Sat-bó͘-jíⁿ hā-kòan 第 8 章 - 巴克禮全羅

1

Chit-tia̍p liáu-āu Tāi-pı̍t phah Hui-lī-sū lâng, hō͘ in hâng-ho̍k; Tāi-pı̍t koh tùi Hui-lī-sū lâng ê chhiú chhú Bí-tek-an-má.

2

Koh phah Mô͘-ap, hō͘ in tó tī tōe--nih, ēng soh niû i, niû nn̄g tiâu soh-ê hō͘ i sí, niû móa chı̍t tiâu soh-ê hō͘ i o̍ah; Mô͘-ap lâng chiū kui-ho̍k Tāi-pı̍t, lâi chìn-kòng.

3

Tāi-pı̍t phah Só-pa ông Lī-ha̍p ê kiáⁿ Hap-tāi-tí-siā, tī i khì Tōa-hô, beh khoe-ho̍k i ê kôan ê sî.

4

Tāi-pı̍t lia̍h i ê bé-peng chı̍t-chheng chhit pah, pō͘-peng nn̄g-bān; Tāi-pı̍t chiong i chiàn-chhia ê bé koah-tn̄g i ê kha-kun; chí-ū lâu chı̍t-pah tiuⁿ chhia ê bé.

5

Tāi-má-sek ê A-lân lâng lâi pang-chān Só-pa ông Hap-tāi-tí-siā, Tāi-pı̍t chiū thâi-sí A-lân lâng nn̄g-bān nn̄g-chheng.

6

Tùi án-ni Tāi-pı̍t tī Tāi-má-sek ê A-lân siat-lı̍p kun-iâⁿ. A-lân lâng chiū kui-ho̍k Tāi-pı̍t, lâi chìn-kòng. Tāi-pı̍t bô-lūn khì toh-lo̍h, Iâ-hô-hoa lóng hō͘ i khah-iâⁿ.

7

Tāi-pı̍t chhú Hap-tāi-tí-siā hiah ê jîn-sîn só͘ kōaⁿ kim ê pîn-pâi, tòa kàu Iâ-lō͘-sat-léng.

8

Tāi-pı̍t ông koh tùi sio̍k Hap-tāi-tí-siā ê Pí-tha kap Pí-lô-tha ê siâⁿ, tit-tio̍h chōe-chōe tâng.

9

Hap-ná ông Tô-í thiaⁿ-kìⁿ Tāi-pı̍t phah-iâⁿ Hap-tāi-tí-siā ê chôan-kun;

10

Tô-í chiū chhe i ê kiáⁿ Iok-lân khì kìⁿ Tāi-pı̍t ông, chhéng-an i, kā i chiok-hok, in-ūi i phah-iâⁿ Hap-tāi-tí-siā; in-ūi Hap-tāi-tí-siā kap Tô-í siông-siông kau-chiàn. Iok-lân ê chhiú iā tòa gûn-khì, kim-khì, tâng-khì.

11

Tāi-pı̍t ông chiū ēng chiah ê mı̍h chòe-sèng, hiàn hō͘ Iâ-hô-hoa, chhin-chhiūⁿ chêng ēng i só͘ khah-iâⁿ lia̍t-kok ê kim-gûn chòe-sèng lâi hiàn chı̍t-iūⁿ;

12

chiū-sī tùi A-lân, Mô͘-ap, A-bûn lâng, Hui-lī-sū lâng, A-má-le̍k, só͘ tit-tio̍h ê, í-kı̍p tùi Só-pa ông Lī-ha̍p ê kiáⁿ Hap-tāi-tí-siā só͘ chhiúⁿ ê.

13

Tāi-pı̍t tī Iâm ê soaⁿ-kok phah-sí A-lân chı̍t-bān poeh-chheng lâng; tò--lâi ê sî, chiū tit-tio̍h tōa miâ-siaⁿ.

14

Koh i tī Í-tong siat kun-iâⁿ; chiū-sī tī Í-tong chôan-tōe siat kun-iâⁿ. Í-tong lâng chiū lóng kui-ho̍k Tāi-pı̍t. Tāi-pı̍t bô-lūn khì toh-lo̍h, Iâ-hô-hoa lóng hō͘ i khah-iâⁿ.

15

Tāi-pı̍t chòe Í-sek-lia̍t chèng-lâng ê ông. Tāi-pı̍t péng-kong kiâⁿ-gī tī i ê chèng peh-sìⁿ.

16

Sé-ló͘-ngá ê kiáⁿ Iok-ap chòe kun-tiúⁿ; A-hi-lu̍t ê kiáⁿ Iok-sa-hoat chòe sú-koaⁿ.

17

A-hi-tu̍t ê kiáⁿ Sat-tok kap A-pí-a-tha ê kiáⁿ A-hi-bí-le̍k chòe chè-si; Se-lâi-ngá chòe su-kì;

18

Iâ-hô-iâ-tāi ê kiáⁿ Pí-ná-ngá thóng-hat Ki-lī-thê lâng, kap Pí-lí-thê lâng; Tāi-pı̍t hiah ê kiáⁿ chòe léng-siù.