe ê pē-pēng;

5

tùi án-ni chiū siⁿ-khí òan-tò͘, saⁿ-chiⁿ, húi-pòng, pháiⁿ liām-thâu, í-kı̍p sim-chì pāi-hōai sòng-sit chin-lí ê lâng ê oan-ke; in lia̍h kèng-khiân chòe lī-lō͘.

6

Nā-sī kèng-khiân kiam ti-chiok chiū-sī tōa lī-lō͘.

7

In-ūi lán chhut-sì bô tòa sím-mı̍h lâi, kè-sì iā bōe-ōe tòa sím-mı̍h khì.

8

Nā-sī ū thang chia̍h chhēng, lán chiū beh ti-chiok.

9

To̍k-to̍k hiah ê siūⁿ beh hoat-châi ê, chiū hām-lo̍h bê-he̍k kap lô-bāng, í-kı̍p chōe-chōe gōng-gōng ū sún-hāi ê su-io̍k, chiū-sī hō͘ lâng tîm-lo̍h tī pāi-hōai kap bia̍t-bô ê.

10

In-ūi tham-châi sī bān ok ê kun-gôan; ū lâng lôan-bō͘ i, chiū siū bê-he̍k lâi lī-khui tō-lí, ēng chōe-chōe kan-khó͘ ka-kī chhì-chha̍k.

11

To̍k-to̍k lí, sio̍k Siōng-tè ê lâng ah, tio̍h siám-pī chiah-ê; lâi tui-jip gī, kèng-khiân, sìn, jîn-ài, thun-lún, un-jiû.

12

Tio̍h cheng-chiàn sìn ê hó cheng-chiàn; chiong éng-o̍ah khîⁿ tiâu-tiâu, lí ê siū tiàu chiū-sī ūi-tio̍h chit-ê; lí iā bat sêng-jīn hó ê chì-gōan tī chōe-chōe kan-chèng ê lâng ê bīn-chêng.

13

Góa tī siúⁿ-sù o̍ah-miā hō͘ bān-hāng-ū ê Siōng-tè ê bīn-chêng, í-kı̍p tùi Pún-tiu Pí-lia̍p-to chòe hó ê kan-chèng ê Ki-tok Iâ-so͘ ê bīn-chêng, hoan-hù lí,

14

tio̍h siú chit ê bēng-lēng, bô hâ-chhû, bô thang hiâm, kàu lán ê Chú Iâ-so͘ Ki-tok ê hián-hiān.

15

Kàu kî tōa hok-khì, to̍k-it ū kôan-lêng, bān ông ê Ông, bān chú ê Chú, beh hián-bêng i,

16

chiū-sī to̍k-it bōe sí, tiàm-tī bōe thang kūn-óa ê kng, lâng só͘ bē bat khòaⁿ-kìⁿ, iā bōe-ōe khòaⁿ-kìⁿ ê; gōan chun-kùi kap éng-óan ê kôan-sè kui tī I. À-bēng.

17

Kim-sè hó-gia̍h ê lâng lí tio̍h hoan-hù in, sim-chì bo̍h-tit chū-ko, bo̍h-tit hē in ê ǹg-bāng tī bô tiāⁿ-tio̍h ê chîⁿ-châi, tio̍h hē tī chiong bān mı̍h móa-móa hō͘ lán hióng-siū ê Siōng-tè;

18

koh hoan-hù in kiâⁿ hó sū, hó-gia̍h tī hó só͘ kiâⁿ, hoaⁿ-hí chín-chè, kam-gōan pun hō͘ lâng,

19

ūi-tio̍h ka-kī chek-chū hó ê tōe-ki, pī-pān āu-lâi ê sū, hō͘ in khîⁿ-tiâu chin ê o̍ah-miā.

20

Thê-mô͘-thài ah, só͘ kau-thok lí ê, lí tio̍h pó-siú i, lī-khui ū miâ bô sı̍t ê tì-hūi chiah ê chho͘-sio̍k ê hu-sû, kap saⁿ pí-kàu ê piān-lūn,

21

ū lâng chū-chheng ū chit hō tì-hūi, chiū í-keng chha-biū tō-lí lah. Gōan un-tián kap lín tī-teh.4