Ko-Lîm-to hō͘ 第 1 章 - 巴克禮全羅

1

Tùi Siōng-tè ê chí-ì chòe Ki-tok Iâ-so͘ ê sù-tô͘ Pó-lô, kap hiaⁿ-tī Thê-mô͘-thài, phoe kià hō͘ Siōng-tè ê kàu-hōe tī Ko-lîm-to ê, í-kı̍p piàn A-kai-a lóng-chóng ê sèng-tô͘;

2

gōan lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

3

Gōan lán ê Chú Iâ-so͘ Ki-tok ê Siōng-tè, iā sī I ê Pē, chiū-sī lîn-bín ê Pē, siúⁿ-sù ta̍k iūⁿ an-ùi ê Siōng-tè, tit-tio̍h o-ló.

4

Góan tī ta̍k iūⁿ hōan-lān tiong, I an-ùi góan, beh hō͘ góan tùi Siōng-tè só͘ an-ùi góan ê an-ùi, lâi an-ùi ta̍k iūⁿ hōan-lān tiong ê lâng.

5

In-ūi chhin-chhiūⁿ Ki-tok ê kan-khó͘ móa-chhut-lâi kàu tī góan, góan ê an-ùi iā tùi Ki-tok móa-móa.

6

Góan he̍k-sī siū hōan-lān, sī beh chòe lín siū an-ùi kap tit kiù ê lō͘-ēng; he̍k-sī siū an-ùi, sī beh chòe lín siū an-ùi ê lō͘-ēng, chit ê an-ùi hō͘ lín ōe thun-lún kan-khó͘, chiàu góan só͘ tú-tio̍h ê chı̍t iūⁿ.

7

Koh góan só͘ thòe lín ǹg-bāng ê sī kian-kò͘, in-ūi chai lín kì-jiân ū hūn tī chiah ê kan-khó͘, chiū ū hūn tī an-ùi, iā sī án-ni.

8

Hiaⁿ-tī ah, lūn-kàu góan tī A-se-a só͘ tú-tio̍h ê hōan-lān, góan m̄ ài lín m̄ chai; sī siū teh-tāng chin thiám kàu tng bōe khí, liân o̍ah iā bô ǹg-bāng;

9

góan ka-kī sim-lāi iā àn-sǹg ōe sí; beh hō͘ góan bô óa-khò ka-kī, to̍k-to̍k óa-khò hō͘ sí-lâng koh-o̍ah ê Siōng-tè;

10

I í-keng kiù góan thoat-lī hiah tōa ê sí-bô, koh beh kiù góan; góan iā ǹg-bāng I iáu beh kiù góan;

11

lín iā ēng kî-tó lâi pang-chān góan, beh hō͘ chōe-chōe lâng in-ūi góan lâi kám-siā, chiū-sī ūi-tio̍h góan tùi chōe-chōe lâng kî-tó só͘ tit-tio̍h ê un.

12

In-ūi góan só͘ khoa-kháu ê, góan ê liông-sim iā chòe góan ê kan-chèng, chiū-sī góan chiàu Siōng-tè ê sèng-kiat kap sêng-sı̍t, m̄ sī ēng jio̍k-thé ê tì-hūi, sī ēng Siōng-tè ê un, óng-lâi tī sè-kan, tùi lín koh khah sī án-ni.

13

In-ūi góan só͘ siá hō͘ lín ê bô pa̍t hāng, to̍k-to̍k lín só͘ tha̍k só͘ jīn ê, góa iā ǹg-bāng lín kàu bé beh jīn i;

14

chhin-chhiūⁿ lín tiong-kan ū lâng jīn góan, tī lán ê Chú Iâ-so͘ ê jı̍t, lia̍h góan chòe lín ê khoa-kháu, chhin-chhiūⁿ góan iā lia̍h lín chòe góan ê khoa-kháu.

15

Góa in-ūi sìn án-ni, pún gī-tiāⁿ beh tāi-seng chiū-kūn lín, hō͘ lín têng-chài tit-tio̍h lī-ek;

16

iā ài tùi lín hia keng-kè khì Má-kî-tùn, koh tùi Má-kî-tùn khì lín hia, hō͘ lín sàng góa khì Iû-thài.

17

Góa í-keng gī-tiāⁿ án-ni, kiám ū ēng phû-phiò mah? á-sī góa só͘ gī-tiāⁿ ê sī chiàu jio̍k-thé lâi gī-tiāⁿ, tì-kàu góa ū hit ê Sī, sī, ia̍h ū hit ê M̄ sī, m̄ sī mah?

18

Siōng-tè sī sìn-sı̍t, án-ni góan só͘ tùi lín kóng ê ōe iā bô ū Sī kap M̄ sī.

19

In-ūi tùi góan chiah-ê, chiū-sī tùi góa kap Se-lah Thê-mô͘-thài, tī lín tiong-kan só͘ thôan Siōng-tè ê Kiáⁿ Iâ-so͘ Ki-tok bô ū Sī kap M̄ sī, chāi-tī I chí ū Sī nā-tiāⁿ.

20

In-ūi Siōng-tè só͘ èng-ún ê, bô lūn jōa chōe, chāi-tī I lóng ū Sī; só͘-í À-bēng iā sī tùi I, hō͘ Siōng-tè tùi lán tit-tio̍h êng-kng.

21

Taⁿ kian-kò͘ góan kap lín tī Ki-tok, koh ēng iû boah lán ê, sī Siōng-tè;

22

I iā kā lán khàm-ìn, koh siúⁿ-sù Sîn tī lán ê sim chòe tiāⁿ.

23

Góa kí góa ê o̍ah-miā kiû Siōng-tè chòe kan-chèng, góa bô koh kàu Ko-lîm-to sī in-ūi khoan-iông lín.

24

M̄ sī góan kóan-hat lín ê sìn, sī pang-chān lín ê hoaⁿ-hí; in-ūi lín tùi sìn lâi khiā-chāi.