Ko-Lîm-to hō͘ 第 4 章 - 巴克禮全羅

1

Só͘-í góan kì-jiân ū chit ê chit-hūn, chiàu só͘ tit-tio̍h ê lîn-bín, chiū bô lóe-chì.

2

Sī ū khì-sak kiàn-siàu ê àm-sū, bô kiâⁿ tī khúi-khiat, bô hūn-cha̍p Siōng-tè ê tō-lí, chiū-sī hián-bêng chin-lí, tī Siōng-tè ê bīn-chêng, chiong ka-kī chèng-bêng tī ta̍k lâng ê liông-sim.

3

Nā góan ê hok-im ū só͘ jia-khàm, chiū-sī jia-khàm tī tîm-lûn ê lâng.

4

Tī in tiong-kan chit sè-kài ê Siōng-tè hō͘ m̄ sìn ê lâng ê sim chhiⁿ-mî, bián-tit Ki-tok êng-hián ê hok-im ê kng chiò in; Ki-tok chiū-sī Siōng-tè ê siōng.

5

In-ūi góan bô thôan ka-kī, sī thôan Ki-tok Iâ-so͘ chòe Chú, iā pún-sin ūi-tio̍h Iâ-so͘ chòe lín ê lô͘-po̍k.

6

In-ūi Siōng-tè bat kóng, Kng tio̍h tùi àm-nı̍h chhut-lâi ê, I iā ū chiò tī góan ê sim, hō͘ góan tùi bat Siōng-tè ê êng-hián, chiū-sī tùi Iâ-so͘ Ki-tok hián-bêng ê, lâi tit-tio̍h kng.

7

Nā-sī góan ū chit hō pó-pòe khǹg tī thô͘ ê khì-kū, sī beh hō͘ ke̍k tōa ê kôan-lêng chòe Siōng-tè ê, m̄ sī chhut tī góan.

8

Góan hōan sū siū hōan-lān, nā-sī bô khùn-pek; ûi-lân, iā bô sit-bāng;

9

tú-tio̍h khún-tio̍k, iā bô siū pàng-sak; siū phah-tó, iā bô sí-bô;

10

seng-khu siông-siông tòa Iâ-so͘ ê sí, hō͘ Iâ-so͘ ê o̍ah iā ōe hián-bêng tī góan ê seng-khu.

11

In-ūi góan chiah ê o̍ah ê ta̍uh-ta̍uh ūi-tio̍h Iâ-so͘ lâi kau-hù tī sí, hō͘ Iâ-so͘ ê o̍ah iā ōe hián-bêng tī góan ōe sí ê jio̍k-thé.

12

Án-ni chiū sí ê la̍t teh kiâⁿ tī góan, o̍ah ê la̍t teh kiâⁿ tī lín.

13

Chóng-sī góan í-keng ū chit ê sìn ê sîn, tú-tú chiàu só͘ kì-chài kóng, Góa ū sìn, só͘-í ū kóng; góan iā sìn, só͘-í iā kóng.

14

Ka-kī chai hō͘ Chú Iâ-so͘ koh-o̍ah ê iā beh hō͘ góan kap Iâ-so͘ koh-o̍ah, koh beh ín-chìn góan kap lín saⁿ-kap khiā tī I ê bīn-chêng.

15

In-ūi bān hāng sū lóng sī ūi-tio̍h lín; beh hō͘ un-tián tùi lâng ná chōe lâi ná ke-thiⁿ, chiū hō͘ kám-siā it-hoat chhiong-móa, tì-kàu Siōng-tè tit-tio̍h êng-kng.

16

Só͘-í góan bô lóe-chì; góan ê gōa-thé sui-jiân pāi-hōai, nā-sī góan ê lāi-sim jı̍t-jı̍t ōaⁿ sin.

17

In-ūi góan ba̍k-nih-kú khin-khin ê kan-khó͘ sī kā góan chiâⁿ siōng-téng-siōng éng-óan ê tōa êng-kng;

18

in-ūi góan m̄ sī khòaⁿ tī só͘ ōe khòaⁿ-kìⁿ ê, sī khòaⁿ tī só͘ bōe khòaⁿ-kìⁿ ê; in-ūi só͘ ōe khòaⁿ-kìⁿ ê sī chiām-sî, só͘ bōe khòaⁿ-kìⁿ ê sī éng-óan.