Sat-bó͘-jíⁿ hā-kòan 第 11 章 - 巴克禮全羅

1

Nî-thâu, lia̍t-ông chhut-chiàn ê sî, Tāi-pı̍t chhe Iok-ap kap i ê jîn-sîn, kap Í-sek-lia̍t ê chèng-lâng, chhut-khì; in chiū thâi-iâⁿ A-bûn lâng, ûi-kong La̍h-pa. Tāi-pı̍t iû-gôan tiàm tī Iâ-lō͘-sat-léng.

2

Ū chı̍t-jı̍t beh àm ê sî, Tāi-pı̍t tùi chhn̂g--nih khí-lâi, tī ông-kiong ê chhù-téng kiâⁿ-lâi kiâⁿ-khì; tùi chhù-téng khòaⁿ-kìⁿ chı̍t ê hū-jîn-lâng teh sóe-e̍k; hū-jîn-lâng siⁿ-chòe chin-súi.

3

Tāi-pı̍t ūi-tio̍h hit ê hū-jîn-lâng chiū chhe lâng khì thàm-thiaⁿ; ū lâng kóng, I kiám-m̄-sī Í-liân ê cha-bó͘-kiáⁿ, Hek-lâng Ou-lī-à ê bó͘, Po̍at-sī-pa mah?

4

Tāi-pı̍t chhe sù-chiá khì chhōa i lâi, i chiū lâi kàu i hia, Tāi-pı̍t kap i tâng-pâng; (hū-jîn-lâng chheng-khì i ê bô chheng-khì;) chiū tò-khì in chhù.

5

Hū-jîn-lâng hôai-īn, chhe lâng kā Tāi-pı̍t kóng, Góa í-keng hôai-īn.

6

Tāi-pı̍t chhe lâng kàu Iok-ap hia, kóng, Lí chhe Hek-lâng Ou-lī-à lâi góa chia. Iok-ap chiū chhe Ou-lī-à khì kìⁿ Tāi-pı̍t.

7

Ou-lī-à í-keng lâi i hia, Tāi-pı̍t mn̄g-khòaⁿ Iok-ap hó mah? peh-sìⁿ hó mah? kau-chiàn hó-sè mah?

8

Tāi-pı̍t kā Ou-lī-à kóng, Lí lo̍h--khì lín tau sóe-kha. Ou-lī-à chhut ông-kiong liáu-āu, ông chiū sàng chı̍t-hūn chia̍h-mı̍h hō͘ i.

9

Chóng-sī Ou-lī-à kap i chú-lâng ê lô͘-po̍k saⁿ-kap khùn tī ông-kiong ê mn̂g-kháu, bô lo̍h-khì in tau.

10

Ū lâng kā Tāi-pı̍t kóng, Ou-lī-à bô lo̍h-khì i ê chhù. Tāi-pı̍t chiū mn̄g Ou-lī-à kóng, Lí kiám-m̄-sī tùi hn̄g-lō͘ lâi mah? siáⁿ-sū m̄ lo̍h-khì lí ê ke ah?

11

Ou-lī-à tùi Tāi-pı̍t kóng, Iok-kūi kap Í-sek-lia̍t kap Iû-tāi lóng tiàm tī chháu-liâu-á; góa ê chú Iok-ap, kap góa ê chú ê lô͘-po̍k, lóng chat-iâⁿ tī chhân-iá; góa kiám thang tò--khì góa ê ke lim-chia̍h, kap góa ê bó͘ saⁿ-kap khùn mah? góa chí lí ê o̍ah, kap lí lêng-hûn ê o̍ah lâi chiù-chōa, góa koat-tòan bô beh kiâⁿ chı̍t ê sū.

12

Tāi-pı̍t kā Ou-lī-à kóng, Lí kin-á-jı̍t iû-gôan tòa chia, bîn-á-chài góa hō͘ lí khì. Ou-lī-à chiū tī hit-jı̍t kap tē-jī jı̍t tòa tī Iâ-lō͘-sat-léng.

