Ko-Lîm-to hō͘ 第 2 章 - 巴克禮全羅

1

Góa bat ka-kī koat-tòan bô koh ēng iu-būn chiū-kūn lín.

2

In-ūi góa nā hō͘ lín iu-būn, chiū góa só͘ hō͘ i iu-būn ê í-gōa, chī-chūi hō͘ góa hoaⁿ-hí ah?

3

Chêng góa siá hit-ê hō͘ lín, bián-tit góa lâi ê sî, só͘ eng-kai hō͘ góa hoaⁿ-hí ê hóan-tńg hō͘ góa iu-būn; in-ūi góa chhim sìn lín chèng lâng lóng lia̍h góa ê hoaⁿ-hí chòe lín chèng lâng ê.

4

Chêng góa sim-lāi khó͘-thàng pek-chhiat, lâu chōe-chōe ba̍k-sái siá phoe hō͘ lín, m̄ sī beh hō͘ lín iu-būn, sī beh hō͘ lín chai góa ê thiàⁿ lín sī chin tōa.

5

Nā ū hō͘ lâng iu-būn ê, i m̄ sī hō͘ góa iu-būn nā-tiāⁿ, iā tāi-lio̍k sī hō͘ lín chèng lâng iu-būn, bián-tit góa chek-pī siuⁿ tāng.

6

Chhin-chhiūⁿ chit hō lâng tùi hiah chōe lâng só͘ siū ê chek-ho̍at í-keng kàu-gia̍h.

7

Só͘-í hóan-tńg m̄ ta̍t-tio̍h sià-bián i, an-ùi i; kiaⁿ-liáu hit hō lâng iu-būn kè-thâu tì-kàu cho̍at-bāng.

8

Só͘-í góa khǹg lín, ēng sı̍t-sı̍t ê pîn-kù tùi i hián-bêng lín ê jîn-ài.

9

In-ūi án-ni góa iā bat siá phoe lâi chhì-giām lín, khòaⁿ lín hōan sū sūn-thàn á bô.

10

Lín sià-bián lâng sím-mı̍h, góa iā sià-bián i; in-ūi góa só͘ ū sià-bián ê, nā ū sià-bián sím-mı̍h, sī ūi-tio̍h lín tī Ki-tok ê bīn-chêng lâi sià-bián ê;

11

bián-tit lán hō͘ Sat-tàn khah phiⁿ-thâu khì; in-ūi lán m̄ sī m̄ chai i ê kè-bô͘.

12

Chêng góa ūi-tio̍h Ki-tok ê hok-im kàu Te̍k-lô-a, Chú iā kā góa khui mn̂g;

13

nā-sī bô tú-tio̍h góa ê hiaⁿ-tī Thê-to, só͘-í góa ê sim-sîn bô pêng-an; chiū lī-pia̍t in khì Má-kî-tùn.

14

Taⁿ kám-siā Siōng-tè, siông-siông tī Ki-tok tek-sèng, lâi chòe-thâu chhōa góan, iā ēng góan tī ta̍k só͘-chāi hián-bêng hit ê tùi bat Ki-tok chiah ū ê khì-bī.

15

In-ūi tùi tī Siōng-tè góan tī tit kiù ê lâng ê tiong-kan í-kı̍p tîm-lûn ê lâng ê tiong-kan, chòe Ki-tok ê phang-bī.

16

Tùi chiah ê lâng sī chòe tùi sí tì-kàu sí ê bī; tùi hiah-ê sī chòe o̍ah tì-kàu o̍ah ê bī. Chiah ê sū chī-chūi ōe kham-tit tng?

17

In-ūi góan bô chhin-chhiūⁿ chōe-chōe lâng hūn-cha̍p Siōng-tè ê tō-lí; chiū-sī ēng sêng-sı̍t tùi Siōng-tè, tī Siōng-tè ê bīn-chêng tiàm-tī Ki-tok lâi kóng.