Thê-mô͘-thài hō͘ 第 1 章 - 巴克禮全羅

1

Tùi Siōng-tè ê chí-ì, chiàu tī Ki-tok Iâ-so͘ o̍ah-miā ê èng-ún, chòe Ki-tok Iâ-so͘ ê sù-tô͘ Pó-lô,

2

phoe kià hō͘ góa só͘ thiàⁿ ê kiáⁿ Thê-mô͘-thài; gōan lí tùi Pē Siōng-tè kap lán ê Chú Ki-tok Iâ-so͘ tit-tio̍h un-tián, lîn-bín, pêng-an.

3

Góa kám-siā Siōng-tè, chiū-sī góa sòa-chiap lia̍t-chó͘, ēng chheng-khì ê liông-sim só͘ ho̍k-sāi ê, tī kî-tó ê sî góa siàu-liām lí bô soah,

4

kì-tit lí ê lâu ba̍k-sái, mî-jı̍t him-bō͘ kìⁿ-tio̍h lí, hō͘ góa móa-sim hoaⁿ-hí;

5

liām-tio̍h lí sim-lāi bô ké ê sìn, chit ê sìn sī tāi-seng tiàm-tī lí ê gōa-má Lô-í, kap lí ê lāu-bú Iú-nî-ki, góa chhim sìn chit ê sìn iā sī tiàm-tī lí.

6

Ūi-tio̍h chit ê iân-kò͘ góa tiám-chhíⁿ lí, ài lí chiong Siōng-tè tùi góa ê hōaⁿ chhiú só͘ hō͘ lí ê un-sù koh hùn-chì, chhin-chhiūⁿ hō͘ hé koh iām chı̍t iūⁿ.

7

In-ūi Siōng-tè só͘ siúⁿ-sù lán ê, m̄ sī kiaⁿ-hiâⁿ ê sim-sîn, chiū-sī kôan-lêng, jîn-ài, siú-kí ê sim-sîn.

8

Só͘-í kā lán ê Chú chòe kan-chèng, bo̍h-tit lia̍h-chòe kiàn-siàu, iā bo̍h-tit lia̍h góa chòe Chú ê siû-hōan lâi kiàn-siàu; tio̍h chiàu Siōng-tè ê kôan-lêng ūi-tio̍h hok-im saⁿ-kap siū-khó͘;

9

I kiù lán, ēng sèng ê tiàu tiàu lán, m̄ sī chiàu lán ê kiâⁿ-chòe, sī chiàu I ka-kī ê chí-ì kap un-tián, chit ê un-tián chiū-sī éng sè-tāi ê tāi-seng tī Ki-tok Iâ-so͘ siúⁿ-sù lán ê,

10

nā-sī hiān-kim tùi lán ê Kiù-chú Ki-tok Iâ-so͘ ê hián-hiān lâi piáu-bêng ê. I í-keng hòe-bô sí, koh tùi hok-im hō͘ o̍ah-miā kap bōe pāi-hōai ê lóng hián-bêng;

11

góa ūi-tio̍h chit-ê siū siat-lı̍p chòe soan-thôan ê, chòe sù-tô͘, chòe kàu-su.

12

Ūi-tio̍h chit ê iân-kò͘ góa iā siū chiah ê kan-khó͘; nā-sī góa bô lia̍h-chòe kiàn-siàu; in-ūi góa bat góa só͘ sìn ê, iā chhim sìn I ōe pó-siú góa só͘ kau-thok I ê, kàu tī hit jı̍t.

13

Lí tùi góa só͘ thiaⁿ-kìⁿ hiah ê toan-chèng ê ōe ê bô͘-iūⁿ, tio̍h ēng tī Ki-tok Iâ-so͘ ê sìn kap jîn-ài lâi chip-siú i.

14

Só͘ kau-thok lí ê hó-sū, lí tio̍h óa-khò tiàm-tī lán ê Sèng Sîn lâi kò͘-siú i.

15

Hōan-nā tī A-se-a ê lâng í-keng pōe góa, che sī lí só͘ chai; kî-tiong ū Hui-kiat-lō͘ Hek-mô͘-kî-nî.

16

Gōan Chú lîn-bín O-nî-sek-hut ê ke, in-ūi i ta̍uh-ta̍uh pó͘ góa ê cheng-sîn, iā bô lia̍h góa kòa thih-liān chòe kiàn-siàu.

17

I tī Lô-má ê sî un-khûn chhē góa kàu kìⁿ-tio̍h,

18

(gōan Chú hō͘ i tī hit jı̍t tùi Chú lâi tit-tio̍h lîn-bín); iā i tī Í-hut-só͘ ēng jōa chōe hāng ho̍k-sāi góa, lí iā bêng-bêng chai.