Sat-bó͘-jíⁿ hā-kòan 第 12 章 - 巴克禮全羅

1

Iâ-hô-hoa chhe Ná-tan khì kìⁿ Tāi-pı̍t; i kàu i hia, kā i kóng, Tī chı̍t ê siâⁿ ū nn̄g-lâng, chı̍t-ê hó-gia̍h, chı̍t-ê sòng-hiong.

2

Hó-gia̍h-ê ū gû iûⁿ chin-chōe;

3

sòng-hiong lâng bô sím-mı̍h, chí-ū chı̍t chiah iûⁿ-chéng-á, chiū-sī i só͘ bóe lâi chhī ê, i kap i tī-hia, kap i ê kiáⁿ saⁿ-kap tióng-tōa, chia̍h i só͘ chia̍h-ê, lim i ê poe, khùn tī i ê heng-chêng, khòaⁿ i chhin-chhiūⁿ ka-kī ê cha-bó͘-kiáⁿ.

4

Ū chı̍t ê chhut-gōa lâng kàu hó-gia̍h lâng hia, hó-gia̍h lâng m̄-kam tùi i ê iûⁿ-kûn gû-kûn chhú lâi pī-pān hō͘ lâng-kheh chia̍h; hóan-tńg chhú sòng-hiong lâng ê iûⁿ-á, pī-pān lâi hō͘ lâng-kheh chia̍h.

5

Tāi-pı̍t tōa siū-khì hit-lâng, kā Ná-tan kóng, Góa kí éng-o̍ah ê Iâ-hô-hoa lâi chiù-chōa, kiâⁿ chit ê tāi-chì ê lâng tio̍h sí;

6

tio̍h pê i ê iûⁿ-á sì-pē; in-ūi i kiâⁿ chit ê sū, iā in-ūi i bô lîn-bín ê sim.

7

Ná-tan kā Tāi-pı̍t kóng, Lí chiū-sī hit-lâng. Iâ-hô-hoa Í-sek-lia̍t ê Siōng-tè án-ni kóng, Góa ēng iû boah lí chòe Í-sek-lia̍t ê ông, kiù lí thoat-lī Sò-lô ê chhiú.

8

Góa koh ēng lí ê chú ê chhù-the̍h hō͘ lí, ēng lí ê chú hiah ê bó͘ kau tī lí ê heng-chêng; koh ēng Í-sek-lia̍t kap Iû-tāi ke hō͘ lí; chiah-ê nā iáu lia̍h-chòe sió-khóa, Góa ōe ke-thiⁿ chit-hō hit-hō hō͘ lí.

9

Lí siáⁿ-sū khòaⁿ-khin Iâ-hô-hoa ê bēng-lēng, kiâⁿ I só͘ khòaⁿ-chòe pháiⁿ ê sū? lí ēng to thâi-sí Hek-lâng Ou-lī-à, chiū-sī chioh A-bûn lâng ê to thâi-sí i, koh chhōa i ê bó͘ chòe lí ê bó͘.

10

Taⁿ to-kiàm beh éng-óan bô lī-khui lí ê ke, in-ūi lí khòaⁿ-khin Góa, chhōa Hek-lâng Ou-lī-à ê bó͘ chòe lí ê bó͘.

11

Iâ-hô-hoa koh án-ni kóng, Khòaⁿ ah, Góa beh tùi lí ê ke heng-khí chai-ē kong-kek lí; Góa beh tī lí ê ba̍k-chiu-chêng, ēng lí hiah ê bó͘ hō͘ lí ê chhù-piⁿ, i beh tī chheng-thian pe̍k-jı̍t kap lí hiah ê bó͘ tâng-pâng.

12

In-ūi lí tī àm-tiong kiâⁿ i, chóng-sī Góa beh tī chheng-thian pe̍k-jı̍t, tī Í-sek-lia̍t chèng-lâng ê bīn-chêng, kiâⁿ chit ê sū.

13

Tāi-pı̍t kā Ná-tan kóng, Góa ū tek-chōe Iâ-hô-hoa. Ná-tan kā Tāi-pı̍t kóng, Iâ-hô-hoa í-keng tû-khì lí ê chōe, lí bōe tì-kàu sí.

14

Chóng-sī in-ūi lí kiâⁿ chit ê sū, hō͘ Iâ-hô-hoa ê tùi-te̍k ū siat-to̍k ê in-iû, só͘-í i kā lí só͘ siⁿ ê kiáⁿ tek-khak sí.

15

Ná-tan chiū tò-khì in chhù. Iâ-hô-hoa phah Ou-lī-à ê bó͘ kā Tāi-pı̍t só͘ siⁿ ê eⁿ-á, i chiū phòa-pīⁿ chin siong-tiōng.

