Sat-bó͘-jíⁿ hā-kòan 第 3 章 - 巴克禮全羅

1

Sò-lô ê ke kap Tāi-pı̍t ê ke kau-chiàn kú-kú; Tāi-pı̍t ná kiông-sēng, Sò-lô ê ke ná soe-jio̍k.

2

Tāi-pı̍t tī Hi-pek-lûn siⁿ kui-nā ê kiáⁿ; toa-kiáⁿ Àm-lùn, sī Iâ-su-lia̍t lâng A-hi-lóan só͘ siⁿ ê;

3

tē-jī-ê Ki-lī-ap, sī bat chòe Ka-bı̍t lâng Ná-pat ê bó͘ A-pí-kai só͘ siⁿ ê; tē-saⁿ-ê, Ap-sa-liông, sī Ki-su̍t ông Ta̍t-mái ê cha-bó͘-kiáⁿ Má-ka ê kiáⁿ;

4

tē-sì-ê, A-to-nî-ngá, sī Hap-kı̍p ê kiáⁿ; tē-gō͘-ê, Sī-hoat-thê-ngá, sī A-pí-tha ê kiáⁿ;

5

tē-la̍k-ê, Í-te̍k-liām, sī Tāi-pı̍t ê bó͘ Í-kek-la̍h só͘ siⁿ ê; chiah-ê sī Tāi-pı̍t tī Hi-pek-lûn só͘ siⁿ ê.

6

Sò-lô ê ke kap Tāi-pı̍t ê ke kau-chiàn ê sî, Ap-nî-jíⁿ tī Sò-lô ê ke ka-kī kiông.

7

Sò-lô ū chı̍t ê hui, miâ kiò Lī-su-pa, sī Ài-a ê cha-bó͘-kiáⁿ. I-si-pho-siat tùi Ap-nî-jíⁿ kóng, Lí siáⁿ-sū kap góa lāu-pē ê hui tâng-pâng ah?

8

Ap-nî-jíⁿ in-ūi I-si-pho-siat ê ōe, chiū chin siū-khì, kóng, Góa kiám-sī Iû-tāi ê káu-thâu mah? góa hó khóan-thāi lí ê lāu-pē Sò-lô ê ke, kap i ê hiaⁿ-tī pêng-iú, bô chiong lí kau tī Tāi-pı̍t ê chhiú, lí kin-á-jı̍t kéng-jiân in-ūi chit ê hū-jîn-lâng chek-pī góa mah?

9

Góa nā bô chiàu Iâ-hô-hoa só͘ tùi Tāi-pı̍t chiù-chōa-ê lâi kiâⁿ tī i, chiū gōan Siōng-tè ka-pē chek-ho̍at.

10

Ap-nî-jíⁿ, beh tùi Sò-lô ê ke î-sóa kok-ūi, lâi kiàn-lı̍p Tāi-pı̍t ê ūi, hō͘ i tī-lí Í-sek-lia̍t kap Iû-tāi, tùi Tàn kàu Pia̍t-sī-pa.

11

I-si-pho-siat, in-ūi kiaⁿ Ap-nî-jíⁿ, bōe ìn chı̍t-kù-ōe.

12

Ap-nî-jíⁿ ūi-tio̍h pún-sin chhe sù-chiá khì kìⁿ Tāi-pı̍t kóng, Chit ê tōe-hng sio̍k chī-chūi ah? Koh kóng, Lí kap góa lı̍p-iok, góa ê chhiú beh pang-chān lí, hō͘ Í-sek-lia̍t lóng kui lí.

13

Tāi-pı̍t kóng, Hó, góa kap lí lı̍p-iok; chóng-sī góa beh tùi lí thó chı̍t-hāng, chiū-sī lí lâi kìⁿ góa ê bīn hit-sî, nā bô chiong Sò-lô ê cha-bó͘-kiáⁿ Bí-kah chhōa-lâi, tek-khak bōe kìⁿ góa ê bīn.

