Thiap-sat-lô-nî-ka chiân 第 5 章 - 巴克禮全羅

1

Hiaⁿ-tī ah, lūn-kàu sî-kî m̄ bián siá phoe hō͘ lín.

2

In-ūi lín ka-kī siông-sè chai, Chú ê jı̍t kàu chhin-chhiūⁿ chha̍t thàu mî lâi.

3

Lâng tng teh kóng, Pêng-an ún-tàng ê sî, chai-ē hut-jiân kàu tī in, chhin-chhiūⁿ siⁿ kiáⁿ ê kan-khó͘ kàu tī ū sin-īn ê hū-jîn-lâng chı̍t iūⁿ, in hiah ê lâng bōe-ōe cháu-lī.

4

Nā-sī hiaⁿ-tī ah, lín m̄ sī tī àm ê tiong-kan, tì-kàu hit jı̍t chhin-chhiūⁿ chha̍t lâi jip-tio̍h lín.

5

In-ūi lín lóng sī kng-bêng ê lâng, jı̍t-sî ê lâng; lán m̄ sī sio̍k tī mî-sî ê, iā m̄ sī o͘-àm ê.

6

Só͘-í lán m̄ thang chhin-chhiūⁿ kî-û ê lâng teh khùn; tio̍h kéng-séng chiat-chè.

7

In-ūi khùn ê lâng sī mî-sî khùn, chiú-chùi ê lâng sī mî-sî chùi.

8

Nā-sī lán sio̍k jı̍t-sî ê tio̍h chiat-chè, chhēng sìn kap jîn-ài chòe hō͘-sim-kiàⁿ, ēng tit kiù ê ǹg-bāng chòe thâu-khoe.

9

In-ūi Siōng-tè tiāⁿ-tio̍h lán m̄ sī lâi tú-tio̍h siū-khì, chiū-sī beh tùi lán ê Chú Iâ-so͘ Ki-tok lâi tit-tio̍h kiù.

10

I thòe lán sí, hō͘ lán he̍k-sī chhíⁿ he̍k-sī khùn, kap I tâng o̍ah.

11

Só͘-í tio̍h saⁿ an-ùi, tāi-ke saⁿ kiàn-lı̍p tek-hēng, chiàu lín só͘ teh chòe ê.

12

Hiaⁿ-tī ah, góan kiû lín, hōan-nā tī lín tiong-kan tio̍h-bôa, tiàm-tī Chú tī-lí lín, kéng-kài lín ê, lín tio̍h bat i,

13

ūi-tio̍h in só͘ chòe ê kang, lín tio̍h tī jîn-ài tōa-tōa chun-kèng in. Lín tāi-ke tio̍h hô-bo̍k.

14

Hiaⁿ-tī ah, góan khǹg lín tio̍h kéng-kài hiah ê bô hoat-tō͘ ê, an-ùi hiah ê lóe-chì ê, hû-chhî hiah ê lóan-jio̍k ê, ēng khoan-iông khóan-thāi chèng lâng.

15

Kín-sīn bo̍h-tit ēng pháiⁿ pò pháiⁿ; he̍k-sī tāi-ke saⁿ khóan-thāi, á-sī khóan-thāi chèng lâng, tio̍h siông-siông tui-jip hit ê hó.

16

Tio̍h siông-siông hoaⁿ-hí;

17

tio̍h kî-tó bô soah;

18

hōan sū kám-siā, in-ūi chit-ê sī Siōng-tè tiàm-tī Ki-tok Iâ-so͘ ǹg lín ê chí-ì.

19

M̄ thang phah-hoa Sèng Sîn;

20

m̄ thang khòaⁿ-khin sian-ti ê ōe,

21

hōan sū tio̍h chhat-giām;

22

hó-ê tio̍h chip-siú; tio̍h lī-khui ta̍k iūⁿ ê pháiⁿ.

23

Gōan pêng-an ê Siōng-tè ka-kī hō͘ lín it-chīn chiâⁿ-sèng; koh gōan lín ê sîn kap hûn í-kı̍p seng-khu tī lán ê Chú Iâ-so͘ Ki-tok koh-lâi ê sî, lóng tit-tio̍h pó-chôan, bô thang hiâm.

24

Tiàu lín ê sī sìn-sı̍t, I iā beh chiâⁿ i.

25

Hiaⁿ-tī ah, tio̍h thòe góan kî-tó.

26

Tio̍h ēng sèng ê saⁿ-chim lâi chhéng-an lóng-chóng ê hiaⁿ-tī.

27

Góa kí Chú lâi hoan-hù lín, ēng chit tiuⁿ phoe tha̍k hō͘ chèng hiaⁿ-tī thiaⁿ.

28

Gōan lán ê Chú Iâ-so͘ Ki-tok ê un-tián kap lín tī-teh.4