13

Tāi-pı̍t kiò Ou-lī-à lâi, i chiū tī i ê bīn-chêng lim-chia̍h; i hō͘ i chùi; í-keng àm, Ou-lī-à chhut-khì i ê chhn̂g--nih khùn, kap i ê chú chiah ê lô͘-po̍k saⁿ-kap chòe-phōaⁿ; iā bô lo̍h-khì in tau.

14

Keh chá-khí Tāi-pı̍t siá chı̍t tiuⁿ phoe hō͘ Iok-ap, thok Ou-lī-à ê chhiú tòa--khì.

15

Phoe-lāi siá kóng, Tio̍h phài Ou-lī-à tī tīn-chêng ke̍k gûi-kip ê só͘-chāi, lín chiū tùi i ê āu-bīn thè--lâi, hō͘ i siū phah-sí.

16

Iok-ap ûi-siâⁿ ê sî, tī i só͘ chai ū ióng-sū ê só͘-chāi, chiū phài Ou-lī-à tī-hia.

17

Siâⁿ-lāi ê lâng ū chhut-lâi kap Iok-ap kau-chiàn; Tai-pı̍t ê lô͘-po̍k sí kúi-nā lâng, Hek-lâng Ou-lī-à iā sí.

18

Iok-ap chhe lâng ēng kau-chiàn ê sū lóng kā Tāi-pı̍t kóng;

19

chiū hoan-hù sù-chiá kóng, Lí ēng kau-chiàn it-chhè ê sū kā ông kóng bêng-pe̍k,

20

ông nā siū-khì, kā lín kóng, Lín kau-chiàn ê sî, siáⁿ-sū pek-kūn siâⁿ-chhiûⁿ? kiám m̄-chai in ōe tùi siâⁿ-téng siā-chìⁿ mah?

21

Chêng phah-sí Iâ-lō͘-pí-siat ê kiáⁿ A-pí-bí-le̍k-ê sī chī-chūi? kiám-m̄-sī chı̍t ê hū-jîn-lâng, tùi chhiûⁿ-téng hiat chio̍h-bō ê téng-tún tī i ê téng-bīn, hō͘ i sí tī Thê-pī-su mah? lín siáⁿ-sū pek-kūn siâⁿ ah? lí tio̍h kóng, Lí ê lô͘-po̍k Hek-lâng Ou-lī-à iā sí.

22

Sù-chiá khì, chiàu Iok-ap it-chhè só͘ bēng-lēng-ê lâi kā Tāi-pı̍t kóng.

23

Sù-chiá kā Tāi-pı̍t kóng, Tùi-te̍k pí góan khah-kiông, chhut-lâi kau-iá kong-kek góan, góan phah i kàu siâⁿ-mn̂g-kháu.

24

Siā-chìⁿ ê lâng tùi chhiûⁿ-téng siā lí ê lô͘-po̍k; ông ê lô͘-po̍k sí kúi-nā lâng, lí ê lô͘-po̍k Hek-lâng Ou-lī-à iā sí.

25

Tāi-pı̍t kā hit ê sù-chiá kóng, Lí tio̍h án-ni kā Iok-ap kóng, M̄-bián khòa-lū chit ê sū, in-ūi to-kiàm thâi-sí lâng, chit-ê hit-ê bô it-tēng; lí tio̍h koh-khah chīn-la̍t kong-siâⁿ, lâi chhia-tó i; tio̍h án-ni bián-lē i.

26

Ou-lī-à ê bó͘ thiaⁿ-kìⁿ tiōng-hu Ou-lī-à í-keng sí, chiū ūi i ê tiōng-hu thî-khàu.

27

Teng-iu í-keng bêng-pe̍k, Tāi-pı̍t chhe lâng chhōa i kàu kiong-lāi; i chiū chòe i ê bó͘, kā i siⁿ chı̍t ê kiáⁿ. Chóng-sī Tāi-pı̍t só͘ kiâⁿ ê sū, Iâ-hô-hoa chin bô hoaⁿ-hí.