14

Tāi-pı̍t chiū chhe sù-chiá khì kìⁿ Sò-lô ê kiáⁿ I-si-pho-siat, kóng, Lí tio̍h chiong góa ê bó͘ Bí-kah hêng góa, i chiū-sī góa bat ēng Hui-lī-sū lâng chı̍t-pah iông-bu̍t ê phê só͘ phèng-tiāⁿ ê.

15

I-si-pho-siat chiū chhe lâng tùi i ê tiōng-hu La̍h-ek ê kiáⁿ Phàⁿ-thiat hia, tòa i lâi.

16

I ê tiōng-hu tè i ê āu-bīn, ná-kiâⁿ ná-háu, kap i kàu Pa-hō͘-lîm. Ap-nî-jíⁿ kā i kóng, Tò--khì ah. I chiū tò--khì.

17

Ap-nî-jíⁿ kap Í-sek-lia̍t ê tióng-ló chham-siông, kóng, Lín chêng him-bō͘ Tāi-pı̍t chòe ông tī-lí lín; taⁿ tio̍h kiâⁿ i;

18

in-ūi Iâ-hô-hoa bat lūn-kàu Tāi-pı̍t kóng, Góa beh ēng Góa ê lô͘-po̍k Tāi-pı̍t ê chhiú kiù Góa ê peh-sìⁿ Í-sek-lia̍t thoat-lī Hui-lī-sū lâng ê chhiú, kap chèng tùi-tek ê chhiú.

19

Ap-nî-jíⁿ iā kóng hō͘ Piān-ngá-bín lâng thiaⁿ; koh kàu Hi-pek-lûn, chiong Í-sek-lia̍t lâng, kap Piān-ngá-bín chôan-ke, it-chhè só͘ khòaⁿ-chòe hó ê, kóng hō͘ Tāi-pı̍t thiaⁿ.

20

Ap-nî-jíⁿ kap jī-cha̍p lâng kàu Hi-pek-lûn kìⁿ Tāi-pı̍t. Tāi-pı̍t ūi-tio̍h Ap-nî-jíⁿ, í-kı̍p kap i lâi ê lâng, siat iân-sia̍h.

21

Ap-nî-jíⁿ kā Tāi-pı̍t kóng, Góa beh khí--lâi, khì chio-chı̍p Í-sek-lia̍t chèng-lâng lâi kìⁿ góa ê chú góa ê ông, hō͘ in thang kap lí lı̍p-iok, lí chiū thang chòe-ông, chiàu sim só͘ ài lâi kóan-lí. Tāi-pı̍t chiū sàng Ap-nî-jíⁿ khì; i chiū pêng-an khì.

22

Tāi-pı̍t ê peng kap Iok-ap chhut-kun tò--lâi, tòa chōe-chōe chhiúⁿ ê mı̍h lâi; hit-sî Ap-nî-jíⁿ bô tī Hi-pek-lûn Tāi-pı̍t hia, in-ūi Tāi-pı̍t í-keng sàng i khì, i iā pêng-an khì.

23

Iok-ap kap tè i ê chôan-kun í-keng kàu, ū lâng thong-ti Iok-ap kóng, Nî-jíⁿ ê kiáⁿ Ap-nî-jíⁿ lâi kìⁿ ông, ông sàng i khì, i iā pêng-an khì.

24

Iok-ap khì kìⁿ ông kóng, Lí chòe sím-mı̍h ah? Khòaⁿ ah, Ap-nî-jíⁿ lâi kìⁿ lí, lí siáⁿ-sū sàng i khì? taⁿ i khì-liáu lah;

25

lí chai Nî-jíⁿ ê kiáⁿ Ap-nî-jíⁿ lâi, sī beh phiàn lí, ài chai lí ê chhut kap lí ê jı̍p, kap lí it-chhè só͘ chòe ê sū.

26

Iok-ap tùi Tāi-pı̍t hia chhut-lâi, chiū chhe sù-chiá khì jip Ap-nî-jíⁿ; in chiū tùi Se-la̍h ê chíⁿ tòa i lâi; chóng-sī Tāi-pı̍t m̄-chai.

