Ko-Lîm-to hō͘ 第 11 章 - 巴克禮全羅

1

Gōan lín iông-ún góa sió-khóa ê gōng; kî-sı̍t lín bô m̄ iông-ún góa.

2

In-ūi góa chiong Siōng-tè ê jia̍t-sim, ūi-tio̍h lín lâi jia̍t-sim; in-ūi góa bat phèng-tiāⁿ lín hō͘ chı̍t ê tiōng-hu, beh chiong lín chòe cheng-chiat ê chāi-sek-lú, hiàn hō͘ Ki-tok.

3

Chóng-sī góa kiaⁿ-liáu lín ê sim-su pāi-hōai, bô sûn-chôan chheng-kiat lâi ǹg Ki-tok, chhin-chhiūⁿ chôa ēng i ê khúi-khiat ín-iú Hā-oa chı̍t iūⁿ.

4

Nā ū lâng lâi thôan pa̍t ê Iâ-so͘, góan só͘ bē bat thôan ê, á-sī lín siū-tio̍h koh-iūⁿ ê sîn, chêng só͘ bē bat siū-tio̍h ê, á-sī koh-iūⁿ ê hok-im, chêng só͘ bē bat sêng-siū ê, lín iông-ún i, hó.

5

In-ūi góa phah-sǹg góa lóng bô khah su tī hiah ê siōng-téng ê sù-tô͘.

6

Góa kóng-ōe sui-jiân sio̍h-sio̍h, nā sī tì-sek kú m̄ sī án-ni; in-ūi góan hōan sū ū tùi lín hián-bêng chit-ê tī chèng lâng tiong.

7

Á-sī góa ka-kī khut-kē, hō͘ lín seng kôaiⁿ, bô the̍h só͘-hùi, pe̍h-pe̍h thôan Siōng-tè ê hok-im hō͘ lín, che kiám sī hōan-chōe mah?

8

Góa chhiúⁿ pa̍t ê kàu-hōe, the̍h in ê sok-siu, lâi ho̍k-sāi lín.

9

Góa kap lín tī-teh ê sî ēng bô kàu, bē bat liân-lūi-tio̍h lín chı̍t lâng; in-ūi tùi Má-kî-tùn lâi ê hiaⁿ-tī pó͘-chiok góa ê khiàm-kheh; góa hōan sū ka-kī siú, bô thoa-thūi lín; āu-lâi iā beh ka-kī siú.

10

Ki-tok ê chin-sı̍t kì-jiân tī góa chiū tī A-kai-a chiah ê tōe-hng, bô lâng ōe chó͘-chí góa chit hō ê khoa-kháu.

11

Sī sím-mı̍h iân-kò͘? sī góa bô thiàⁿ lín mah? Siōng-tè chai lah.

12

Chóng-sī góa só͘ kiâⁿ ê iû-gôan beh kiâⁿ i, beh cho̍at-tn̄g hiah ê chhē ki-hōe ê lâng ê ki-hōe, hō͘ in tī in só͘ khoa-kháu ê, kiù-kèng kap góan bô koh-iūⁿ.

13

In-ūi hit hō lâng sī ké sù-tô͘, kiâⁿ tāi-chì kan-chà, ka-kī chng-chòe Ki-tok ê sù-tô͘.

14

Che iā bô kî-kòai; in-ūi Sat-tàn iā ka-kī chng-chòe kng-bêng ê thiⁿ-sài.

15

Só͘-í i ê chhe-ēng ka-kī chng chhin-chhiūⁿ gī ê chhe-ēng, che iā m̄ sī tōa sū. In ê kiat-kio̍k beh chiàu in ê só͘ kiâⁿ.

16

Góa koh kóng, lâng m̄ thang khòaⁿ góa chòe gōng; chóng-sī nā án-ni, chiū tio̍h iû-gôan chiap-la̍p góa chhin-chhiūⁿ gōng, hō͘ góa iā thang lio̍h-lio̍h-á khoa-kháu.

17

Góa taⁿ só͘ kóng ê m̄ sī chiàu Chú lâi kóng; sī chhin-chhiūⁿ gōng, tōa táⁿ lâi khoa-kháu.

18

Kì-jiân ū chōe-chōe lâng chiàu jio̍k-thé lâi khoa-kháu, chiū góa iā beh khoa-kháu.

19

Lín kì-jiân sī tì-sek ê lâng, chiū hoaⁿ-hí iông-ún gōng ê lâng.

20

Siat-sú ū lâng khóan-thāi lín chòe lô͘-po̍k, thun-kā lín, lia̍h lín, chū-ko, siàn lín ê bīn, lín chiū iông-ún i.

21

Góa kóng án-ni sī bô thé-biān, ná chhin-chhiūⁿ góan chêng sī nńg-chiáⁿ. Chóng-sī lâng tī sím-mı̍h tāi-chì hó-táⁿ, góa iā hó-táⁿ; góa kóng chit kù sī gōng ōe.

22

In sī Hi-pek-lâi lâng mah? góa iā sī. In sī Í-sek-lia̍t lâng mah? góa iā sī. In sī A-pek-la̍h-hán ê hō͘-è mah? góa iā sī.

23

In sī Ki-tok ê chhe-ēng mah? góa koh khah sī; (góa chhin-chhiūⁿ kông teh kóng) Góa tio̍h-bôa iáu khah chōe, koaiⁿ-lo̍h kaⁿ iā khah chōe, siū phah kàu bōe sǹg tit, chōe-chōe pái hiám-hiám sí.

24

Góa hō͘ Iû-thài lâng phah gō͘ pái, múi pái sì-cha̍p ē kiám chı̍t ē.

25

Saⁿ pái siū kóaiⁿ-á phah, chı̍t pái siū-tio̍h chio̍h-thâu tìm, saⁿ pái tú-tio̍h chûn-phòa, chı̍t jı̍t chı̍t mî tī chhim hái;

26

siông-siông le̍k-lō͘, tú-tio̍h kang-hô ê gûi-hiám, chha̍t-bé ê gûi-hiám, pún-cho̍k ê gûi-hiám, gōa-pang ê gûi-hiám, siâⁿ-lāi ê gûi-hiám, khòng-iá ê gûi-hiám, hái-bīn ê gûi-hiám, ké hiaⁿ-tī ê gûi-hiám;

27

siū lô-lo̍k kap kan-khó͘ ta̍uh-ta̍uh bô khùn, iau kòa chhùi-ta, ta̍uh-ta̍uh bô chia̍h, kôaⁿ kòa thǹg-pak-theh.

28

Tû-khì chiah ê gōa-sū, iáu ū chı̍t hāng ta̍k jı̍t teh góa, chiū-sī thòe chèng kàu-hōe khòa-lū.

29

Chī-chūi lóan-jio̍k, iā góa bô sòa lóan-jio̍k ah? Chī-chūi tio̍h-tak, iā góa ê sim bô chhin-chhiūⁿ hé to̍h ah?

30

Góa nā put-tek-put tio̍h khoa-kháu, chiū beh khoa-kháu koan-hē góa lóan-jio̍k ê sū.

31

Chú Iâ-so͘ ê Siōng-tè iā sī I ê Pē, éng-óan thang o-ló ê, chai góa bô pe̍h-chha̍t.

32

Tī Tāi-má-sek A-lí-ta̍t ông só͘ siat ê tōe-hng koaⁿ pé-siú Tāi-má-sek lâng ê siâⁿ beh lia̍h góa;

33

nā-sī góa tùi thang-á, ēng kheng tùi siâⁿ-chhiûⁿ hō͘ lâng lūi-lo̍h-khì, thoat-lī i ê chhiú.