Lia̍t-ông hā-kòan 第 13 章 - 巴克禮全羅

1

Iû-tāi ông A-hap-siā ê kiáⁿ Iok-a-si jī-cha̍p-saⁿ nî, Iâ-hō͘ ê kiáⁿ Iok-hap-su tī Sat-má-lī-a chē-ūi, chòe Í-sek-lia̍t ông, kiōng cha̍p-chhit nî.

2

I kiâⁿ Iâ-hô-hoa só͘ khòaⁿ-chòe pháiⁿ ê sū, thàn Nî-pat ê kiáⁿ Iâ-lô-phò-àm hō͘ Í-sek-lia̍t lâng hōan-chōe hit ê chōe, lóng bô lī-khui i.

3

Iâ-hô-hoa chiū siū-khì kàu Í-sek-lia̍t lâng, siông-siông kau in tī A-lân ông Hap-siat ê chhiú, kap Hap-siat ê kiáⁿ Piān-hap-ta̍t ê chhiú.

4

Iok-hap-su khún-kiû Iâ-hô-hoa, Iâ-hô-hoa thiaⁿ i; in-ūi I khòaⁿ-kìⁿ Í-sek-lia̍t lâng siū chè-ap, chiū-sī A-lân ông chè-ap in.

5

(Iâ-hô-hoa siúⁿ-sù Í-sek-lia̍t chı̍t ê chín-kiù-ê, hō͘ in thoat-lī A-lân lâng ê chhiú. Í-sek-lia̍t lâng chiū chiàu-kū khiā-khí in ê pò͘-pîⁿ.

6

Chóng-sī in bô lī-khui Iâ-lô-phò-àm ê ke ê chōe, chiū-sī hō͘ Í-sek-lia̍t lâng hōan-chōe ê, iû-gôan án-ni khì kiâⁿ; Sat-má-lī-a ê A-sià-la̍h iáu lâu-teh.)

7

I tī peh-sìⁿ tiong chí-ū lâu bé-peng gō͘ cha̍p, chiàn-chhia cha̍p-tiuⁿ, pō͘-peng chı̍t-bān, in-ūi A-lân ông ū bia̍t in, thún-ta̍h in, chhin-chhiūⁿ gō͘-kak-tiûⁿ ê thô͘-soa.

8

Iok-hap-su kî-û ê sū, kìⁿ i só͘ kiâⁿ ê, kap i ê lêng-le̍k, kiám bô lóng kì tī Í-sek-lia̍t chiah ê ông ê kì-lio̍k mah?

9

Iok-hap-su kap i ê lia̍t-chó͘ tâng-khùn, lâng bâi-chòng i tī Sat-má-lī-a; i ê kiáⁿ Iok-a-si sòa-chiap i chòe ông.

10

Iû-tāi ông Iok-a-si saⁿ-cha̍p-chhit nî, Iok-hap-su ê kiáⁿ Iok-a-si tī Sat-má-lī-a chē-ūi, chòe Í-sek-lia̍t ông, kiōng cha̍p-la̍k nî.

11

I kiâⁿ Iâ-hô-hoa só͘ khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-phò-àm ê chōe, chiū-sī i hō͘ Í-sek-lia̍t lâng hōan-chōe ê; iû-gôan án-ni kiâⁿ.

12

Iok-a-si kî-û ê sū, kìⁿ i só͘ kiâⁿ ê, í-kı̍p i kap Iû-tāi ông A-má-siā kau-chiàn ê lêng-le̍k, kiám bô lóng kì tī Í-sek-lia̍t chiah ê ông ê kì-lio̍k mah?

13

Iok-a-si kap i ê lia̍t-chó͘ tâng-khùn; Iâ-lô-phò-àm chē i ê ūi. Iok-a-si kap Í-sek-lia̍t chiah ê ông saⁿ-kap chòng tī Sat-má-lī-a.

14

Í-lī-sa hōan-tio̍h phòa-pīⁿ, chiū-sī beh sí ê pīⁿ; Í-sek-lia̍t ông Iok-a-si lo̍h-lâi khòaⁿ i, àⁿ tī i ê bīn thî-khàu, kóng, Góa ê pē ah, góa ê pē ah, Í-sek-lia̍t ê chiàn-chhia kap i ê bé-peng ah.

15

Í-lī-sa kā i kóng, Lí kia̍h keng-chìⁿ. I chiū kia̍h keng kap chìⁿ.

16

Koh kā Í-sek-lia̍t ông kóng, Lí ēng chhiú pu̍ih keng; i chiū ēng chhiú pu̍ih i.

17

Í-lī-sa hōaⁿ-chhiú tī ông ê chhiú, kóng, Lí khui ǹg tang--sì ê thang-á. I chiū khui. Í-lī-sa kóng, Siā chìⁿ. I chiū siā chìⁿ. Í-lī-sa kóng, Che sī Iâ-hô-hoa thâi-iâⁿ ê chìⁿ, chiū-sī thâi-iâⁿ A-lân lâng ê chìⁿ, in-ūi lí beh tī A-hut kong-kek A-lân lâng, kàu it-chīn bia̍t in.

18

Koh kóng, Kia̍h hiah ê chìⁿ; i chiū kia̍h i. I koh kā Í-sek-lia̍t ông kóng, Phah tōe. I phah saⁿ-pái chiū soah.

19

Siōng-tè ê lô͘-po̍k siū-khì i kóng, Lí hit-tia̍p tio̍h phah gō͘-la̍k pái, chiū ōe kong-kek A-lân, kàu i it-chīn bia̍t; taⁿ chí-ū ōe phah-pāi A-lân lâng saⁿ-pái.

20

Í-lī-sa sí-liáu, lâng kā i bâi-chòng; kàu sin-nî, ū Mô͘-ap kui-tīn lâng chhim-hōan kéng-kài.

21

Ū lâng tú-á teh bâi-chòng sí-lâng, hut-jiân khòaⁿ-kìⁿ kui-tīn lâng, chiū chiong sí-lâng hiat tī Í-lī-sa ê bōng; sí-lâng chı̍t-ē kha̍p-tio̍h Í-lī-sa ê kut-thâu, chiū koh-o̍ah khí-lâi khiā.

22

Iok-hap-su ê nî-kan, A-lân ông Hap-siat ta̍uh-ta̍uh chè-ap Í-sek-lia̍t lâng.

23

Chóng-sī Iâ-hô-hoa in-ūi I kap A-pek-la̍h-hán, Í-sat, Ngá-kok só͘ lı̍p ê iok, iû-gôan si-un hō͘ Í-sek-lia̍t, lîn-bín in, kòan-kò͘ in, m̄-kam châu-bia̍t in, iáu-bē kóaⁿ-tio̍k in lī-khui I ê bīn-chêng.

24

A-lân ông Hap-siat sí, i ê kiáⁿ Piān-hap-ta̍t sòa-chiap i chòe ông.

25

Chêng Hap-siat kap Iok-a-si ê lāu-pē Iok-hap-su kau-chiàn, tùi i ê chhiú the̍h-khì kúi-nā ê siâⁿ; taⁿ Iok-hap-su ê kiáⁿ Iok-a-si tùi Hap-siat ê kiáⁿ Piān-hap-ta̍t ê chhiú the̍h tò-tńg. Iok-a-si phah i saⁿ-pái, Khek-ho̍k Í-sek-lia̍t hiah ê siâⁿ.