Sat-bó͘-jíⁿ hā-kòan 第 6 章 - 巴克禮全羅

1

Tāi-pı̍t koh chū-chı̍p Í-sek-lia̍t tiong só͘ kéng ê saⁿ-bān lâng.

2

Tāi-pı̍t khí-sin chhōa tè i ê chèng peh-sìⁿ, tùi Pa-la̍h Iû-tāi khì, beh tùi hia kng Siōng-tè ê kūi lâi; chit ê kūi ê miâ sī ēng chē tī nn̄g ê ki-lō͘-peng ê tiong-kan bān-kun ê Iâ-hô-hoa ê miâ lâi chheng--ê.

3

In hē Siōng-tè ê kūi tī sin ê chhia, tùi soaⁿ-téng A-pí-ná-ta̍t ê ke chài--chhut-lâi; A-pí-ná-ta̍t nn̄g ê kiáⁿ, Ou-sat kap A-hi-iok, kóaⁿ hit ê sin-chhia.

4

In chiong i kap Siōng-tè ê iok-kūi, tùi soaⁿ-téng A-pí-ná-ta̍t ê ke chài--chhut-lâi. A-hi-iok kiâⁿ tī kūi ê thâu-chêng.

5

Tāi-pı̍t kap Í-sek-lia̍t ê chôan-ke, tī Iâ-hô-hoa ê bīn-chêng ēng siōng-chhâ só͘ cho ta̍k-hō ê ga̍k-khì, kap khîm, sek, lin-long-kó͘ tōa-kó͘, po̍at, lâi chok-ga̍k thiàu-bú.

6

In kàu Ná-kùn ê gō͘-kak-tiûⁿ, Ou-sat chhun-chhiú hû Siōng-tè ê iok-kūi, in-ūi gû tio̍h-tak.

7

Iâ-hô-hoa siū-khì Ou-sat; Siōng-tè tī-hia in-ūi i ê chhò-gō͘ lâi phah i, i chiū sí tī-hia, tī Siōng-tè ê kūi-piⁿ.

8

In-ūi Iâ-hô-hoa hut-jiân phah-sí Ou-sat, Tāi-pı̍t bô hoaⁿ-hí; chiū chheng hit só͘-chāi chòe Pí-lia̍t-su-o͘-sat, kàu kin-á-jı̍t.

9

Tng hit-jı̍t Tāi-pı̍t kiaⁿ Iâ-hô-hoa, kóng, Iâ-hô-hoa ê kūi thái-thó thang kàu góa ê só͘-chāi.

10

Tùi án-ni Tāi-pı̍t m̄-khéng chiong Iâ-hô-hoa ê kūi kng jı̍p Tāi-pı̍t ê siâⁿ, kàu ka-kī ê só͘-chāi; Tāi-pı̍t chiū kng i oat-jı̍p Ka-te̍k lâng Gô-piat-í-tong ê ke.

11

Iâ-hô-hoa ê kūi tiàm tī Ka-te̍k lâng Gô-piat-í-tong ê chhù saⁿ ge̍h-jı̍t, Iâ-hô-hoa sù hok-khì hō͘ Gô-piat-í-tong kap i ê chôan-ke.

12

Ū lâng kā Tāi-pı̍t ông kóng, Iâ-hô-hoa in-ūi Siōng-tè ê kūi, sù-hok tī Gô-piat-í-tong ê ke, kap kìⁿ-nā sio̍k tī i ê. Tāi-pı̍t chiū khì, hoaⁿ-hí kng Siōng-tè ê kūi tùi Gô-piat-í-tong ê chhù, kàu Tāi-pı̍t ê siâⁿ.

13

Kng Iâ-hô-hoa iok-kūi ê lâng kiâⁿ la̍k-pō͘, Tāi-pı̍t chiū hiàn chı̍t chiah gû, kap chı̍t chiah pûi ê cheng-siⁿ, chòe chè-sū.

14

Tāi-pı̍t tī Iâ-hô-hoa ê bīn-chêng chīn-la̍t thiàu-bú. Tāi-pı̍t hâ iù-tōe-pò͘ ê í-hut-tek.

15

Án-ni Tāi-pı̍t kap Í-sek-lia̍t chôan-ke kng Iâ-hô-hoa ê kūi chiūⁿ--lâi, chhut hoaⁿ-hí ê siaⁿ, pûn sàu-kak.

16

Iâ-hô-hoa ê kūi jı̍p Tāi-pı̍t siâⁿ ê sî, Sò-lô ê cha-bó͘-kiáⁿ Bí-kah tùi thang-á-mn̂g khòaⁿ, khòaⁿ-kìⁿ Tāi-pı̍t chông--khí-lâi thiàu-bú tī Iâ-hô-hoa ê bīn-chêng, sim chiū khòaⁿ-khin i.

17

In kng Iâ-hô-hoa ê kūi jı̍p--khì, hē tī i ê só͘-chāi, chiū-sī Tāi-pı̍t só͘ ūi i tah ê pò͘-pîⁿ; Tāi-pı̍t tī Iâ-hô-hoa ê bīn-chêng hiàn sio-chè kap siā-un-chè.

18

Tāi-pı̍t hiàn sio-chè kap siā-un-chè bêng-pe̍k, chiū ēng bān-kun Iâ-hô-hoa ê miâ kā peh-sìⁿ chiok-hok.

19

Koh tī hiah ê chèng peh-sìⁿ, chiū-sī Í-sek-lia̍t chèng-lâng, bô-lūn lâm-lú, múi-lâng pun hō͘ in chı̍t ê piáⁿ, chı̍t tè bah, chı̍t ê phû-tô-koaⁿ piáⁿ; chèng peh-sìⁿ chiū khì, ta̍k-lâng tò-khì in ê chhù.

20

Tāi-pı̍t tò-khì beh kā i ê ke-kòan chiok-hok, Sò-lô ê cha-bó͘-kiáⁿ Bí-kah chhut-lâi ngiâ-chih Tāi-pı̍t, kóng, Í-sek-lia̍t ông kin-á-jı̍t ū jōa-tōa êng-kng ah! kin-á-jı̍t lō͘-thé tī jîn-sîn ê lú-pī ba̍k-chiu chêng, chhin-chhiūⁿ chı̍t ê bô hē-lo̍h lâng bô ùi kiàn-siàu lō͘-thé chı̍t-iūⁿ.

21

Tāi-pı̍t kā Bí-kah kóng, Che sī tī Iâ-hô-hoa ê bīn-chêng, I kéng góa pôaⁿ-kè lí ê lāu-pē kap i ê chôan-ke, siat-lı̍p góa chòe Iâ-hô-hoa ê peh-sìⁿ Í-sek-lia̍t ê kun-ông, só͘-í góa beh tī Iâ-hô-hoa ê bīn-chêng thiàu-bú;

22

góa beh pí chit-ê koh khah chho͘-sio̍k, ka-kī khòaⁿ-chòe pi-chiān; lí só͘ kóng hiah ê lú-pī, góa beh siū in chun-tiōng.

23

Tùi án-ni Sò-lô ê cha-bó͘-kiáⁿ Bí-kah kàu sí ê jı̍t bô siⁿ kiáⁿ-jî.