Thê-mô͘-thài hō͘ 第 3 章 - 巴克禮全羅

1

Nā-sī lí tio̍h chai tī chiah ê lō͘-bé ê jı̍t ū gûi-hiám ê sî beh kàu.

2

In-ūi lâng beh kò͘ ka-kī, tham-châi, khoa-kháu, kiau-ngō͘, pòng-to̍k, pōe-ge̍k pē-bú, bōng-un, bô sèng-kiat;

3

put-chêng, pōe-iok, húi-pòng, bô ka-kī iok-sok, chân-jím, òan-hūn hó,

4

kan-kúi, chip-phiah, phòng-hong, ài khòai-lo̍k khah kè-thâu tī thiàⁿ Siōng-tè;

5

ū kèng-khiân ê gōa-māu, nā-sī í-keng khì-sak kèng-khiân ê kôan-lêng; chhin-chhiūⁿ chit hō lâng lí tio̍h lī-khui in.

6

In-ūi in tiong-kan ū lâng àm-chīⁿ jı̍p lâng ê ke, bê-he̍k gōng-gōng ê hū-lú, chiū-sī hō͘ tāng ê chōe só͘ teh, hō͘ chōe-chōe chêng-io̍k só͘ ín-iú ê;

7

chiah ê hū-lú siông-siông teh ha̍k-sı̍p, iā kàu bé bōe-ōe bêng-pe̍k chin-lí.

8

Chá Ngá-nî Iông-pì tùi-te̍k Mô͘-se, chit hō lâng iā chhin-chhiūⁿ án-ni tùi-te̍k chin-lí, in ê sim-chì í-keng pāi-hōai, lūn-kàu tō-lí in sī put-tiòng-iōng ê.

9

Nā-sī in bōe-ōe koh chìn-pō͘, in-ūi in ê gû-gōng beh lō͘-hiān tī chèng lâng ê bīn-chêng chhin-chhiūⁿ hit nn̄g lâng chı̍t iūⁿ.

10

To̍k-to̍k lí ū sūn-thàn góa ê kà-sī, phín-hēng, chì-hiòng, sìn-khò, khoan-iông, jîn-ài, thun-lún, kap chiah ê khún-tio̍k, í-kı̍p khó͘-lān;

11

iā chai góa tī An-thê-o, Í-ko-liām, Lō͘-sū-tek só͘ tú-tio̍h sím-mı̍h sū, kap siū sím-mı̍h khún-tio̍k; chóng-sī Chú lóng kiù góa thoat-lī.

12

Koh kìⁿ-nā ài tit tiàm-tī Ki-tok Iâ-so͘ kèng-khiân lâi kè-jı̍t ê beh siū khún-tio̍k.

13

To̍k-to̍k pháiⁿ lâng kap phah-phiàn lâng ê beh ná kú ná pháiⁿ, bê-he̍k lâng, ka-kī iā siū bê-he̍k.

14

Nā-sī lí tio̍h tn̂g-tn̂g tòa tī só͘ ha̍k-sı̍p só͘ chhim sìn hiah ê sū, in-ūi chai sī tùi sím-mı̍h lâng o̍h ê;

15

iā chai lí tùi sòe-hàn í-keng bat hiah ê sèng-chheh, chiū-sī ōe hō͘ lí ū tì-hūi, tùi sìn Ki-tok Iâ-so͘ lâi tit-tio̍h kiù ê.

16

Kìⁿ-nā hō͘ Siōng-tè be̍k-sī ê keng iā ū lī-ek tī kà-sī, tī tok-chek, hō͘ lâng kui-chèng, ín-chhōa lâng o̍h gī-lí,

17

hō͘ ho̍k-sāi Siōng-tè ê lâng liān-ta̍t, piān-piān lâi kiâⁿ lóng-chóng ê hó sū.