Ko-Lîm-to hō͘ 第 6 章 - 巴克禮全羅

1

Góan kap Chú tâng tio̍h-bôa ê ia̍h khǹg lín m̄ thang khang-khang siū Siōng-tè ê un.

2

(In-ūi I kóng, Tī tit-tio̍h chiap-la̍p ê sî góa ū thiaⁿ lí, Tī chín-kiù ê jı̍t góa ū pang-chān lí;lí khòaⁿ, chit tia̍p sī siū chiap-la̍p ê sî, lí khòaⁿ, chit tia̍p sī chín-kiù ê jı̍t)

3

Góan it-khài bô that-gāi lâng, bián-tit chit ê chit-hūn hōan hiâm;

4

chiū-sī hōan sū chèng-bêng pún-sin ha̍p tī chòe Siōng-tè ê chhe-ēng, sī tī chōe-chōe thun-lún, hōan-lān,

5

khiàm-kheh, khùn-pek, siū-phah, koaiⁿ-kaⁿ, jiáu-lōan, tio̍h-bôa, bô khùn, bô chia̍h,

6

liâm-kiat, tì-sek, khoan-iông, jîn-chû, Sèng Sîn ê kám-hòa, bô ké ê thiàⁿ,

7

chin-lí ê tō, Siōng-tè ê kôan-lêng, ēng gī ê chiàn-khì tī chó-iū,

8

bô lūn êng-kng lêng-jio̍k, pháiⁿ miâ-siaⁿ hó miâ-siaⁿ; chhin-chhiūⁿ phiàn lâng ê, kî-sı̍t sī sêng-sı̍t ê;

9

chhin-chhiūⁿ lâng m̄ chai, kî-sı̍t chōe-chōe lâng chai; chhin-chhiūⁿ beh sí, kî-sı̍t sī o̍ah; chhin-chhiūⁿ siū chek-ho̍at, kî-sı̍t bô tì-kàu sí;

10

chhin-chhiūⁿ hôan-ló, kî-sı̍t siông-siông khòai-lo̍k; chhin-chhiūⁿ sòng-hiong, kî-sı̍t hō͘ chōe-chōe lâng pù; chhin-chhiūⁿ bô ū, kî-sı̍t sī bô m̄ ū.

11

Ko-lîm-to lâng ah, góan ǹg lín chhùi khui-khui, sim khoah-khoah.

12

M̄ sī tùi góan hō͘ lín o̍eh-to̍eh, sī tī lín ê sim ka-kī o̍eh-to̍eh.

13

Taⁿ lín tio̍h o̍h chit ê khóan, ka-kī khui-khoah lâi pò-tap góan; góa kóng án-ni, sī chhin-chhiūⁿ tùi ka-kī ê sòe-kiáⁿ lâi kóng.

14

Bo̍h-tit kap m̄ sìn ê lâng chòe phōaⁿ, in-ūi gī kap put-gī ū sím-mı̍h siong-thong? kng kap àm ū sím-mı̍h kau-pôe?

15

Ki-tok kap Pí-lia̍t ū sím-mı̍h hô-ha̍p? sìn kap m̄ sìn ū sím-mı̍h kan-sia̍p?

16

Siōng-tè ê tiān kap ngó͘-siōng ū sím-mı̍h saⁿ-tâng? In-ūi lán sī chin-o̍ah Siōng-tè ê tiān; chhin-chhiūⁿ Siōng-tè ū kóng, Góa beh khiā-khí tī in tiong-kan, kiâⁿ-iû tī in tiong-kan; góa beh chòe in ê Siōng-tè, in iā beh chòe góa ê peh-sìⁿ.

17

Só͘-í chiàu Chú só͘ kóng ê, Lín tio̍h tùi in tiong-kan chhut-lâi, ka-kī hun-piat, Bo̍h-tit bong bô chheng-khì ê mı̍h; Góa chiū chiap-la̍p lín,

18

Góa beh chòe lín ê Pē, Lín beh chòe góa ê kiáⁿ cha-bó͘-kiáⁿ.Che sī chôan-lêng ê Chú kóng ê.