Sat-bó͘-jíⁿ hā-kòan 第 24 章 - 巴克禮全羅

1

Iâ-hô-hoa koh siū-khì Í-sek-lia̍t lâng, kek-tōng Tāi-pı̍t lâi hāi in, chiū kóng, Tio̍h khì sǹg Í-sek-lia̍t kap Iû-tāi lâng.

2

Ông hoan-hù kap i tī-teh ê kun-tiúⁿ Iok-ap kóng, Lí taⁿ khì piàn-kiâⁿ Í-sek-lia̍t chèng chi-phài, tùi Tàn kàu Pia̍t-sī-pa, tiám-sǹg peh-sìⁿ, hō͘ góa chai peh-sìⁿ ê siàu-gia̍h.

3

Iok-ap kā ông kóng, Bô-lūn peh-sìⁿ jōa-chōe, gōan Iâ-hô-hoa lí ê Siōng-tè ke-thiⁿ pah-pē, koh hō͘ góa ê chú góa ê ông chhin-ba̍k khòaⁿ-kìⁿ; chóng-sī góa ê chú góa ê ông siáⁿ-sū hoaⁿ-hí chit ê sū ah?

4

Chóng-sī ông ê ōe iâⁿ-kè Iok-ap kap hiah ê kun-tiúⁿ. Iok-ap kap hiah ê kun-tiúⁿ chiū tùi ông ê bīn-chêng chhut-khì, tiám-sǹg Í-sek-lia̍t ê peh-sìⁿ.

5

In kè Iok-tàn, chat-iâⁿ tī A-lô-jíⁿ, tī Ka-tek soaⁿ-kok tiong ê siâⁿ ê chiàⁿ-pêng, kap Ngá-siā saⁿ-kūn;

6

koh kàu Ki-lia̍t, kap Tha-thêng-ha̍p-sī ê tōe, koh kàu Tàn-ngá-an, se̍h kàu Se-tùn;

7

koh kàu Chhui-lô kian-kò͘ ê siâⁿ, kap Hi-bī lâng í-kı̍p Ka-lâm lâng it-chhè ê siâⁿ; koh chhut-khì kàu Iû-tāi lâm-hng ê Pia̍t-sī-pa.

8

In piàn-kiâⁿ chôan-tōe, le̍k-kè káu-ge̍h-jı̍t koh jī-cha̍p jı̍t; chiū tò-tńg kàu Iâ-lō͘-sat-léng.

9

Iok-ap ēng sǹg peh-sìⁿ ê siàu-gia̍h chìn hō͘ ông chai. Í-sek-lia̍t lâng kia̍h to ê ióng-sū poeh-cha̍p bān, Iû-tāi lâng ū gō͘-cha̍p bān.

10

Tāi-pı̍t sǹg peh-sìⁿ ê siàu-gia̍h liáu-āu, sim chiū ka-kī chek-pī. Tāi-pı̍t kā Iâ-hô-hoa kóng, Góa kiâⁿ chit ê sū tōa-tōa ū hōan-chōe. Iâ-hô-hoa ah, kiû Lí tû-khì Lí ê lô͘-po̍k ê kè-sit, in-ūi góa só͘-kiâⁿ-ê chin gōng.

11

Tāi-pı̍t thiⁿ-kng-chá khí-lâi ê sî, Iâ-hô-hoa ê ōe lîm-kàu sian-ti Ka-tek, chiū-sī Tāi-pı̍t ê sian-kiàn ê, kóng,

12

Lí khì kā Tāi-pı̍t kóng, Iâ-hô-hoa án-ni kóng, Taⁿ Góa ēng saⁿ-hāng hō͘ lí, lí kéng chı̍t-hāng, Góa thang kiâⁿ tī lí.

13

Ka-tek chiū lâi thong-ti Tāi-pı̍t, tùi i kóng, Lí ài lí ê tōe ki-hng chhit-nî kú mah? á-sī ài lí ê tùi-te̍k tui-jip lí, lí tô-cháu tī i ê bīn-chêng saⁿ-ge̍h-jı̍t kú ah? á-sī ài un-e̍k tī lí ê tōe saⁿ-jı̍t kú ah? Taⁿ lí tio̍h chim-chiok siūⁿ-khòaⁿ cheh, góa thang ēng sím-mı̍h ōe hê-hok chhe góa ê.

