Sat-bó͘-jíⁿ hā-kòan 第 21 章 - 巴克禮全羅

1

Tī Tāi-pı̍t ê sî ū ki-hng, liân-liân saⁿ-nî; Tāi-pı̍t chiū mn̄g Iâ-hô-hoa. Iâ-hô-hoa kóng, Sī in-ūi Sò-lô kap i ê ke, lâu lâng ê huih ê, in-ūi i thâi-sí Ki-piàn lâng.

2

Ki-piàn lâng pún m̄-sī Í-sek-lia̍t lâng, chiū-sī A-mô͘-lī lâng só͘ chhun ê; Í-sek-lia̍t lâng bat tùi in chiù-chōa, m̄ thâi in; chóng-sī Sò-lô ūi-tio̍h Í-sek-lia̍t lâng kap Iû-tāi lâng jia̍t-sim, siūⁿ kè-bô͘ thâi in; ông chiū tiàu Ki-piàn lâng lâi, kā in kóng.

3

Tāi-pı̍t kā Ki-piàn lâng kóng, Góa tio̍h ūi lín chòe sím-mı̍h? góa tio̍h ēng sím-mı̍h lâi thòe-sio̍k, hō͘ lín chiok-hok Iâ-hô-hoa ê sán-gia̍p ah?

4

Ki-piàn lâng kóng, Góan kap Sò-lô kap i ê ke ê sū bô koan-hē kim-gûn, iā m̄-thang ūi-tio̍h góan ê iân-kò͘ hāi-sí chı̍t ê Í-sek-lia̍t lâng. I kóng, Lín só͘ kóng cháiⁿ-iūⁿ, góa beh ūi lín kiâⁿ i.

5

In tùi ông kóng, Hit ê chiông-chêng húi-hōai góan, bô͘-hāi góan, beh bia̍t góan, hō͘ góan bōe-tit-thang khiā-khí tī Í-sek-lia̍t ê kéng-lāi ê;

6

taⁿ gōan ēng i ê hō͘-è chhit-lâng kau-hù góan, góan beh tī Iâ-hô-hoa ê bīn-chêng, chiong in tiàu tī Iâ-hô-hoa só͘ kéng Sò-lô ê Ki-pí-a. Ông kóng, Góa beh kau-hō͘ lín.

7

Sò-lô ê kiáⁿ Iok-ná-tan, i ê kiáⁿ Bí-hui-pho-siat ông pó-sioh, in-ūi Tāi-pı̍t kap Sò-lô ê kiáⁿ Iok-ná-tan chêng bat kí Iâ-hô-hoa ê miâ lâi chiù-chōa.

8

Chóng-sī ông chiong Ài-ngá ê cha-bó͘-kiáⁿ Lī-su-pa kā Sò-lô só͘ siⁿ nn̄g ê kiáⁿ, A-mô͘-nî, Bí-hui--pho-siat; kap Sò-lô ê cha-bó͘-kiáⁿ Bí-kah kā Bí-hô-la̍h lâng Pa-se-lâi ê kiáⁿ A-tek-lia̍t só͘ siⁿ ê gō͘ ê kiáⁿ,

9

lóng kau tī Ki-piàn lâng ê chhiú, in chiū tiàu in tī soaⁿ--nih, tī Iâ-hô-hoa ê bīn-chêng; chí(**chit) chhit-lâng lóng chòe chı̍t-ē tó--lo̍h-lâi, lóng-chóng sí tī khí-thâu siu-koah ê sî, chiū-sī khí-thâu koah tōa-be̍h ê sî.

10

Ài-ngá ê chá-bó͘-kiáⁿ Lī-su-pa the̍h chho͘-môa-pò͘, ūi ka-kī chhu tī chio̍h-pôaⁿ-téng, tùi khí-thâu siu-koah ê sî, kàu thiⁿ lo̍h hō͘-chúi tī sin-si ê sî; m̄-chún jı̍t-sî khong-tiong ê chiáu, kap mî-sî ê cháu-siù, kàu tī hiah ê sin-si.

