Sat-bó͘-jíⁿ hā-kòan 第 2 章 - 巴克禮全羅

1

Āu-lâi Tāi-pı̍t mn̄g Iâ-hô-hoa kóng, Góa chiūⁿ-khì Iû-tāi chı̍t ê siâⁿ thang mah? Iâ-hô-hoa kā i kóng, Thang chiūⁿ khì. Tāi-pı̍t kóng, Góa tio̍h chiūⁿ-khì toh-lo̍h? I kóng, Kàu Hi-pek-lûn.

2

Tāi-pı̍t chiū kap i nn̄g ê bó͘, chiū-sī Iâ-su-lia̍t lâng A-hi-lóan, kap Ka-bı̍t lâng bat chòe Ná-pat ê bó͘, miâ A-pí-kai, lóng chiūⁿ-khì hia.

3

Tāi-pı̍t iā hō͘ kun-tè i ê lâng, kap in ta̍k-lâng ê ke-kòan, lóng chiūⁿ-khì; in chiū tiàm tī Hi-pek-lûn hiah ê siâⁿ.

4

Iû-tāi lâng kàu, tī-hia ēng iû boah Tāi-pı̍t chòe Iû-tāi ke ê ông. Ū lâng kā Tāi-pı̍t kóng, Bâi-chòng Sò-lô--ê sī Ki-lia̍t Ngá-pí ê lâng.

5

Tāi-pı̍t chiū chhe sù-chiá khì kìⁿ Ki-lia̍t Ngá-pí ê lâng, kā in kóng, Gōan Iâ-hô-hoa sù-ho̍k lín, in-ūi lín ēng chit ê jîn-chû khóan-thāi lí ê chú Sò-lô, kā i bâi-chòng.

6

Gōan Iâ-hô-hoa ēng jîn-chû sêng-sı̍t khóan-thāi lín; góa iā beh tap lín chit ê jîn-chû, in-ūi lín ū kiâⁿ chit ê sū.

7

Lín ê chhiú tio̍h giám-ngī, lín tio̍h ióng-kám, in-ūi lín ê chú Sò-lô í-keng sí, Iû-tāi cho̍k iā ū ēng iû boah góa chòe in ê ông.

8

Sò-lô ê kun-tiúⁿ Nî-jíⁿ ê kiáⁿ Ap-nî-jíⁿ bat chiong Sò-lô ê kiáⁿ I-si-pho-siat tòa i kè--khì Má-hap-liām,

9

siat-lı̍p i chòe-ông tī-lí Ki-lia̍t, A-su-lī, Iâ-su-lia̍t, Í-hoat-liân, Piān-ngá-bín, kap Í-sek-lia̍t ê chèng-lâng.

10

Sò-lô ê kiáⁿ I-si-pho-siat khí-thâu chòe Í-sek-lia̍t ông, hit-sî sì-cha̍p hè; chē-ūi nn̄g-nî. To̍k-to̍k Iû-tāi cho̍k tè Tāi-pı̍t.

11

Tāi-pı̍t tī Hi-pek-lûn chòe Iû-tāi cho̍k ê ông, le̍k-kè chhit-nî koh la̍k-ge̍h-jı̍t.

12

Nî-jíⁿ ê kiáⁿ Ap-nî-jíⁿ, kap Sò-lô ê kiáⁿ I-si-pho-siat ê jîn-sîn, tùi Má-hap-liām chhut-lâi khì Ki-piàn.

13

Sé-ló͘-ngá ê kiáⁿ Iok-ap kap Tāi-pı̍t ê jîn-sîn, iā chhut-lâi, tī Ki-piàn ê tî-piⁿ saⁿ tú-tio̍h; in chiū chē--teh, chı̍t-tūi chē tī tî ê chit-pêng, chı̍t-tūi chē tī tî ê hit-pêng.

14

Ap-nî-jíⁿ tùi Iok-ap kóng, Chhiáⁿ lí hō͘ siàu-liân lâng khí-lâi, tī lán ê bīn-chêng kún-chhiò. Iok-ap kóng, Thang hō͘ i khí-lâi.

15

In chiū khí-lâi chiàu siàu-gia̍h kè-khì; sio̍k Sò-lô ê kiáⁿ I-si-pho-siat ê Piān-ngá-bín lâng cha̍p-jī miâ, Tāi-pı̍t ê jîn-sîn iā ū cha̍p-jī miâ.