14

Tāi-pı̍t kā Ka-tek kóng, Góa chin ûi-lân, lán lêng-khó͘ hām-lo̍h tī Iâ-hô-hoa ê chhiú, in-ūi I ū hong-sēng ê lîn-bín; góa m̄-gōan hām-lo̍h tī lâng ê chhiú.

15

Iâ-hô-hoa chiū kàng un-e̍k hō͘ Í-sek-lia̍t, tùi chheng-chá kàu só͘ tiāⁿ-tio̍h ê sî, tùi Tàn kàu Pia̍t-sī-pa; peh-sìⁿ-kan sí chhit-bān lâng.

16

Tng thiⁿ-sài chhun-chhiú tī Iâ-lō͘-sat-léng, beh bia̍t i ê sî, Iâ-hô-hoa chiū thè-hóe kàng-lo̍h chit ê chai-ē, chiū kā bia̍t peh-sìⁿ ê thiⁿ-sài kóng, Kàu-gia̍h lah, kiu lí ê chhiú; hit-sî Iâ-hô-hoa ê sù-chiá tī Iâ-pò͘-su lâng A-lô-ná ê gō͘-kak-tiûⁿ.

17

Tāi-pı̍t khòaⁿ-kìⁿ phah peh-sìⁿ ê thiⁿ-sài, chiū kā Iâ-hô-hoa kóng, Khòaⁿ ah, hōan-chōe-ê sī góa, pōe-ge̍k-ê iā sī góa; chóng-sī chiah ê kui-kûn ê iûⁿ ū chòe sím-mı̍h ah? gōan Lí ê chhiú kong-kek góa, kap góa pē ê ke.

18

Hit-jı̍t Ka-tek lâi kìⁿ Tāi-pı̍t, kā i kóng, Lí chiūⁿ-khì, tī Iâ-pò͘-su lâng A-lô-ná ê gō͘-kak-tiûⁿ, kā Iâ-hô-hoa khí chı̍t chō tôaⁿ.

19

Tāi-pı̍t chiàu Ka-tek ê ōe chiūⁿ-khì, chiàu Iâ-hô-hoa ê bēng-lēng.

20

A-lô-ná teh khòaⁿ, khòaⁿ-kìⁿ ông kap i ê jîn-sîn tùi-bīn lâi; A-lô-ná chiū chhut-khì, phak tī tōe--nih pài ông.

21

A-lô-ná kóng, Góa ê chú góa ê ông lâi lô͘-po̍k chia siáⁿ-sū? Tāi-pı̍t kóng, Góa lâi beh bóe lí chit ê gō͘-kak-tiûⁿ, kā Iâ-hô-hoa khí chı̍t chō tôaⁿ, hō͘ peh-sìⁿ-kan ê un-e̍k soah.

22

A-lô-ná kā Tāi-pı̍t kóng, Góa ê chú góa ê ông, chiàu lí só͘ khòaⁿ-chòe hó-ê the̍h-lâi hiàn i; khòaⁿ ah, chia ū gû, thang chòe sio-chè, ū phah gō͘-kak ê khì-kū, kap thò gû ê ka-chhia, thang chòe chhâ.

23

Ông ah, A-lô-ná ēng che it-chhè sàng hō͘ ông. A-lô-ná koh kā ông kóng, Gōan Iâ-hô-hoa lí ê Siōng-tè chiap-la̍p lí.

24

Ông kā A-lô-ná kóng, M̄-thang ah, góa beh chiàu kè-chîⁿ kā lí bóe; góa m̄-khéng ēng pe̍h-pe̍h tit-tio̍h ê mı̍h chòe sio-chè, hiàn hō͘ Iâ-hô-hoa góa ê Siōng-tè. Tāi-pı̍t chiū ēng gō͘-cha̍p sià-khek-le̍k ê gûn, bóe hit ê gō͘-kak-tiûⁿ kap gû.

25

Tāi-pı̍t tī-hia kā Iâ-hô-hoa khí chı̍t chō tôaⁿ, hiàn sio-chè kap siā-un-chè; án-ni Iâ-hô-hoa thiaⁿ in ūi tōe-hng só͘ kiû ê, un-e̍k tī Í-sek-lia̍t tiong chiū soah.