Ko-Lîm-to hō͘ 第 7 章 - 巴克禮全羅

1

Só͘ thiàⁿ ê hiaⁿ-tī ah, kì-jiân ū chiah ê èng-ún, lán tio̍h chheng-khì pún-sin, tû-khì it-chhè jio̍k-thé kap sîn ê lâ-sâm, kiaⁿ-ùi Siōng-tè, lâi ôan-chôan chiâⁿ-sèng.

2

Tio̍h khui-khoah lín ê sim, lâi chiap-la̍p góan. Góan bē bat khek-khui lâng, bē bat sún-hōai lâng, bē bat phiⁿ lâng.

3

Góa kóng án-ni m̄ sī beh chek-chōe lín; in-ūi góa í-keng ū kóng, lín tī góan ê sim-thâu, tâng sí tâng o̍ah.

4

Góa ǹg tī lín tōa hó-táⁿ, góa ūi-tio̍h lín tōa khoa-kháu. Góa móa-sim tit-tio̍h an-ùi; tī góan it-chhè hōan-lān tiong, góa ū kek-gōe ê hoaⁿ-hí.

5

In-ūi góan lâi kàu Má-kî-tùn ê sî, góan ê jio̍k-thé lóng bô pêng-an, hōan sū tú-tio̍h hōan-lān, gōa-bīn ū saⁿ-chiⁿ, lāi-bīn ū kiaⁿ.

6

Chóng-sī an-ùi pi-bî ê lâng ê, chiū-sī Siōng-tè, ēng Thê-to kàu lâi an-ùi góan.

7

M̄ nā ēng i kàu, iā sī ēng i tùi lín só͘ siū ê an-ùi lâi an-ùi góan, in-ūi i chiong lín ê lôan-bō͘, lín ê ai-siong, lín ǹg tī góa ê jia̍t-sim, kā góan kóng, tì-kàu góa it-hoat hoaⁿ-hí.

8

Góa bat ēng phoe hō͘ lín hôan-ló, chêng sui-jiân ū m̄ kè-sim, taⁿ chiū bô lah; in-ūi góa khòaⁿ hit tiuⁿ phoe hō͘ lín hôan-ló ê, put-kò sī chiām-sî.

9

Taⁿ góa hoaⁿ-hí, m̄ sī in-ūi lín hôan-ló, sī in-ūi lín ū tùi hôan-ló tì-kàu hóan-hóe. In-ūi lín hôan-ló sī sūn Siōng-tè, hō͘ lín bô chı̍t hāng tùi góan siū khek-khui.

10

In-ūi sūn Siōng-tè ê hôan-ló siⁿ-chhut hóan-hóe, tì-kàu tit-tio̍h kiù, bô ū āu-lâi ê thè-hóe; nā-sī sè-kan ê hôan-ló sī tì-kàu sí.

11

In-ūi lín khòaⁿ, lín chit ê sūn Siōng-tè ê hôan-ló, tī lín ū siⁿ-chhut jōa tōa ê un-khûn, cháiⁿ-iūⁿ ê ka-kī hun-sò͘, cháiⁿ-iūⁿ ê òan-chhoeh, cháiⁿ-iūⁿ ê kiaⁿ-hiâⁿ, cháiⁿ-iūⁿ ê lôan-bō͘, cháiⁿ-iūⁿ ê jia̍t-sim, cháiⁿ-iūⁿ ê chek-ho̍at. Lín tī chit chân sū í-keng ta̍k hāng piáu-bêng ka-kī sī chheng-khì.

12

Góa chêng sui-bóng siá phoe hó͘ lín, m̄ sī ūi-tio̍h hit ê khek-khui lâng ê, iā m̄ sī ūi-tio̍h hit ê siū khek-khui ê, sī beh hō͘ lín ūi-tio̍h góan ê un-khûn, tī Siōng-tè ê bīn-chêng, tùi lín hián-bêng.

13

Só͘-í góan í-keng siū an-ùi; koh tī an-ùi tiong, in-ūi Thê-to ê hoaⁿ-hí chiū góan ê hoaⁿ-hí it-hoat chhiong-móa, in-ūi i ê sim tùi lín chèng lâng lâi tit-tio̍h an-hioh.

14

Góa nā bat tùi i khoa-kháu lín sím-mı̍h tāi-chì, iā chiū bô kiàn-siàu. In-ūi góan tùi Thê-to só͘ khoa-kháu lín ê ōe sī chin-sı̍t, chhin-chhiūⁿ góan tùi lín só͘ kóng ê ōe iā lóng sī chin-sı̍t.

15

Koh i kì-liām lín lóng sūn-ho̍k, ēng kiaⁿ-hiâⁿ ngia̍uh-ngia̍uh-chhoah chiap-la̍p i, chiū i ê sim it-hoat ǹg tī lín.

16

Taⁿ góa hoaⁿ-hí, in-ūi lūn-kàu lín, góa hōan sū ōe pàng-sim tit.