Ko-Lîm-to hō͘ 第 10 章 - 巴克禮全羅

1

Góa Pó-lô, saⁿ kìⁿ-bīn ê sî chiū tī lín tiong-kan chòe pi-bî, saⁿ lī-khui ê sî chiū ǹg lín chòe hó-táⁿ ê, taⁿ ēng Ki-tok ê un-jiû sûn-liông ka-kī khǹg lín;

2

ū lâng phah-sǹg góan sī chiàu jio̍k-thé lâi kiâⁿ, góa phah-sǹg koat-ì tio̍h ēng hó-táⁿ lâi pān in; kiû lín bo̍h-tit hō͘ góa tī saⁿ tùi-bīn ê sî ū chit hō koat-ì ê hó-táⁿ.

3

In-ūi góan sui-jiân tī jio̍k-thé lâi kiâⁿ, m̄ sī chiàu jio̍k-thé lâi kau-chiàn,

4

(in-ūi góan kau-chiàn ê khì-kū m̄ sī sio̍k tī jio̍k-thé, sī tī Siōng-tè ê bīn-chêng ū khùi-la̍t kàu-gia̍h thang lâi kong-phòa chiah ê kian-kò͘ ê iâⁿ-chē),

5

hōan-nā chiah ê kè-bô͘, í-kı̍p lóng-chóng kôaiⁿ-kôaiⁿ ê mı̍h, só͘ kú-khí lâi chó͘-tòng lâng bat Siōng-tè ê, góan lóng húi-hōai i, chiong lóng-chóng ê liām-thâu lia̍h lâi hō͘ i sūn-ho̍k Ki-tok;

6

koh í-keng pī-pān piān, thèng-hāu lín ôan-chôan sūn-ho̍k, chiah lâi chek-ho̍at lóng-chóng ê bô sūn-ho̍k ê.

7

Lín khòaⁿ ba̍k-chêng ah. Nā ū lâng khò ka-kī sī sio̍k Ki-tok ê, i tio̍h koh ka-kī siūⁿ, khòaⁿ i cháiⁿ-iūⁿ sio̍k Ki-tok, góan iā sī án-ni.

8

Chú só͘ siúⁿ-sù góan ê kôan sī beh kiàn-lı̍p lín, m̄ sī beh pāi-hōai lín, góan chiū nā ūi-tio̍h chit ê kôan lio̍h-á kè-thâu khoa-kháu, iā put-tì kiàn-siàu;

9

bián-tit góa chhin-chhiūⁿ ēng phoe hō͘ lín kiaⁿ.

10

In-ūi ū lâng kóng, I ê phoe tēng-tiōng, koh ū la̍t; nā-sī saⁿ tùi-bīn ê sî, seng-khu nńg-chiáⁿ, kóng ōe sio̍h-sio̍h.

11

Hit hō lâng tio̍h siūⁿ, góan saⁿ lī-khui ê sî, phoe-nı̍h kóng ōe sī sím-mı̍h khóan, saⁿ tùi-bīn ê sî chòe sū iā sī án-ni.

12

Ū lâng ka-kī o-ló, góan m̄ káⁿ kap in lia̍h pîⁿ, kap in pí-phēng; nā-sī in ēng ka-kī phoe-phêng ka-kī, iā ēng ka-kī pí-phēng ka-kī, sī bô tì-sek.

13

Nā-sī góan bô beh khoa-kháu kè-hūn ê sū, chiū-sī chiàu Siōng-tè só͘ phài hō͘ góan hān-tiāⁿ ê hūn-gia̍h; chit ê hūn-gia̍h lín iā chāi-lāi.

14

In-ūi góan m̄ sī pôaⁿ-kè hūn, ná chhin-chhiūⁿ m̄ eng-kai kàu tī lín ê; sī góan thôan Ki-tok ê hok-im iā bat kàu tī lín.

15

Góan m̄ sī kè-hūn lâi khoa-kháu pa̍t lâng ê tio̍h-bôa; chiū-sī ǹg-bāng lín sìn ná chhim, chiū góan tī lín tiong-kan chiàu góa ê hūn-gia̍h, ōe khui-khoah kàu móa-chhut-khì,

16

lâi thôan hok-im kàu tī lín kài-gōa ê tōe; bô ēng pa̍t lâng hūn-lāi í-keng chòe piān ê sū lâi khoa-kháu.

17

Khoa-kháu ê lâng tio̍h ēng Chú lâi khoa-kháu.

18

In-ūi m̄ sī ka-kī o-ló ê lâng chiūⁿ chhú, chiū-sī Chú só͘ o-ló ê chiūⁿ chhú.