Sat-bó͘-jíⁿ hā-kòan 第 5 章 - 巴克禮全羅

1

Tng-sî Í-sek-lia̍t chèng chi-phài kàu Hi-pek-lûn, kìⁿ Tāi-pı̍t kóng, Khòaⁿ ah, góan sī lí ê kut-jio̍k.

2

Chêng Sò-lô chòe góan ê ông ê sî, chhōa Í-sek-lia̍t chhut-jı̍p-ê sī lí; Iâ-hô-hoa iā bat kā lí kóng, Lí beh chiàu-kò͘ Góa ê peh-sìⁿ Í-sek-lia̍t, iā beh chòe Í-sek-lia̍t ê kun-ông.

3

Tùi án-ni Í-sek-lia̍t ê tióng-ló lóng lâi Hi-pek-lûn kìⁿ ông. Tāi-pı̍t ông tī Hi-pek-lûn Iâ-hô-hoa ê bīn-chêng kap in lı̍p-iok. In chiū ēng iû boah Tāi-pı̍t chòe Í-sek-lia̍t ê ông.

4

Tāi-pı̍t chē-ūi ê sî saⁿ-cha̍p hè, i chē-ūi sì-cha̍p nî.

5

Tī Hi-pek-lûn chòe Iû-tāi ông chhit-nî koh la̍k-ge̍h-jı̍t; tī Iâ-lō͘-sat-léng chòe thong Í-sek-lia̍t kap Iû-tāi ê ông saⁿ-cha̍p-saⁿ nî.

6

Ông kap tè i ê lâng lâi kàu Iâ-lō͘-sat-léng beh kong-kek khiā-khí hit só͘-chāi ê Iâ-pò͘-su lâng. In tùi Tāi-pı̍t kóng, Lí nā bô tû chiah ê chhiⁿ-mî-ê. pái-kha-ê, chiū bōe jı̍p chit só͘-chāi; in phah-sǹg Tāi-pı̍t koat-tòan bōe jı̍p chia.

7

Chóng-sī Tāi-pı̍t kong-kek Sek-an ê ōe-só͘, che chiū-sī Tāi-pı̍t ê siâⁿ.

8

Tng hit-jı̍t Tāi-pı̍t kóng, Chī-chūi phah Iâ-pò͘-su lâng, tio̍h tùi chúi-kau chiūⁿ khì phah Tāi-pı̍t ê sim só͘ òan-hūn pái-kha-ê, chhiⁿ-mî-ê. Tùi án-ni ū sio̍k-gú kóng, Ū chhiⁿ-mî pái-kha-ê; lâng bōe-ōe jı̍p chhù.

9

Tāi-pı̍t tiàm tī ōe-só͘, chheng hit só͘-chāi chòe Tāi-pı̍t ê siâⁿ. Tāi-pı̍t tùi Bí-lô sì-ûi khí-chō, iā ǹg lāi-bīn.

10

Tāi-pı̍t ná-kú ná kiông-sēng, in-ūi Iâ-hô-hoa bān-kun ê Siōng-tè kap i tī-teh.

11

Chhui-lô ông Hi-lân chhe sù-chiá tòa pek-hiuⁿ-chhâ kap ba̍k-chhiūⁿ chio̍h-chhiūⁿ kàu Tāi-pı̍t hia. In kā Tāi-pı̍t khí chhù.

12

Tāi-pı̍t chai Iâ-hô-hoa tiāⁿ-tio̍h siat-lı̍p i chòe Í-sek-lia̍t ông; koh ūi-tio̍h I ê peh-sìⁿ Í-sek-lia̍t lâi heng-khí i ê kok.

13

Tāi-pı̍t tùi Hi-pek-lûn lâi liáu-āu, tùi Iâ-lō͘-sat-léng koh lı̍p hō͘-hui. Tāi-pı̍t koh siⁿ kiáⁿ, cha-bó͘-kiáⁿ.

14

Tī Iâ-lō͘-sat-léng só͘ siⁿ ê kiáⁿ chiū-sī Sa-bó͘-a, Sok-pā, Ná-tan, Só͘-lô-bûn;

15

Ek-hat, Í-lī-su-a, Nî-húi, Ngá-hui-a;

16

Í-lī-sa-má, Í-lī-ngá-tāi, Í-lī-hoat-lia̍t.

17

Hui-lī-sū lâng thiaⁿ-kìⁿ lâng ēng iû boah Tāi-pı̍t chòe Í-sek-lia̍t ông; Hui-lī-sū ê chèng-lâng chiū chiūⁿ-lâi siàu-siūⁿ Tāi-pı̍t. Tāi-pı̍t thiaⁿ-kìⁿ chiū lo̍h-khì kàu iâⁿ-chē.

18

Hui-lī-sū lâng í-keng lâi, pò͘-tì tī Lī-ho̍at-im ê soaⁿ-kok.

19

Tāi-pı̍t mn̄g Iâ-hô-hoa kóng, Góa thang chiūⁿ--khì kong Hui-lī-sū lâng mah? Lí beh chiong in kau tī góa ê chhiú mah? Iâ-hô-hoa kā Tāi-pı̍t kóng, Lí thang chiūⁿ--khì, in-ūi Góa tek-khak beh chiong Hui-lī-sū lâng kau tī lí ê chhiú.

20

Tāi-pı̍t lâi kàu Pa-le̍k-pí-la̍h-sim; Tāi-pı̍t tī-hia phah in, kóng, Iâ-hô-hoa tī góa ê bīn-chêng chhiong-sòaⁿ góa ê tùi-te̍k, chhin-chhiūⁿ chúi ê chhiong-sòaⁿ chı̍t-iūⁿ; só͘-í miâ hit só͘-chāi chòe Pa-le̍k-pí-la̍h-sim.

21

In khì-sak in ê ngó͘-siōng tī-hia; Tāi-pı̍t kap tè i ê lâng khioh i khì.

22

Hui-lī-sū lâng koh chiūⁿ--lâi, pò͘-tì tī Lī-ho̍at-im ê soaⁿ-kok.

23

Tāi-pı̍t mn̄g Iâ-hô-hoa; Iâ-hô-hoa kóng, M̄-thang tı̍t-tı̍t chiūⁿ--khì, tio̍h oan kàu in ê āu-bīn, tùi sng-châi-chhiū tùi-bīn phah in;

24

lí thiaⁿ-kìⁿ tī sng-châi-chhiū bé, ū kha-pō͘ siaⁿ, chiū tio̍h kóaⁿ-kín chìn-hêng, in-ūi hit-sî Iâ-hô-hoa í-keng tùi lín ê thâu-chêng chhut-khì, kong-kek Hui-lī-sū lâng ê kun-tūi.

25

Tāi-pı̍t chiū chiàu Iâ-hô-hoa só͘ hoan-hù-ê khì kiâⁿ, kong-kek Hui-lī-sū lâng, tùi Ka-pa kàu Ki-sek.