27

Ap-nî-jíⁿ tò-tńg-lâi kàu Hi-pek-lûn, Iok-ap chhōa i kàu siâⁿ-mn̂g-kháu, ké beh àm-chīⁿ kap i kóng-ōe, chiū tī-hia chha̍k-thàu i ê pak-tó͘, i chiū sí; che sī ūi-tio̍h i ê sió-tī A-sat-hek hō͘ i thâi-sí.

28

Āu-lâi Tāi-pı̍t thiaⁿ-kìⁿ, chiū kóng, Lâu Nî-jíⁿ ê kiáⁿ Ap-nî-jíⁿ ê huih, chit ê chōe tī Iâ-hô-hoa ê bīn-chêng tek-khak éng-óan bô kui tī góa, kap góa ê kok.

29

Gōan hit-ê kui tī Iok-ap ê thâu-khak, kap i ê lāu-pē chôan-ke; koh gōan Iok-ap ê ke hōan-tio̍h hā-siau-ê, thái-ko-ê, á-sī òa kóaiⁿ-á ê, hō͘ to thâi-sí-ê, bô thang chia̍h ê, éng bô tn̄g.

30

Iok-ap kap i ê sió-tī A-pí-su thâi-sí Ap-nî-jíⁿ, sī in-ūi i tī Ki-piàn kau-chiàn ê sî, thâi-sí in ê sió-tī A-sat-hek.

31

Tāi-pı̍t kā Iok-ap kap tè i ê chèng peh-sìⁿ kóng, Lín tio̍h thiah-lı̍h saⁿ, hâ môa-pò͘, tī Ap-nî-jíⁿ bīn-chêng thî-khàu. Tāi-pı̍t ông iā tè tī i ê koaⁿ-chhâ-āu.

32

In bâi-chòng Ap-nî-jíⁿ tī Hi-pek-lûn; ông óa Ap-nî-jíⁿ ê bōng lâi thî-khàu, chèng peh-sìⁿ iā thî-khàu.

33

Ông ūi-tio̍h Ap-nî-jíⁿ pi-ai kóng, Ap-nî-jíⁿ cháiⁿ-iūⁿ chhin-chhiūⁿ gōng-lâng ê sí ah?

34

Lí ê chhiú bô khún-pa̍k, lí ê kha bô só-liān; Lí sí chhin-chhiūⁿ lâng sí tī pháiⁿ-lâng ê bīn-chêng.

35

Tùi án-ni chèng peh-sìⁿ koh ūi-tio̍h i ai-khàu. Jı̍t bē lo̍h ê sî, chèng peh-sìⁿ lâi khǹg Tāi-pı̍t chia̍h piáⁿ; chóng-sī Tāi-pı̍t chiù-chōa kóng, Góa nā tī jı̍t bē lo̍h ê tāi-seng chia̍h tām-po̍h piáⁿ, á-sī chia̍h pa̍t hāng mı̍h, gōan Siōng-tè ka-pē chek-ho̍at góa.

36

Chèng peh-sìⁿ chù-ì khòaⁿ, lóng khòaⁿ-chòe hó, chhin-chhiūⁿ ông hōan só͘ chòe ê, chèng peh-sìⁿ lóng khòaⁿ-chòe hó.

37

Hit-jı̍t chèng peh-sìⁿ kap Í-sek-lia̍t chèng-lâng chiah chai thâi-sí Nî-jíⁿ ê kiáⁿ Ap-nî-jíⁿ, lóng m̄-sī chhut tī ông ê ì-sù.

38

Ông kā i ê jîn-sîn kóng, Lín kiám m̄-chai kin-á-jı̍t tī Í-sek-lia̍t tiong, sí chı̍t ê hô-kia̍t ê tāi úi-jîn mah?

39

Góa sui-jiân siū boah-iû chòe ông, kin-á-jı̍t iáu sī lóan-jio̍k; Sé-ló͘-ngá ê kiáⁿ, chiah ê lâng pí góa khah-kiông; kiâⁿ-pháiⁿ ê lâng, gōan Iâ-hô-hoa chiàu i ê pháiⁿ pò-èng i.