Ko-Lîm-to hō͘ 第 5 章 - 巴克禮全羅

1

In-ūi góan chai góan tī tōe-nı̍h pò͘-pîⁿ ê chhù nā húi-hōai, chiū ū tùi Siōng-tè só͘ khí-chō, m̄ sī lâng ê chhiú só͘ chō ê chhù, sī éng-óan tī thiⁿ-nı̍h ê.

2

In-ūi góan tiàm-tī chit ê pò͘-pîⁿ teh thó͘-khùi, put-chí him-bō͘ góan tùi thiⁿ-nı̍h ê chhù, chhin-chhiūⁿ saⁿ chhēng tha̍h-lo̍h-khì.

3

Nā tit-tio̍h chhēng, chiū bián thǹg-pak-theh.

4

In-ūi góan tiàm-tī chit ê pò͘-pîⁿ ê teh thoa-bôa thó͘-khùi, m̄ sī ài thǹg-khí-lâi, sī ài chhēng tha̍h-lo̍h-khì, tì-kàu hit ê ōe sí ê hō͘ o̍ah thun-lo̍h-khì.

5

Taⁿ pī-pān góan tit-tio̍h chit-ê ê, chiū-sī Siōng-tè. I iā ēng I ê Sîn chòe tiāⁿ hō͘ lán.

6

Só͘-í góan siông-siông hó-táⁿ, chai góan tiàm-tī seng-khu chiū-sī kap Chú saⁿ-lī,

7

(in-ūi góan teh kiâⁿ, sī tùi sìn m̄ sī tùi só͘ khòaⁿ);

8

án-ni góan hó-táⁿ, iā koh khah hoaⁿ-hí lī-khui seng-khu, kap Chú saⁿ-kap tiàm.

9

Só͘-í bô lūn tiàm-tī seng-khu á-sī lī-khui seng-khu, góan só͘ tì-ì ê, sī hō͘ I hoaⁿ-hí.

10

In-ūi lán chèng lâng tek-khak tio̍h hián-bêng tī Ki-tok ê kong-chō chêng, hō͘ ta̍k lâng chiàu i tùi seng-khu só͘ kiâⁿ ê tāi-chì, he̍k-sī hó, he̍k-sī pháiⁿ, lâi siū pò-èng.

11

Só͘-í góan kì-jiân chai Chú ê thang kiaⁿ-ùi, chiū khó͘-khǹg lâng; nā-sī góan í-keng hián-bêng tī Siōng-tè, góa iā ǹg-bāng ū hián-bêng tī lín ê liông-sim.

12

Góan m̄ sī koh ka-kī tùi lín chèng-bêng, chiū-sī hō͘ lín ūi-tio̍h góan ū thang khoa-kháu ê só͘-chāi, thang ìn hiah ê chiàu gōa-māu bô chiàu lāi-sim khoa-kháu ê lâng.

13

In-ūi góan nā kông, sī ūi-tio̍h Siōng-tè; nā chū-chāi, sī ūi-tio̍h lín.

14

In-ūi Ki-tok ê thiàⁿ-thàng chhui-pek góan, sī góan siūⁿ chı̍t lâng thòe chèng lâng sí, chiū-sī chèng lâng sí;

15

koh I thòe chèng lâng sí, sī beh hō͘ chiah ê o̍ah ê lâng í-āu bô ūi-tio̍h ka-kī lâi o̍ah, sī ūi-tio̍h thòe in sí lâi koh-o̍ah ê.

16

Só͘-í góan tùi taⁿ í-āu bô chiàu jio̍k-thé bat lâng; sui-jiân bat chiàu jio̍k-thé bat Ki-tok, taⁿ í-āu bô koh án-ni bat I.

17

Só͘-í lâng nā tiàm-tī Ki-tok, chiū-sī chòe sin chhòng-chō ê, kū ê tāi-chì í-keng kè-khì, taⁿ lóng pìⁿ-chiâⁿ sin ê.

18

Koh bān hāng sū lóng sī chhut tī Siōng-tè, I tùi Ki-tok hō͘ lán kap I koh hô, iā chiong chit ê khǹg lâng kap Siōng-tè koh hô ê chit-hūn hō͘ góan;

19

chiū-sī Siōng-tè tiàm-tī Ki-tok hō͘ sè-kan kap I koh hô, bô chiong in ê chōe-kòa kui tī in; iā chiong koh hô ê tō-lí kau-thok góan.

20

Án-ni góan ūi-tio̍h Ki-tok chòe khim-chhe, chhin-chhiūⁿ Siōng-tè ēng góan khǹg lín; góan ūi-tio̍h Ki-tok kiû lín kap Siōng-tè koh hô;

21

Siōng-tè hō͘ hit ê bô chōe ê thòe lán chiâⁿ-chòe chōe, sī beh hō͘ lán tiàm-tī I lâi chiâⁿ-chòe Siōng-tè ê gī.