Sat-bó͘-jíⁿ hā-kòan 第 22 章 - 巴克禮全羅

1

Tng Iâ-hô-hoa kiù Tāi-pı̍t thoat-lī it-chhè ê tùi-te̍k ê chhiú, kap Sò-lô ê chhiú ê jı̍t, i ǹg Iâ-hô-hoa liām chit ê si ê ōe, kóng,

2

Iâ-hô-hoa sī góa ê soaⁿ-giâm, góa ê iâⁿ-chē, chín-kiù góa ê.

3

Siōng-tè sī góa ê chio̍h-pôaⁿ, góa beh óa-khò I; I sī tîn-pâi, sī chín-kiù góa ê kak, sī góa ê kôaiⁿ-tâi, sī góa ê pī-lān-só͘; Chín-kiù góa ê ah, Lí sī kiù góa thoat-lī kiông-pō ê.

4

Góa beh kiû-kiò Iâ-hô-hoa, I sī eng-kai o-ló ê; Án-ni góa beh tit-tio̍h kiù, thoat-lī góa ê tùi-te̍k.

5

Sí-bô ê chúi-éng ûi góa, Húi-lūi ê hòan-lām hō͘ góa kiaⁿ.

6

Im-kan ê soh tîⁿ góa, Sí-bô ê o̍ah-tauh kàu tī góa.

7

Góa tī hōan-lān tiong kiû-kiò Iâ-hô-hoa, Góa kiû-kiò góa ê Siōng-tè. I tùi tiān--nih thiaⁿ góa ê siaⁿ, Góa ê kiû-kiò jı̍p I ê hī-khang.

8

Tōe chiū tín-tāng iô-choah, Thiⁿ ê kun-ki iā gī-gī-chùn, Ūi-tio̍h I ê siū-khì lâi tín-tāng.

9

Tùi I ê phīⁿ-khang ū ian chhèng chiūⁿ-khì, Tùi I ê chhùi ū chhut sio-bia̍t ê hé, Thòaⁿ tùi án-ni to̍h.

10

I hō͘ thiⁿ kē--lo̍h-lâi, chiū kàng-lîm, Tī I ê kha-ē ū o͘-hûn.

11

I khiâ ki-lō͘-peng teh pe, Tī hong ê sı̍t-téng hián-hiān.

12

I ēng o͘-àm chòe chiu-ûi ê tiùⁿ-pâng, Chiū-sī chū-chı̍p ê chúi, kap khong-tiong ê ba̍t-hûn.

13

In-ūi I bīn-chêng ê kng, Hé-thòaⁿ chiū to̍h--khí-lâi.

14

Iâ-hô-hoa tùi thiⁿ khí lûi, Chì-kôaiⁿ--ê hoat-chhut I ê siaⁿ.

15

I siā chìⁿ lâi kóaⁿ-sòaⁿ in, Sih-nà lâi hō͘ in lōan.

16

Hái-tóe chiū chhut-hiān, Tōa-tōe ê kun-ki iā lō͘-hiān, Sī in-ūi Iâ-hô-hoa ê chek-pī, Iā in-ūi I ê phīⁿ-khang pûn-chhut ê khì.

17

I tùi téng-bīn chhun-chhiú khiú góa, Tùi tōa-chúi-tiong khan góa chhut;

18

I kiù góa thoat-lī ióng-béng ê tùi-te̍k, Kap hiah ê òan-hūn góa ê lâng, In-ūi in pí góa khah ū la̍t.

19

Góa tú-tio̍h hōan-lān ê jı̍t, in lâi khún-pek góa, Chóng-sī Iâ-hô-hoa sī góa só͘ óa-khò ê.

20

I chhōa góa kàu khui-khoah ê só͘-chāi; I kiù góa, in-ūi I hoaⁿ-hí góa.

21

Iâ-hô-hoa chiàu góa ê kong-gī pò-tap góa, Chiàu góa ê chhiú ê chheng-khì pò-siúⁿ góa.

22

In-ūi góa siú Iâ-hô-hoa ê tō-lō͘, Bē-bat chòe pháiⁿ, lī-khui góa ê Siōng-tè.

23

I it-chhè ê hoat-tō͘ tī góa ê bīn-chêng, I ê lu̍t-lē, góa iā bô pōe-ge̍k.

24

Góa tùi-tī I sī ôan-chôan, Góa iā siú pún-sin bô kiâⁿ góa ê pháiⁿ.

25

Só͘-í Iâ-hô-hoa pò-siúⁿ góa, sī chiàu góa ê kong-gī, Iā chiàu góa tī I ê ba̍k-chiu-chêng ê chheng-khì.

26

Tùi-tī jîn-chû ê lâng, Lí hián-bêng ka-kī sī jîn-chû, Tùi-tī ôan-chôan ê lâng, Lí hián-bêng ka-kī sī ôan-chôan;

27

Tùi-tī chheng-khì ê lâng, Lí hián-bêng ka-kī sī chheng-khì; Tùi-tī koai-phiah ê lâng, Lí hián-bêng ka-kī sī oan-khiau.

