Sat-bó͘-jíⁿ hā-kòan 第 1 章 - 巴克禮全羅

1

Sò-lô sí-liáu, iā Tāi-pı̍t thâi-sí A-má-le̍k lâng tò-lâi ê sî, Tāi-pı̍t tòa tī Sé-kek-la̍h nn̄g-jı̍t.

2

Kàu tē-saⁿ jı̍t, khòaⁿ ah, ū chı̍t-lâng tùi iâⁿ-pôaⁿ, tùi Sò-lô hia, lâi, i-chiûⁿ thiah-lı̍h, thâu-khak sám thô͘-hún, kàu Tāi-pı̍t hia, chiū phak tī tōe--nih pài i.

3

Tāi-pı̍t mn̄g i kóng, Lí tùi toh-lo̍h lâi? I ìn kóng, Góa tùi Í-sek-lia̍t ê kun-iâⁿ cháu-lâi.

4

Tāi-pı̍t koh mn̄g i, kóng, Tāi-chì cháiⁿ-iūⁿ? chhiáⁿ lí kā góa kóng. I ìn kóng, Peh-sìⁿ tùi chiàn-tīn tô-cháu, peh-sìⁿ chōe-chōe tó-teh sí--khì; Sò-lô kap i ê kiáⁿ Iok-ná-tan iā sí.

5

Tāi-pı̍t kā tùi i kóng ê siàu-liân lâng kóng, Lí cháiⁿ-iūⁿ chai Sò-lô kap i ê kiáⁿ Iok-ná-tan sí ah?

6

Kā i kóng ê siàu-liân lâng kóng, Góa ngó͘-jiân kàu Ki-lī-pho soaⁿ, khòaⁿ-kìⁿ Sò-lô òa(**óa) tī i ê chhiuⁿ, ū chiàn-chhia bé-peng jip-óa i.

7

I o̍at-thâu khòaⁿ góa, chiū kiò góa; góa ìn kóng, Góa tī-chia.

8

I mn̄g góa kóng, Lí sī sím-mı̍h lâng? Góa ìn kóng, Góa sī A-má-le̍k lâng.

9

I koh kā góa kóng, Chhiáⁿ lí kūn-óa góa lâi thâi-sí góa, in-ūi góa chin thòng-khó͘, góa ê sìⁿ-miā iáu hó-hó.

10

Góa chiū kūn-óa i, lâi thâi-sí i, in-ūi góa chai i tó--lo̍h-khì liáu, tek-khak bōe o̍ah; góa chiū the̍h i thâu-khak--nih ê bián-liû, kap i ê chhiú-khôan, tòa kàu góa ê chú chia.

11

Tāi-pı̍t chiū thiah-lı̍h saⁿ, kun-tè i ê lâng iā sī án-ni.

12

Ūi-tio̍h Sò-lô kap i ê kiáⁿ Iok-ná-tan kap Iâ-hô-hoa ê peh-sìⁿ, kap Í-sek-lia̍t ke, pi-ai thî-khàu kìm-chia̍h kàu jı̍t-àm, in-ūi in tó tī to-ē.

13

Tāi-pı̍t kā tùi i kóng ê siàu-liân lâng kóng, Lí tùi toh-lo̍h lâi? Ìn kóng, Góa sī chhut-gōa lâng ê kiáⁿ, A-má-le̍k lâng.

14

Tāi-pı̍t tùi i kóng, Lí chhun-chhiú thâi-sí Iâ-hô-hoa só͘ boah-iû-ê, cháiⁿ-iūⁿ bô kiaⁿ ah?

15

Tāi-pı̍t kiò chı̍t ê siàu-liân lâng, kóng, Lí kūn-óa khì thâi-sí i. I chiū khì phah hō͘ i sí.

16

Tāi-pı̍t kā i kóng, Lí ê huih kui tī lí ê thâu-khak, in-ūi lí ê chhùi ka-kī kan-chèng lí kóng, Góa thâi-sí Iâ-hô-hoa só͘ boah-iû-ê.

17

Tāi-pı̍t chòe ai-ko, tui-tō Sò-lô kap i ê kiáⁿ Iok-ná-tan.

18

Koh kóng, Chiong chit ê ai-ko kà-sī Iû-tāi lâng; chit ê ai-ko miâ kiò Keng-ko, siá tī Ngá-soah-jíⁿ ê chheh. Koa kóng,

19

Í-sek-lia̍t ah, lí ê êng-hián--ê siū thâi tī soaⁿ-thâu; Hāi ah, eng-hiông-ê sí kàu án-ni ah!

20

Bo̍h-tit tī Ka-te̍k pò-kò, Bo̍h-tit tī A-sı̍t-ki-lûn ê koe-lō͘ pò-iông, Kiaⁿ-liáu Hui-lī-sū ê cha-bó͘-gín-ná hoaⁿ-hí. Kiaⁿ-liáu bô siū kat-lé ê lâng ê cha-bó͘-gín-ná tāi-ia̍t.

21

Ki-lī-pho soaⁿ ah, Gōan bô lō͘-chúi, bô hō͘, tī lí hia, iā bô chhut lé-mı̍h ê chhân; In-ūi tī-hia ióng-sū ê tîn-pâi siū hiat-ka̍k, Sò-lô ê tîn-pâi, chhin-chhiūⁿ bô siū boah-iû ê.

22

Tùi siū-thâi-ê ê huih, tùi ióng-sū ê iû, Iok-ná-tan ê keng bô tò-thè, Sò-lô ê to bô khang-khang tò-tńg.

23

Sò-lô kap Iok-ná-tan o̍ah ê sî thang thiàⁿ, thang hoaⁿ-hí ê; Sí ê sî iā bô pun-lī; In pí eng-chiáu khah-kín, Pí sai khah-kiông.

24

Í-sek-lia̍t ê cha-bó͘-kiáⁿ ah, tio̍h ūi-tio̍h Sò-lô thî-khàu, I bat hō͘ lín chhēng chu-âng-sek lâi hoaⁿ-hí; Hō͘ lín ê i-ho̍k ū n̂g-kim ê chng-thāⁿ.

25

Ióng-sū cháiⁿ-iūⁿ tó tī chiàn-tīn! Iok-ná-tan siū-thâi tī lí ê soaⁿ-thâu.

26

Góa ê hiaⁿ Iok-ná-tan ah, góa ūi lí siong-sim; Góa chīn-chāi hoaⁿ-hí lí; Lí ê thiàⁿ góa chin kî-biāu, Iâⁿ-kè hū-jîn-lâng ê thiàⁿ.

27

Ióng-sū sí kàu án-ni, Chiàn-khì húi-bia̍t kàu án-ni!