11

Ū lâng chiong Sò-lô ê hui Ài-ngá ê cha-bó͘-kiáⁿ Lī-su-pa só͘ chòe ê sū kā Tāi-pı̍t kóng.

12

Tāi-pı̍t chiū khì, tùi Ki-lia̍t-ngá-pí lâng the̍h Sò-lô ê kut, kap i ê kiáⁿ Iok-ná-tan ê kut, in bat tùi Pek-san ê koe-lō͘ thau-the̍h, in-ūi Hui-lī-sū lâng chêng tī Ki-lī-pho thâi-sí Sò-lô ê sî, Hui-lī-sū lâng ū tiàu in tī-hia.

13

I chiū tùi hia tòa Sò-lô ê kut, kap i ê kiáⁿ Iok-ná-tan ê kut, tò-lâi; lâng chiū siu-sı̍p hiah-ê siū tiàu-sí-ê ê kut.

14

Chiū bâi-chòng Sò-lô kap i ê kiáⁿ Iok-ná-tan ê kut tī Piān-ngá-bín tōe ê Sé-la̍h, tī Sò-lô ê pē Ki-sū ê bōng; chiàu ông it-chhè só͘ bēng-lēng ê khì kiâⁿ; chit-tia̍p liáu-āu Siōng-tè ūi-tio̍h hit ê tōe-hng thiaⁿ in ê kî-tó.

15

Hui-lī-sū lâng koh kap Í-sek-lia̍t lâng kau-chiàn. Tāi-pı̍t kap i ê lô͘-po̍k lo̍h-khì, kap Hui-lī-sū lâng kau-chiàn; Tāi-pı̍t chin ià-siān.

16

Ū tōa-hàn-cho̍k ê chı̍t-lâng miâ-kiò Í-sı̍t-pí-lo̍k, i ê chhiuⁿ ê tâng tāng saⁿ-pah sià-khek-le̍k, koh pē sin ê to, beh thâi Tāi-pı̍t.

17

Chóng-sī Sé-ló͘-ngá ê kiáⁿ A-pí-su pó-hō͘ Tāi-pı̍t, phah-sí hit ê Hui-lī-sū lâng. Tng-sî tè Tāi-pı̍t ê lâng tùi i chiù-chōa, kóng, Chit-tia̍p liáu-āu lí m̄-thang koh kap góan chhut-chiàn, kiaⁿ-liáu phah-hoa Í-sek-lia̍t ê teng.

18

Āu-lâi koh kap Hui-lī-sū lâng kau-chiàn tī Ko-pek; hit-sî ū Hō͘-sa lâng Se-pí-kai thâi-sí chı̍t ê tōa-hàn-cho̍k ê lâng, miâ-chòe Sat-hut.

19

Koh-chài tī Ko-pek kap Hui-lī-sū lâng kau-chiàn; Pek-lī-hêng lâng Ngá-lûi-gô-jíⁿ-kim ê kiáⁿ I-le̍k-hap-lân thâi-sí Ka-te̍k lâng Ko-lī-à; i ê chhiuⁿ-pìⁿ chhin-chhiūⁿ pò͘-kui(**ki) ê te̍k-sim.

20

Koh tī Ka-te̍k kau-chiàn; tī-hia ū chı̍t ê tōa-hàn lâng, nn̄g ki chhiú kok ū la̍k ki chńg-thâu-á, nn̄g ki kha kok ū la̍k ki chńg--thâu-á, kiōng ū jī-cha̍p-sì ki; i iā sī tōa-hàn-cho̍k lâng ê kiáⁿ.

21

Chit-lâng biáu-sī Í-sek-lia̍t ê sî, Tāi-pı̍t ê hiaⁿ Sī-bí-a ê kiáⁿ Iok-ná-tan chiū kā i thâi-sí.

22

Chí(**Chit) sì-lâng Ka-te̍k tōa-hàn lâng só͘ siⁿ ê; lóng sí tī Tāi-pı̍t ê chhiú, kap i ê lô͘-po̍k ê chhiú.