16

Tāi-pı̍t chiū ūi-tio̍h hit ê kiáⁿ kî-tó Siōng-tè. Tāi-pı̍t koh kìm-chia̍h, jı̍p lāi-bīn thong-mî tó tī tōe--nih.

17

I ke-tiong hiah ê lāu-lâng khí-lâi, kàu i ê sin-piⁿ, beh hû i tùi tōe khí-lâi; chóng-sī i m̄-khéng, iā bô beh kap in saⁿ-kap chia̍h.

18

Kàu tē-chhit jı̍t gín-ná sí; Tāi-pı̍t ê jîn-sîn m̄-káⁿ kā i kóng gín-ná sí lah; in-ūi in kóng, Gín-ná iáu o̍ah-teh ê sî, lán khǹg i, i siōng-chhiáⁿ m̄-thiaⁿ lán ê ōe, nā kā i kóng gín-ná sí, i siong-sim beh kàu cháiⁿ-iūⁿ?

19

Tāi-pı̍t khòaⁿ-kìⁿ i ê jîn-sîn chī-bú-chī-chū teh kóng, Tāi-pı̍t chiū chai gín-ná í-keng sí. Tāi-pı̍t chiū mn̄g i ê jîn-sîn kóng, Gín-ná sí--lah mah? In kóng, Sí--lah.

20

Tāi-pı̍t chiū tùi tōe--nih khí-lâi, sóe sin-khu, boah iû, ōaⁿ-saⁿ, jı̍p Iâ-hô-hoa ê tiān kèng-pài; jiân-āu tò-khì i ê chhù. I hoan-hù lâng pâi mı̍h tī i ê bīn-chêng, i chiū chia̍h.

21

Jîn-sîn mn̄g i kóng, Lí só͘ kiâⁿ--ê sī cháiⁿ-iūⁿ? Gín-ná o̍ah--teh ê sî, lí kìm-chia̍h thî-khàu; gín-ná sí, lí hóan-tńg khí-lâi chia̍h.

22

Tāi-pı̍t kóng, Gín-ná iáu o̍ah--teh, góa kìm-chia̍h thî-khàu, in-ūi góa phah-sǹg kóng, Kiám-chhái Iâ-hô-hoa lîn-bín góa, hō͘ gín-ná o̍ah--teh, iā káⁿ.

23

Gín-ná í-keng sí, góa kìm-chia̍h beh siáⁿ-sū? góa kiám ōe hō͘ i tò-tńg--lâi mah? góa beh khì i hia, i bōe-ōe lâi góa chia.

24

Tāi-pı̍t an-ùi i ê bó͘ Po̍at-sī-pa, jı̍p--khì kap i tâng-pâng, i chiū siⁿ-kiáⁿ; chiū kā i hō-miâ kiò Só͘-lô-bûn;

25

Iâ-hô-hoa iā thiàⁿ i, chiū thok sian-ti Ná-tan kā i hō miâ kiò Iâ-tí-tí-a, in-ūi Iâ-hô-hoa thiàⁿ i.

26

Iok-ap kong A-bûn lâng ê La̍h-pa, chhú in ê kiaⁿ-siâⁿ.

27

Iok-ap chhe sù-chiá khì kìⁿ Tāi-pı̍t kóng, Góa kong La̍h-pa, í-keng chhú i ê chúi-siâⁿ.

28

Taⁿ lí tio̍h chū-chı̍p kî-û ê peh-sìⁿ lâi, chat-iâⁿ kong chit ê siâⁿ lâi chhú i; kiaⁿ-liáu góa chhú chit ê siâⁿ, lâng chiū ēng góa ê miâ lâi kiò i.

29

Tāi-pı̍t chiū chū-chı̍p chèng peh-sìⁿ, khì La̍h-pa kong-kek, lâi chhú i.

30

I chhú in ê ông thâu-khak-téng ê bián-liû, i ê kim tāng chı̍t tha-liân-tek, koh siuⁿ pó-chio̍h; chiong chit-ê lâi tì tī Tāi-pı̍t ê thâu-khak. I koh tùi siâⁿ-lāi chhú chin-chōe châi-bu̍t.

31

Koh lia̍h hiah ê siâⁿ ê peh-sìⁿ chhut-lâi, hō͘ in ēng kù-á, kap thih-pē, í-kı̍p thih ê pó͘-thâu chòe khó͘-kang, á-sī tī hiā-iô tio̍h-bôa; i khóan-thāi A-bûn lâng hiah ê siâⁿ lóng sī án-ni. Tāi-pı̍t chiū kap chèng peh-sìⁿ tò-khì Iâ-lō͘-sat-léng.