Thiap-sat-lô-nî-ka chiân 第 4 章 - 巴克禮全羅

1

Hiaⁿ-tī ah, kiat-bé lâi kóng, góan tī Chú Iâ-so͘ kiû lín khǹg lín, chiàu lín chêng só͘ bat tùi góan siū, tio̍h cháiⁿ-iūⁿ kiâⁿ lâi hō͘ Siōng-tè hoaⁿ-hí ê, lín í-keng teh kiâⁿ, taⁿ tio̍h koh khah chhut-la̍t kiâⁿ.

2

In-ūi lín chai góan tùi Chú Iâ-so͘ ū sím-mı̍h bēng-lēng hō͘ lín.

3

In-ūi Siōng-tè ê chí-ì, chiū-sī lín ê chiâⁿ-sèng, sī ài lín lī-khui îm-lōan.

4

Ài lín ta̍k lâng ōe hiáu-tit ēng sèng-kiat kap chun-kùi siú ka-kī ê seng-khu,

5

bô ēng su-io̍k ê chêng, chhin-chhiūⁿ m̄ bat Siōng-tè ê gōa-pang lâng;

6

tī chit chân sū iā bô kè-kài, chhim-hōan i ê hiaⁿ-tī; in-ūi kìⁿ-nā chit hō sū Chú sī sin-oan ê, chhin-chhiūⁿ góan bat kā lín kóng lâi kan-chèng ê.

7

In-ūi Siōng-tè tiàu lán, m̄ sī tì-kàu ù-òe, chiū-sī tī chiâⁿ-sèng.

8

Só͘-í kū-cho̍at ê m̄ sī kū-cho̍at lâng, sī kū-cho̍at Siōng-tè, chiū-sī ēng I ê Sèng Sîn hō͘ lín ê.

9

Lūn thiàⁿ hiaⁿ-tī m̄ bián siá phoe hō͘ lín, in-ūi lín ka-kī siū-tio̍h Siōng-tè ê kà-sī, hō͘ lín tāi-ke saⁿ-thiàⁿ,

10

sī lín kó-jiân ū kiâⁿ i tī thong Má-kî-tùn ê chèng hiaⁿ-tī. Chóng-sī, hiaⁿ-tī ah, góan khǹg lín tio̍h it-hoat án-ni;

11

iā tio̍h tùi-tiōng thiâm-chēng, lâi chòe ka-kī ê sū, chhin-chhiú chòe lín ê kang, chiàu góan só͘ bat hoan-hù lín ê,

12

hō͘ lín ǹg gōa-bīn lâng toan-chiàⁿ lâi kiâⁿ, iā ka-kī bô só͘ khiàm-kheh.

13

Hiaⁿ-tī ah, lūn-kàu teh khùn ê lâng góan m̄ ài lín m̄ chai, bián-tit lín iu-būn chhin-chhiūⁿ hiah ê bô ǹg-bāng ê lâng chı̍t iūⁿ.

14

In-ūi lán nā sìn Iâ-so͘ ū sí ū koh-o̍ah, chiū sio̍k Iâ-so͘ lâi khùn ê lâng, Siōng-tè iā beh án-ni chhōa in kap Iâ-so͘ saⁿ-kap lâi.

15

In-ūi góan hōng Chú ê bēng-lēng, ēng chit-ê kā lín kóng, chiū-sī Chú koh lâi ê sî, lán chiah-ê iáu o̍ah-teh ê lâng, bōe-ōe tāi-seng hiah ê teh khùn ê lâng.

16

In-ūi Chú beh pún-sin tùi thiⁿ lo̍h-lâi, ū tōa âu-kiò, ū chì tōa thiⁿ-sài ê siaⁿ, iā ū Siōng-tè ê sàu-kak, chiū hiah ê sio̍k Ki-tok í-keng sí ê lâng beh tāi-seng khí-lâi.

17

Āu-lâi lán iáu o̍ah-teh ê lâng beh kap in siū chiap-la̍p tī hûn-lāi, jı̍p khong-tiong ngiâ-chih Chú; án-ni lán chiū éng-óan kap Chú saⁿ-kap tī-teh.

18

Só͘-í tio̍h ēng chiah ê ōe saⁿ an-ùi.