Sat-bó͘-jíⁿ hā-kòan 第 23 章 - 巴克禮全羅

1

Tāi-pı̍t kiat-bé ê ōe, pâi-lia̍t tī ē-tóe. Iâ-se ê kiáⁿ Tāi-pı̍t kóng, Tit-tio̍h seng-kôaiⁿ ê lâng, Sī Ngá-kok ê Siōng-tè só͘ boah-iû ê, Tī Í-sek-lia̍t gâu chòe-koa--ê kóng:

2

Iâ-hô-hoa ê Sîn ēng góa lâi kóng, I ê ōe tī góa ê chı̍h.

3

Í-sek-lia̍t ê Siōng-tè ū kóng, Í-sek-lia̍t ê Chio̍h-pôaⁿ tùi góa kóng: Ēng kong-gī tī-lí lâng, Kèng-ùi Siōng-tè lâi tī-lí ê,

4

I beh chhin-chhiūⁿ thàu-chá jı̍t tú-á chhut ê kng, Bô hûn ê chheng-chá, Hō͘ lo̍h kè-sin ê kng-chhái; Hō͘ tōe hoat iù-iù ê chháu.

5

Góa ê ke tī Siōng-tè ê bīn-chêng m̄-sī án-ni; Iáu-kú I ū kap góa lı̍p éng-óan ê iok, Bô m̄ chiàu chhù-sū pâi-lia̍t koh kian-kò͘; Sui-jiân I bô hō͘ i seng-tióng, Che chiū-sī góa it-chhè ê chín-kiù, it-chhè ê ì-gōan.

6

Chóng-sī húi-lūi lóng chhin-chhiūⁿ chhì-á beh siū koah-sak, Lâng m̄-káⁿ ēng chhiú the̍h i;

7

Beh bong i ê lâng, Tio̍h ēng thih-khì kap chhiuⁿ-pìⁿ, Tī i ê só͘-chāi beh hō͘ hé it-chīn sio-khì.

8

Tāi-pı̍t ióng-sū ê miâ kì tī ē-tóe; kun-tiúⁿ ê thâu, Tha-kek-bûn lâng Iok-siat-pa-siat; chiū-sī I-su-nî lâng A-tí-lô, chı̍t-sî phah-sí poeh-pah lâng.

9

Koh chı̍t-ê sī A-ha̍p lâng Tó-to ê kiáⁿ Í-lī-a-sat; chêng Hui-lī-sū lâng chū-chı̍p beh kau-chiàn, Í-sek-lia̍t lâng í-keng khì, ū saⁿ ê ióng-sū tè Tāi-pı̍t, tùi Hui-lī-sū lâng thó-chiàn; i sī in tiong-kan ê chı̍t-ê.

10

I khí-lâi phah Hui-lī-sū lâng, kàu chhiú sng, chhiú kap kiàm saⁿ-liâm. Hit-jı̍t Iâ-hô-hoa tōa-tōa khah-iâⁿ, chèng peh-sìⁿ o̍at-tńg tī i ê āu-bīn, kò͘ chhiúⁿ-mı̍h nā-tiāⁿ.

11

Koh chı̍t-ê sī Ha̍p-la̍h lâng A-ki ê kiáⁿ Sa-má; ū chı̍t-jı̍t Hui-lī-sū lâng chū-chı̍p chiâⁿ-tīn, tī chı̍t-khu âng-tāu ê hn̂g; peh-sìⁿ chiū tī Hui-lī-sū lâng ê bīn-chêng tô-cháu.

12

I tòng-tiâu tī hit khu hn̂g, lâi pó-siú i, phah Hui-lī-sū lâng; Iâ-hô-hoa tōa-tōa khah-iâⁿ.

13

Siu-koah ê sî, saⁿ-cha̍p ê siú-léng tiong ū saⁿ lâng lo̍h-khì kàu A-tō͘-lân tōng, kìⁿ Tāi-pı̍t. Hui-lī-sū lâng kun-peng chat-iâⁿ tī Lī-ho̍at-im ê soaⁿ-kok.

14

Hit-sî Tāi-pı̍t tī soaⁿ-chē; Hui-lī-sū lâng hông-siú ê peng tī Pek-lī-hêng.

15

Tāi-pı̍t him-sōan kóng, Chī-chūi ōe ēng Pek-lī-hêng siâⁿ-mn̂g-piⁿ ê chíⁿ-chúi hō͘ góa lim?

