Sat-bó͘-jíⁿ hā-kòan 第 7 章 - 巴克禮全羅

1

Tng ông tiàm tī chhù-lāi, Iâ-hô-hoa iā í-keng hō͘ i thoat-lī sì-ûi ê tùi-te̍k, tit-tio̍h an-chēng ê sî,

2

ông kā sian-ti Ná-tan kóng, Khòaⁿ ah, góa tiàm tī pek-hiuⁿ-chhâ ê chhù-lāi, chóng-sī Siōng-tè ê kūi tiàm tī tiùⁿ-lî-lāi.

3

Ná-tan tùi ông kóng, Kìⁿ-nā lí ê sim só͘-siūⁿ-ê, thang khì chòe; in-ūi Iâ-hô-hoa kap lí tī-teh.

4

Hit-mî Iâ-hô-hoa ê ōe lîm-kàu Ná-tan kóng,

5

Lí khì kā Góa ê lô͘-po̍k Tāi-pı̍t kóng, Iâ-hô-hoa án-ni kóng, Lí beh khí chhù hō͘ Góa khiā-khí mah?

6

Tùi Góa chhōa Í-sek-lia̍t lâng chhut Ai-kı̍p ê jı̍t kàu kin-á-jı̍t, Góa bē-bat tiàm tī chhù--nih, siông-siông kiâⁿ tī pò͘-pîⁿ kap hōe-bō͘.

7

Kìⁿ góa kap Í-sek-lia̍t lâng só͘ kiâⁿ-kàu ê só͘-chāi, kiám bat tùi Í-sek-lia̍t chı̍t chi-phài ê sū-su, chiū-sī Góa bēng-lēng chiàu-kò͘ Góa ê peh-sìⁿ Í-sek-lia̍t ê, kóng, Lín siáⁿ-sū bô kā Góa khí pek-hiuⁿ-chhâ ê chhù ah?

8

Taⁿ lí tio̍h kā Góa ê lô͘-po̍k Tāi-pı̍t kóng, Bān-kun ê Iâ-hô-hoa án-ni kóng, Góa tùi iûⁿ-tiâu-tiong, lí teh thàn iûⁿ-kûn, kéng lí, chòe Góa ê peh-sìⁿ Í-sek-lia̍t ê kun-ông.

9

Lí bô-lūn khì toh-lo̍h, Góa siông-siông kap lí tī-teh, tī lí ê bīn-chêng chián-tû lí it-chhè ê tùi-te̍k. Góa tek-khak hō͘ lí tit-tio̍h tōa-miâ, chhin-chhiūⁿ sè-chiūⁿ hiah ê úi-jîn ê tōa-miâ chı̍t-iūⁿ.

10

Góa beh ūi-tio̍h Góa ê peh-sìⁿ Í-sek-lia̍t tiāⁿ-tio̍h chı̍t ê só͘-chāi, chai-pôe in, hō͘ in tiàm tī ka-kī ê só͘-chāi, bô koh chhian-sóa, hiong-ok ê lūi bô chhin-chhiūⁿ chá-chêng kiáu-jiáu in,

11

iā bô chhin-chhiūⁿ tùi Góa bēng-lēng sū-su kóan-lí Góa ê peh-sìⁿ Í-sek-lia̍t ê jı̍t; Góa beh hō͘ lí thoat-lī it-chhè ê tùi-te̍k, tit-tio̍h an-chēng. Koh Iâ-hô-hoa kā lí kóng, Iâ-hô-hoa beh kā lí kiàn-lı̍p ke.

12

Kàu lí ê jı̍t-chí í-keng móa, lí kap lí ê lia̍t-chó͘ saⁿ-kap khùn ê sî, Góa beh siat-lı̍p lí só͘ chhut ê hō͘-è lâi sòa-chiap lí, Góa iā beh kian-kò͘ i ê kok;

13

i beh ūi Góa ê miâ khí tiān; Góa beh kian-kò͘ i ê kok-ūi, tı̍t-kàu éng-óan.

14

Góa beh chòe i ê pē, i beh chòe Góa ê kiáⁿ; i nā hōan-chōe, Góa beh ēng lâng ê kóaiⁿ, sè-kan lâng ê piⁿ, chek-tok i.

15

Chóng-sī Góa ê chû-ài bô beh lī-khui i, chhin-chhiūⁿ Góa hō͘ i lī-khui Sò-lô, chiū-sī Góa só͘ khì-sak tī lí ê bīn-chêng ê.

