Ko-Lîm-to hō͘ 第 8 章 - 巴克禮全羅

1

Hiaⁿ-tī ah, góan chiong Siōng-tè só͘ siúⁿ-sù tī Má-kî-tùn chiah ê kàu-hōe ê un pò lín chai,

2

chiū-sī tī hōan-lān tiong siū tōa chhì-liān ê sî, in ê tōa hoaⁿ-hí, kap in ê ke̍k sòng-hiong, ū kek-gōe chiâⁿ in tōa-tōa ê hó-sim.

3

In-ūi góa kan-chèng in ka-kī kam-gōan chiàu in ê le̍k-liōng, koh kè-thâu tī in ê le̍k-liōng,

4

khún-chhiat kiû góan hō͘ in tit-tio̍h chit ê un, lâi saⁿ-kap ū hūn tī ho̍k-sāi sèng-tô͘.

5

Koh m̄ nā chiàu góan só͘ ǹg-bāng, chiū-sī tāi-seng chiong pún-sin hiàn hō͘ Chú, iā tùi Siōng-tè ê chí-ì hiàn hō͘ góan.

6

Só͘-í góan khǹg Thê-to, i kì-jiân ū thê-chhiòng chit ê un-hūi tī lín tiong-kan, chiū tio̍h chiàu án-ni hō͘ i chiâⁿ.

7

Taⁿ lín tī hōan sū, chhin-chhiūⁿ sìn-sim, kháu-châi, tì-sek, lóng-chóng ê jia̍t-sim, í-kı̍p lín ê thiàⁿ góan, chiah ê sū kì-jiân chhiong-móa, chiū tī chit ê un-hūi iā tio̍h chhiong-móa.

8

Góa kóng án-ni, m̄ sī bēng-lēng lín; sī tùi pa̍t lâng ê un-khûn lâi chhì-giām lín jîn-ài ê sı̍t-chāi.

9

In-ūi lín chai lán ê Chú Iâ-so͘ Ki-tok ê un; I pún hó-gia̍h, ūi-tio̍h lín chiâⁿ-chòe sòng-hiong, beh hō͘ lín tùi I ê sòng-hiong lâi chiâⁿ-chòe hó-gia̍h.

10

Góa tī chit chân sū chiong góa ê ì-kiàn hō͘ lín chai; in-ūi che sī lín ê lī-ek; sī lín tùi kū-nî í-keng thê-chhiòng chit ê sū, m̄ nā chòe-chêng kiâⁿ, iā chòe-chêng kam-gōan.

11

Taⁿ tio̍h chòe-chiâⁿ chit ê sū; tì-kàu lín kì-jiân ū jia̍t-sim ê kam-gōan, iā chiàu só͘ ū ê lâi chiâⁿ i.

12

In-ūi í-keng ū chit hō jia̍t-sim, chiū tit-tio̍h chiap-la̍p, sī chiàu lâng só͘ ū ê, m̄ sī chiàu lâng só͘ bô ê.

13

Khiok m̄ sī ài pa̍t lâng liāu-lēng, lín ha̍t-ta̍t, sī ài tit pîⁿ-pîⁿ;

14

hiān-sî chiong lín ū chhun ê pó͘ in ê bô kàu, thang chiong in ū chhun ê pó͘ lín ê bô kàu, án-ni chiah ōe pîⁿ;

15

chiàu só͘ kì-chài kóng, khioh chōe ê bô chhun, khioh chió ê bô khiàm.

16

Kám-siā Siōng-tè hō͘ Thê-to ê sim pîⁿ-pîⁿ ūi-tio̍h lín un-khûn;

17

i khiok iā sī siū góan ê khó͘-khǹg; chóng-sī i pún-jiân chin un-khûn, ka-kī kam-gōan khì chhē lín.

18

Góa iā chhe chı̍t ê hiaⁿ-tī kap i khì, chiū-sī tī hok-im ū hō͘ chèng kàu-hōe o-ló ê;

19

m̄ nā án-ni, iā sī chiah ê kàu-hōe só͘ kéng-sóan kap góan chhut-mn̂g tàu liāu-lí góan só͘ teh pān ê un-hūi, lâi piáu-bêng Chú ê êng-kng kap góan ê kam-gōan;

20

sī tî-hông lâng, ūi-tio̍h góan só͘ liāu-lí ê chōe-chōe gûn lâi hiâm góan;

21

in-ūi góan tô͘-bô͘ hó-sū, m̄ nā tī Chú ê bīn-chêng, iā sī tī lâng ê bīn-chêng.

22

Koh chhe góan ê hiaⁿ-tī chı̍t lâng kap in khì, góan tī chōe-chōe sū bat chōe-chōe pái chhì-giām i, chai i ê un-khûn, taⁿ in-ūi chhim sìn lín, chiū koh khah un-khûn.

23

Lūn-kàu Thê-to, i sī góa ê tâng-phōaⁿ, ūi-tio̍h lín lâi saⁿ-kap tio̍h-bôa ê. Á-sī góan chiah ê hiaⁿ-tī, in sī chiah ê kàu-hōe ê sù-chiá, iā sī Ki-tok ê êng-kng.

24

Só͘-í tī chiah ê kàu-hōe ê bīn-chêng, lín tio̍h tùi in hián-bêng lín ê jîn-ài ê pîn-kù, iā hián-bêng góan ūi-tio̍h lín só͘ khoa-kháu ê sī sı̍t-chāi.