Lia̍t-ông hā-kòan 第 12 章 - 巴克禮全羅

1

Iâ-hō͘ tē chhit nî, Iok-a-si chē-ūi; tī Iâ-lō͘-sat-léng chòe ông le̍k-kè sì-cha̍p nî; i ê lāu-bú miâ kiò Se-pí-a, sī Pia̍t-sī-pa lâng.

2

Iok-a-si tit-tio̍h chè-si Iâ-hô-iâ-tāi kà-sī, it-seng kiâⁿ Iâ-hô-hoa khòaⁿ-chòe hó ê sū.

3

Chóng-sī soaⁿ-thâu-biō bô hòe-bô; peh-sìⁿ iáu hiàn-chè sio-hiuⁿ tī soaⁿ-thâu-biō.

4

Iok-a-si kā chèng chè-si kóng, Kìⁿ-nā hiàn tī Iâ-hô-hoa ê tiān hun-piat chòe-sèng ê mı̍h, só͘ ta̍t ê gûn, chiū-sī thong-ēng ê gûn, á-sī ta̍k-lâng eng-kai la̍p ê sin-kè gûn, á-sī sim só͘ gōan hiàn tī Iâ-hô-hoa tiān ê gûn;

5

chè-si ta̍k-lâng tio̍h tùi só͘ bat ê lâng siu-lâi, siu-lí tiān phòa-hōai ê só͘-chāi; bô-lūn sím-mı̍h só͘-chāi phòa-hōai, lóng tio̍h siu-lí.

6

Chóng-sī Iok-a-si ông jī-cha̍p-saⁿ nî, chè-si iáu-bē siu-lí tiān phòa-hōai ê só͘-chāi.

7

Só͘-í Iok-a-si ông tiàu chè-si Iâ-hô-iâ-tāi, kap kî-û ê chè-si lâi, kā in kóng, Lín cháiⁿ-iūⁿ bô siu-lí tiān phòa-hōai ê só͘-chāi ah? Taⁿ lín m̄-thang koh tùi só͘ bat ê lâng siu gûn, tio̍h kau-chhut hit ê gûn, siu-lí tiān phòa-hōai ê só͘-chāi.

8

Chèng chè-si tah-èng m̄ koh siu peh-sìⁿ ê gûn, iā bô siu-lí tiān phòa-hōai ê só͘-chāi.

9

Chè-si Iâ-hô-iâ-tāi chhú chı̍t ê kūi, tī kūi-kòa chha̍k chı̍t khang, hē tī tôaⁿ-piⁿ, tī jı̍p Iâ-hô-hoa tiān ê chiàⁿ-pêng; pé-mn̂g ê chè-si chiong tòa jı̍p Iâ-hô-hoa tiān ê gûn hē tī kūi-lāi.

10

In khòaⁿ-kìⁿ kūi-lāi ê gûn í-keng chōe, ông ê su-kì kap tōa chè-si chiūⁿ-lâi, chiong Iâ-hô-hoa tiān-lāi só͘ tit-tio̍h ê gûn, khóan tī tē-á-lāi, lâi sǹg-phêng i.

11

Chiong só͘ phêng ê gûn kau hō͘ chòe-kang-ê, chiū-sī Iâ-hô-hoa tiān-lāi pān-sū ê lâng; in chiū chiong i hoat hō͘ siu-lí Iâ-hô-hoa tiān ê ba̍k-chhiūⁿ, kap kiàn-tiok ê lâng;

12

kap thô͘-chhiūⁿ, chio̍h-chhiūⁿ, iā beh bóe chhâ-liāu kap kè-phah ê chio̍h, siu-lí Iâ-hô-hoa tiān phòa-hōai ê só͘-chāi, í-kı̍p siu-lí tiān ê cha̍p-hùi.

13

Chóng-sī hit ê tòa-lâi jı̍p Iâ-hô-hoa tiān ê gûn, bô ēng i lâi chòe Iâ-hô-hoa tiān-lāi ê gûn-poe, chián-to, óaⁿ, hō-thâu, kap ta̍k-hō kim-khì gûn-khì;

14

chiū chiong hit ê gûn kau hō͘ chòe-kang ê lâng, siu-lí Iâ-hô-hoa ê tiān.

15

Koh chiong gûn kau hō͘ só͘ keng-chhiú ê lâng, hō͘ i hoat hō͘ chòe-kang lâng, bô kap in sǹg-siàu; in-ūi in chòe tāi-chì sêng-sı̍t.

16

To̍k-to̍k pó͘-kè-sit-chè ê gûn, sio̍k-chōe-chè ê gûn, bô tòa-jı̍p Iâ-hô-hoa ê tiān, sī kui chè-si.

17

Hit-sî A-lân ông Hap-siat chiūⁿ-khì kong-kek Ka-te̍k, the̍h i, chiū tiāⁿ-tio̍h ì-sù chiūⁿ-khì kong-kek Iâ-lō͘-sat-léng.

18

Iû-tāi ông Iok-a-si chiong i ê lia̍t-chó͘ Iû-tāi ông Iok-sa-hoat, Iâ-hô-lâm, A-hap-siā só͘ hiàn chòe-sèng ê mı̍h, kap i pún-sin só͘ hiàn chòe-sèng ê mı̍h, í-kı̍p Iâ-hô-hoa ê tiān kap ông-kiong hú-khò͘ só͘ ū ê kim, lóng sàng hō͘ A-lân ông Hap-siat; i chiū bô chiūⁿ-lâi Iâ-lō͘-sat-léng.

19

Iok-a-si kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

20

I ê jîn-sîn khí-lâi, pōe-pōan, thâi-sí Iok-a-si, tī lo̍h-khì Sek-la̍h Bí-lô ê chhù.

21

I ê jîn-sîn, chiū-sī Sī-bí-ap ê kiáⁿ Iok-sat-kah, kap Sok-be̍k ê kiáⁿ Iok-sat-po̍at thâi-sí i; lâng bâi-chòng i tī Tāi-pı̍t ê siâⁿ, kap i ê lia̍t-chó͘ siâng-ūi; i ê kiáⁿ A-má-siā sòa-chiap i chòe-ông.