16

Lí ê ke kap lí ê kok, beh éng-óan kiàn-lı̍p tī lí ê bīn-chêng; lí ê kok-ūi iā beh kian-kò͘ kàu éng-óan.

17

Ná-tan chiu chiàu che it-chhè ê ōe, chiàu che it-chhè ê khé-sī, án-ni kā Tāi-pı̍t kóng.

18

Tāi-pı̍t ông chiū jı̍p--khì, chē tī Iâ-hô-hoa ê bīn-chêng, kóng, Chú Iâ-hô-hoa ah, góa sī chī-chūi, góa ê ke sǹg-chòe sím-mı̍h, Lí kèng-jiân chhōa góa kàu chit ê tōe-ūi ah?

19

Chú Iâ-hô-hoa ah, che Lí iáu khòaⁿ-chòe sió-khóa, Lí koh lūn-kàu Lí ê lô͘-po̍k ê ke kàu tī kú-tn̂g; Chú Iâ-hô-hoa ah, che sī jîn-kan ê lē.

20

Tāi-pı̍t iáu ū sím-mı̍h ōe thang tùi Lí kóng ah? Chú Iâ-hô-hoa ah, Lí chai Lí ê lô͘-po̍k.

21

Ūi-tio̍h Lí ê ōe, koh chiàu Lí ê sim, Lí kiâⁿ che it-chhè ê tōa-sū, hō͘ Lí ê lô͘-po̍k chai;

22

Iâ-hô-hoa Siōng-tè ah, Lí sī chì-tōa; chiàu góan ê hī-khang só͘ thiaⁿ-kìⁿ ê, bô chı̍t-ê ōe pí-tit Lí, Lí í-gōa bô ū Siōng-tè.

23

Tōe-chiūⁿ ū sím-mı̍h kok chhin-chhiūⁿ Lí ê peh-sìⁿ Í-sek-lia̍t ah? chiū-sī Siōng-tè khì kiù-sio̍k i, kui tī ka-kī chòe peh-sìⁿ, hō͘ I ū miâ-siaⁿ, koh tī Lí ê peh-sìⁿ ê bīn-chêng, chiū-sī Lí tùi Ai-kı̍p, kap lia̍t-pang, í-kı̍p in hiah ê siōng-tè só͘ kiù-sio̍k chhut-lâi ê, ūi-tio̍h lín kiâⁿ tōa ê tāi-chì, ūi-tio̍h Lí ê tōe chòe thang kiaⁿ ê sū ah?

24

Lí bat ūi ka-kī kiàn-lı̍p Lí ê peh-sìⁿ Í-sek-lia̍t éng-óan chòe Lí ê peh-sìⁿ; Iâ-hô-hoa ah, Lí iā chòe in ê Siōng-tè.

25

Iâ-hô-hoa Siōng-tè ah, taⁿ Lí só͘ lūn-kàu Lí ê lô͘-po̍k, kap Lí ê lô͘-po̍k ê ke, gōan Lí éng-óan kian-kò͘ i, chiàu Lí só͘-kóng-ê lâi kiâⁿ.

26

Gōan lâng éng-éng chun Lí ê miâ chòe-tōa, kóng, Bān-kun ê Iâ-hô-hoa sī kóan-lí Í-sek-lia̍t ê Siōng-tè; koh Lí ê lô͘-po̍k Tāi-pı̍t ê ke beh tī Lí ê bīn-chêng kian-kò͘.

27

Bān-kun ê Iâ-hô-hoa, Í-sek-lia̍t ê Siōng-tè ah, in-ūi Lí khé-sī Lí ê lô͘-po̍k, kóng, Góa beh kā lí kiàn-lı̍p ke, só͘-í Lí ê lô͘-po̍k hó-táⁿ ēng chit ê kî-tó lâi tùi Lí kî-tó.

28

Taⁿ Chú Iâ-hô-hoa ah, Lí sī Siōng-tè ah, Lí ê ōe sī chin-sı̍t, Lí iā ēng chit ê hok-khì èng-ún Lí ê lô͘-po̍k;

29

taⁿ kiû Lí sù-hok Lí ê lô͘-po̍k ê ke, hō͘ i éng-óan tī Lí ê bīn-chêng; Chú Iâ-hô-hoa ah, in-ūi Lí ū kóng i, gōan Lí ê lô͘-po̍k ê ke tùi Lí ê sù-ho̍k lâi tit-tio̍h hok-khì, kàu éng-óan.