Lia̍t-ông hā-kòan 第 11 章 - 巴克禮全羅

1

A-hap-siā ê lāu-bú, A-tha-lī-ngá, khòaⁿ-kìⁿ i ê kiáⁿ í-keng sí, chiū khí-lâi châu-bia̍t it-chīn ê ông-chhin.

2

Chóng-sī Iok-lâm ông ê cha-bó͘-kiáⁿ, A-hap-siā ê chí-bē, Iok-sī-pa, chiong A-hap-siā ê kiáⁿ, Iok-a-si, tùi hiah ê siū-thâi ê ông kiáⁿ tiong thau-phō chhut-lâi, chiong i kap i ê leng-bú khǹg tī khùn-pâng--nih; in tùi A-tha-lī-ngá khàm-ba̍t i, hō͘ i bô siū thâi.

3

Āu-lâi kap i saⁿ-kap khǹg tī Iâ-hô-hoa ê tiān le̍k-kè la̍k-nî kú; A-tha-lī-ngá kóan-lí hit ê tōe-hng.

4

Kàu tē chhit nî, Iâ-hô-iâ-tāi chhe lâng kiò Ka-lī cho̍k kap hō͘-ōe-peng ê pé-chóng, chhōa in jı̍p Iâ-hô-hoa ê tiān kàu i hia, chiū kap in lı̍p-iok, hō͘ in tī Iâ-hô-hoa ê tiān chiù-chōa, koh ēng ông ê kiáⁿ hō͘ in khòaⁿ.

5

Koh hoan-hù in kóng, Lín tio̍h án-ni kiâⁿ; kìⁿ-nā lín tī an-hioh-jı̍t jı̍p--lâi ê saⁿ-hūn-chı̍t tio̍h kò͘-siú ông-kiong;

6

saⁿ-hūn-chı̍t tio̍h tī So͘-ní ê mn̂g; saⁿ-hūn-chı̍t tio̍h tī hō͘-ōe-peng āu-bīn ê mn̂g; án-ni kò͘-siú ông-kiong, chó͘-chí lâng chhut-jı̍p.

7

Kìⁿ-nā lín tī an-hioh-jı̍t chhut-khì ê nn̄g-hūn tio̍h kò͘-siú Iâ-hô-hoa ê tiān, tī ông ê sì-ûi.

8

Lín ta̍k-lâng chhiú kia̍h ke-si sì-ûi pó-hō͘ ông; kìⁿ-nā lâng jı̍p lín ê pan-lia̍t-ê, tio̍h hō͘ i sí; ông chhut, ông jı̍p ê sî, lín tio̍h kun-sûi i.

9

Hiah ê pé-chóng chiàu chè-si Iâ-hô-iâ-tāi it-chhè só͘ bēng-lēng-ê khì kiâⁿ; ta̍k-lâng tòa in lûn-tio̍h an-hioh-jı̍t jı̍p-lâi ê lâng kap in lûn-tio̍h an-hioh-jı̍t chhut-khì ê lâng lâi kàu chè-si Iâ-hô-iâ-tāi hia.

10

Chè-si chiū chiong Iâ-hô-hoa tiān-lāi só͘ khǹg Tāi-pı̍t ông ê chhiuⁿ kap pîn-pâi kau hō͘ hiah ê pé-chóng.

11

Hō͘-ōe-peng chhiú--nih kia̍h ke-si, tī tôaⁿ kap tiān hia, tùi tiān ê chiàⁿ-pêng kàu tiān ê tò-pêng, khiā tī ông ê sì-ûi.

12

Chè-si chhōa ông ê kiáⁿ chhut-lâi, kā i tì bián-liû chiong lu̍t-hoat ê chheh hō͘ i; ēng iû boah i, siat-lı̍p i chòe-ông; in chiū phah chhiú-chiúⁿ kóng, Gōan ông bān-sòe.

13

A-tha-lī-ngá thiaⁿ-kìⁿ hō͘-ōe-peng kap peh-sìⁿ ê siaⁿ, chiū kàu peh-sìⁿ hia, jı̍p Iâ-hô-hoa ê tiān;

14

khòaⁿ-kìⁿ ông chiàu-lē khiā tī thiāu-piⁿ, kun-tiúⁿ kap pûn hō-thâu ê, khiā tī ông ê chó-iū; kok-lāi chèng peh-sìⁿ hoaⁿ-hí, pûn hō-thâu. A-tha-lī-ngá chiū thiah-lı̍h i ê saⁿ, hoah kóng, Hóan-pōan ah, hóan-pōan ah.

15

Chè-si Iâ-hô-iâ-tāi hoan-hù kóan-hat kun-tūi ê pé-chóng, tùi in kóng, Tùi pan-lia̍t ê tiong-kan kóaⁿ i chhut-khì, kìⁿ-nā tè-i-ê, tio̍h ēng to thâi-sí i; in-ūi chè-si kóng, M̄-thang tī Iâ-hô-hoa ê tiān thâi i.

16

In siám-khui siang-pêng hō͘ i khì; i tùi chiūⁿ-kàu ông-kiong ê bé-lō͘ khì, tī-hia siū-thâi.

17

Iâ-hô-iâ-tāi chiū tī Iâ-hô-hoa kap ông kap peh-sìⁿ ê tiong-kan lı̍p-iok, hō͘ in chòe Iâ-hô-hoa ê peh-sìⁿ; koh tī ông kap peh-sìⁿ ê tiong-kan lı̍p-iok.

18

Tùi án-ni kok-lāi ê chèng peh-sìⁿ kàu Pa-le̍k ê biō, thiah-húi i; phah-chhùi hiah ê tôaⁿ kap ngó͘-siōng, koh tī tôaⁿ-chêng phah-sí Pa-le̍k ê chè-si Má-thán. Chè-si siat koaⁿ-ôan lâi kò͘-siú Iâ-hô-hoa ê tiān.

19

Koh chhōa pé-chóng kap Ka-lī-cho̍k kap hō͘-ōe-peng. í-kı̍p kok-lāi chèng peh-sìⁿ; in tùi Iâ-hô-hoa ê tiān chhōa ông lo̍h--lâi, tùi hō͘-ōe-peng ê mn̂g-lō͘ jı̍p ông-kiong. I chiū chē ông-ūi.

20

Kok-lāi ê peh-sìⁿ lóng hoaⁿ-hí, thong-siâⁿ lóng an-chēng; in tī ông-kiong hia, ēng to thâi-sí A-tha-lī-ngá.

21

Iok-a-si chē-ūi ê sî chhit-hè.