28

Khùn-khó͘ ê peh-sìⁿ, Lí kiù i. Lí ê ba̍k-chiu khòaⁿ kiau-ngō͘ ê lâng, hō͘ i kàng-kē.

29

Iâ-hô-hoa ah, Lí sī góa ê teng, Iâ-hô-hoa beh chiò-kng góa ê o͘-àm.

30

In-ūi góa óa-khò Lí chhiong-jı̍p kun-tūi, Óa-khò góa ê Siōng-tè, chiū thiàu-kè chhiûⁿ.

31

Lūn-kàu Siōng-tè, I ê tō-lō͘ sī ôan-chôan ê, Iâ-hô-hoa ê ōe, sī kè thòan-liān ê; Kìⁿ-nā óa-khò I ê, I chiū chòe in ê tîn-pâi.

32

Iâ-hô-hoa í-gōa, chī-chūi sī Siōng-tè ah? Lán ê Siōng-tè í-gōa, chī-chūi sī chio̍h-pôaⁿ ah?

33

Siōng-tè sī góa kian-kò͘ ê iâⁿ-chē, I ín-chhōa ôan-chôan ê lâng kiâⁿ I ê lō͘.

34

I hō͘ góa ê kha chhin-chhiūⁿ lo̍k-bú, Hō͘ góa khiā tī góa kôaiⁿ ê só͘-chāi.

35

I kà-sī góa ê chhiú ōe kau-chiàn, Tì-kàu góa ê chhiú-kut ōe khui tâng-keng.

36

Lí ēng Lí ê chín-kiù hō͘ góa chòe tîn-pâi, Lí ê un-jiû hō͘ góa chòe tōa.

37

Lí hō͘ góa ê kha só͘ ta̍h ê tōe khui-khoah, Góa ê kha iā bē-bat ta̍h-thu̍t.

38

Góa tui-jip góa ê tùi-te̍k, lâi chián-tû in; In bē châu-bia̍t ê tāi-seng, góa bô tò-tńg-lâi.

39

Góa châu-bia̍t in, phah-siong in, Hō͘ in bōe khí-lâi, tó tī góa ê kha-ē.

40

In-ūi Lí bat ēng khùi-la̍t hâ góa, hō͘ góa ōe kau-chiàn, Lí hō͘ hiah ê khí-lâi kong-kek góa ê, lóng hâng-ho̍k góa.

41

Lí hō͘ góa ê tùi-te̍k ǹg góa o̍at-tńg-sin, Hō͘ góa thang chián-tû hiah ê òan-hūn góa ê lâng.

42

In sì-kòe khòaⁿ, iā bô chín-kiù in ê, Chiū ǹg-bāng Iâ-hô-hoa, I iā m̄ ìn i.

43

Góa tûi in iù-iù, chhin-chhiūⁿ tōe-chiūⁿ ê tîn-ai, Góa ta̍h in chhin-chhiūⁿ koe-lō͘ ê thô͘-bê, hō͘ in sì-sòaⁿ.

44

Lí kiù góa thoat-lī góa ê peh-sìⁿ ê saⁿ-chiⁿ, Pó-chûn góa chòe lia̍t-kok ê thâu-ba̍k; Góa só͘ m̄-bat ê peh-sìⁿ beh ho̍k-sāi góa.

45

Gōa-pang lâng beh tâu-hâng góa, Chı̍t-ē thiaⁿ-kìⁿ, chiū beh chun-thàn góa.

46

Gōa-pang lâng beh soe-pāi, Tùi in pì-ba̍t ê só͘-chāi ngia̍uh-ngia̍uh-chhoah chhut-lâi.

47

Iâ-hô-hoa sī o̍ah ê, gōan góa ê chio̍h-pôaⁿ tit-tio̍h o-ló, Gōan Siōng-tè, chiū-sī kiù góa ê Chio̍h-pôaⁿ--ê, tit-tio̍h chun-chòe kôaiⁿ;

48

Chiū-sī thòe góa sin-oan ê Siōng-tè, Hō͘ hiah ê peh-sìⁿ hâng-ho̍k góa ê;

49

Kiù góa thoat-lī góa ê tùi-te̍k ê; Koh kú-khí góa khah kôaiⁿ hiah ê khí-lâi kong-kek góa ê. Lí kiù góa thoat-lī kiông-pō ê lâng.

50

Iâ-hô-hoa ah, in-ūi án-ni góa beh tī lia̍t-pang kám-siā Lí, Iā beh chhiùⁿ-koa o-ló Lí ê miâ.

51

Iâ-hô-hoa tōa-tōa chín-kiù I só͘ siat-lı̍p ê ông, Si chû-ài hō͘ I só͘ boah-iû-ê, Chiū-sī hō͘ Tāi-pı̍t kap i ê hō͘-è, kàu éng-óan.