16

Chí(**Chit) saⁿ ê ióng-sū chiū chhiong-kè Hui-lī-sū lâng ê iâⁿ-pôaⁿ, tùi Pek-lī-hêng siâⁿ-mn̂g-piⁿ ê chíⁿ chhiūⁿ-chúi, kōaⁿ lâi hō͘ Tāi-pı̍t; chóng-sī i m̄-kam lim, chiū piàⁿ tī Iâ-hô-hoa ê bīn-chêng, kóng,

17

Iâ-hô-hoa ah, góa koat-tòan m̄-chòe án-ni; che kiám m̄-sī phe-miā khì ê lâng ê huih? Só͘-í i m̄-lim. Chí(**Chit) saⁿ ê tōa ióng-sū ū chòe chiah ê tāi-chì.

18

Sé-ló͘-ngá ê kiáⁿ Iok-ap ê sió-tī A-pí-su sī chòe saⁿ ê ióng-sū ê thâu-lâng; i kia̍h i ê chhiuⁿ phah-sí saⁿ-pah lâng, chiū tī saⁿ ê ióng-sū tiong ū miâ.

19

I kiám m̄-sī saⁿ ê ióng-sū tiong ê tē-it chun-kùi-ê mah? só͘-í chòe in ê thâu; chóng-sī put-kı̍p chêng saⁿ ê ióng-sū.

20

Koh ū Kah-siat lâng tōa ióng-sū Iâ-hô-iâ-tāi ê kiáⁿ Pí-ná-ngá; i ū kiâⁿ-chhut chōe-chōe tōa-sū; i thâi-sí Mô͘-ap lâng A-lī-i-le̍k nn̄g ê kiáⁿ; koh tī lo̍h-seh ê sî lo̍h khiⁿ-lāi, thâi-sí chı̍t chiah sai.

21

Koh thâi-sí Ai-kı̍p chı̍t ê tōa-hàn lâng; Ai-kı̍p lâng chhiú--nih kia̍h chhiuⁿ, Pí-ná-ngá chí-ū kia̍h thûi lo̍h-khì i hia, chhiúⁿ Ai-kı̍p lâng chhiú--nih ê chhiuⁿ, ēng hit ki chhiuⁿ kā i chân--sí.

22

Che sī Iâ-hô-iâ-tāi ê kiáⁿ Pí-ná-ngá só͘ kiâⁿ ê sū; chiū tī saⁿ ê ióng-sū tiong tit-tio̍h miâ.

23

I pí saⁿ-cha̍p ê ióng-sū khah chun-kùi; chóng-sī put-kı̍p chêng saⁿ ê ióng-sū. Tāi-pı̍t siat-lı̍p i chòe i ê sī-ōe-tiúⁿ.

24

Saⁿ-cha̍p ê ióng-sū tiong ū Iok-ap ê sió-tī A-sat-hek; koh ū Pek-lī-hêng lâng Tó-to ê kiáⁿ Í-le̍k-hap-lân;

25

Hap-lu̍t lâng Sa-má, Hap-lu̍t lâng Í-lī-ka;

26

Phaⁿ-le̍k-thê lâng Hi-lī-su, Thê-ko-a lâng Ek-kiat ê kiáⁿ Í-la̍h;

27

A-ná-tu̍t lâng A-pí-í-siā, Hō͘-sa lâng Bí-pún-nái;

28

A-ha̍p lâng Sat-bûn, Nî-tô-hoat lâng Má-hap-lâi;

29

Nî-tô-hoat lâng Pa-ná ê kiáⁿ Hi-lı̍p, Piān-ngá-bín cho̍k Ki-pí-a lâng Lī-pài ê kiáⁿ Í-thài;

30

Pí-la̍h-tùn lâng Pí-ná-ngá, Ka-sı̍t khoe lâng Hi-thài;

31

Pek-a-la̍h-pa lâng A-pí-a-pún, Pa-ló͘-bí lâng Ap-su-má-hut;

32

Sa-pún lâng Í-lī-ngá-hap-pa, Ngá-siān chiah ê kiáⁿ tiong ê Iok-ná-tan;

33

Hap-la̍h lâng Sa-má, Hap-la̍h lâng Sa-la̍h ê kiáⁿ A-hi-àm;

34

Má-ka lâng A-hap-pài ê kiáⁿ Í-lī-hoat-lia̍t, Ki-lô lâng A-hi-to-hut ê kiáⁿ Í-liân;

35

Ka-bı̍t lâng Hi-su-lâi, A-pa lâng Phàⁿ-lâi;

36

Só-pa lâng Ná-tan ê kiáⁿ Í-kah, Ka-te̍k lâng Pa-nî;

37

A-bûn lâng Sé-le̍k, Pí-lio̍k lâng Ná-hap-lâi, sī kā Sé-ló͘-ngá ê kiáⁿ Iok-ap kia̍h kun-khì ê;

38

Í-thiap lâng Í-la̍h, Í-thiap lâng Ka-lı̍p;

39

Hek lâng Ou-lī-à; kiōng saⁿ-cha̍p-chhit lâng.