Sat-bó͘-jíⁿ hā-kòan 第 4 章 - 巴克禮全羅

1

Sò-lô ê kiáⁿ thiaⁿ-kìⁿ Ap-nî-jíⁿ sí tī Hi-pek-lûn, chhiú chiū nńg--lo̍h-khì. Í-sek-lia̍t chèng-lâng iā lóng gāng-gāng.

2

Sò-lô ê kiáⁿ ū nn̄g ê tūi-tiúⁿ, chı̍t-ê miâ Pa-ná, chı̍t-ê miâ Lī-kah, sī Piān-ngá-bín chi-phài, Pí-lio̍k lâng Lîm-bûn ê kiáⁿ; in-ūi Pí-lio̍k iā sio̍k tī Piān-ngá-bín.

3

Pí-lio̍k lâng chá-chêng cháu kàu Ki-tha-im, chhut-gōa tī-hia, kàu kin-á-jı̍t.

4

Sò-lô ê kiáⁿ Iok-ná-tan ū chı̍t ê kiáⁿ nn̄g-kha lóng pái, miâ-kiò Bí-hui-pho-siat; tng Sò-lô kap Iok-ná-tan ê siau-sit tùi Iâ-su-lia̍t thôan-lâi ê sî, i tú-á gō͘-hè; i ê ni-bú phō i cháu; in-ūi cháu chin-kín, gín-ná po̍ah--lo̍h-lâi, chiū tì pái-kha.

5

Pí-lio̍k lâng, Lîm-bûn ê kiáⁿ Lī-kah kap Pa-ná, chhut-khì, iok-lio̍k jı̍t sio-lō ê sî, kàu I-si-pho-siat ê chhù. I tī tiong-tàu tú-á teh khùn.

6

In jı̍p chhù-lāi ké-iáⁿ beh put be̍h, chiū chhì-thàu I-si-pho-siat ê pak-tó͘; Lī-kah kap i ê hiaⁿ-tī Pa-ná chiū tô-cháu.

7

In jı̍p pâng-lâi ê sî, I-si-pho-siat tú-á tī pâng-lāi tó tī chhn̂g--nih teh khùn; in chiū phah i, thâi-sí i, koah i ê thâu-khak, tòa i khì, tùi A-la̍h-pa ê lō͘ thàu-mî kiâⁿ.

8

In tòa I-si-pho-siat ê thâu-khak kàu Hi-pek-lûn Tāi-pı̍t hia, kā ông kóng, Lí ê tùi-te̍k Sò-lô bat siàu-siūⁿ lí ê sìⁿ-miā ê, khòaⁿ ah, che sī i ê kiáⁿ I-si-pho-siat ê thâu-khak. Iâ-hô-hoa kin-á-jı̍t ūi-tio̍h góa ê chú góa ê ông pò-siû tī Sò-lô kap i ê hō͘-è.

9

Tāi-pı̍t ìn Pí-lio̍k lâng Lîm-bûn ê kiáⁿ Lī-kah kap i ê hiaⁿ-tī Pa-ná, kā i kóng, Iâ-hô-hoa kiù-sio̍k góa ê sìⁿ-miā thoat-lī lóng-chóng ê khó͘-lān; góa kí I ê éng-o̍ah lâi chiù-chōa;

10

chêng ū lâng pò góa kóng, Sò-lô í-keng sí, i kā-kī lia̍h-chòe sī pò hó siau-sit, góa chiū lia̍h i tī Sé-keh-la̍h kā i thâi-sí, che sī góa hō͘ i chòe thôan siau-sit ê pò-siúⁿ;

11

hô-hòng pháiⁿ-lâng jı̍p gī-lâng ê chhù, thâi i tī bîn-chhn̂g--nih, góa kiám bô beh tùi lín ê chhiú thó i ê huih, tû-bia̍t lín tī tōe-chiūⁿ mah?

12

Tāi-pı̍t bēng-lēng i ê siàu-liân lâng, in chiū thâi-sí in, chām-tn̄g in ê kha-chhiú, tiàu tī Hi-pek-lûn ê tî-piⁿ; iā chiong I-si-pho-siat ê thâu-khak bâi-chòng tī Hi-pek-lûn Ap-nî-jíⁿ ê bōng.