16

Ta̍k-ê khiú i ê tùi-bīn hit-lâng ê thâu-khak, ēng to chha̍k i tùi-bīn hit-lâng ê hia̍p, chòe chı̍t-ē tó--lo̍h-khì sí; só͘-í hit só͘-chāi kiò-chòe Hi-lī-kah-hap-sò͘-lîm, chiū-sī tī Ki-piàn.

17

Hit-jı̍t ê kau-chiàn chin-hiông; Ap-nî-jíⁿ kap Í-sek-lia̍t lâng khah-su tī Tāi-pı̍t ê peng ê bīn-chêng.

18

Tī-hia ū Sé-ló͘-ngá saⁿ ê kiáⁿ, Iok-ap, A-pí-su, A-sat-hek; A-sat-hek ê kha gâu cháu, chhin-chhiūⁿ iá-lo̍k chı̍t-poaⁿ.

19

A-sat-hek tui-jip Ap-nî-jíⁿ; bô phian chó-iū, tı̍t-tı̍t jip Ap-nî-jíⁿ.

20

Ap-nî-jíⁿ o̍at-thâu khòaⁿ kóng, A-sat-hek ah, sī lí á m̄-sī? Ìn kóng, Sī góa.

21

Ap-nî-jíⁿ kā i kóng, Lí tio̍h o̍at-tńg chiàⁿ-pêng, á-sī tò-pêng, lia̍h chı̍t ê siàu-liân lâng, ūi lí pún-sin pak i ê chiàn-saⁿ; chóng-sī A-sat-hek tı̍t-tı̍t tui i, m̄-khéng o̍at-tńg.

22

Ap-nî-jíⁿ koh kā A-sat-hek kóng, Lí o̍at-tńg bo̍h--tit tui-jip góa; góa siáⁿ-sū tio̍h phah lí tó-tōe? nā án-ni, góa ū sím-mı̍h bīn-ba̍k thang khì kìⁿ lí ê hiaⁿ Iok-ap.

23

I iû-gôan m̄-khéng o̍at-tńg; Ap-nî-jíⁿ chiah ēng chhiuⁿ-pìⁿ-āu ê to chha̍k-jı̍p i ê pak-tó͘; chhiuⁿ chiū thàng-kè i ê ka-chiah-āu, i chiū tó tī-hia sí; kìⁿ-nā lâi kàu A-sat-hek tó-teh sí ê só͘-chāi, chiū lóng thêng-kha.

24

Iok-ap kap A-pí-su tui-jip Ap-nî-jíⁿ; in kàu Ki-a saⁿ tùi-bīn ê A-má soaⁿ, tī Ki-piàn khòng-iá ê lō͘, jı̍t chiū lo̍h.

25

Piān-ngá-bín lâng chū-chı̍p tè Ap-nî-jíⁿ chòe chı̍t-tīn, khiā tī soaⁿ-téng.

26

Ap-nî-jíⁿ kiò Iok-ap kóng, To-kiàm thâi lâng éng bô soah mah? Lí kiám m̄-chai kàu-bé ū kan-khó͘ mah? lí beh kàu sím-mı̍h sî hō͘ peh-sìⁿ tò-khì, bô jip in ê hiaⁿ-tī ah?

27

Iok-ap kóng, Góa kí éng-o̍ah ê Siōng-tè lâi chiù-chōa, nā m̄-sī lí kóng, chá-khí peh-sìⁿ chiū tò-khì, bô jip i ê hiaⁿ-tī.

28

Tùi án-ni, Iok-ap pûn sàu-kak, chèng peh-sìⁿ chiū khiā-teh, bô koh tui-jip Í-sek-lia̍t lâng, iā bô koh kau-chiàn.

29

Ap-nî-jíⁿ kap tè i ê lâng thong-mî kiâⁿ, keng-kè A-la̍h-pa, kè Iok-tàn, tùi Pit-lûn kè-khì kàu Má-hap-liām.

30

Iok-ap bô koh jip Ap-nî-jíⁿ, chiū tò-lâi, chū-chı̍p chèng peh-sìⁿ; Tāi-pı̍t ê pêng kiám cha̍p-káu lâng, kap A-sat-hek.

31

Chóng-sī Tāi-pı̍t ê peng phah-sí Piān-ngá-bín lâng, kap tè Ap-nî-jíⁿ ê lâng, kiōng saⁿ-pah la̍k-cha̍p lâng.

32

In kng A-sat-hek khì Pek-lī-hêng, bâi-chòng tī in lāu-pē ê bōng. Iok-ap kap tè i ê lâng thong-mî kiâⁿ, kàu Hi-pek-lûn ê sî, thiⁿ tú-á kng.