Thê-mô͘-thài hō͘ 第 4 章 - 巴克禮全羅

1

Góa tī Siōng-tè ê bīn-chêng kap beh sím-phòaⁿ o̍ah-lâng sí-lâng ê Ki-tok Iâ-so͘ ê bīn-chêng, ūi-tio̍h I ê hián-hiān kap I ê koh-lâi,

2

hoan-hù lí tio̍h thôan tō-lí, bô lūn tek-sî put-tek-sî, tio̍h choan-bū i, ēng pah-poaⁿ ê khoan-iông kà-sī lâi chek-pī, kéng-kài, khòan-bián.

3

In-ūi sî-jı̍t beh kàu lâng beh m̄ iông-ún toan-chiàⁿ ê kà-sī, beh hī-khang chiūⁿ, ài thiaⁿ chōe-chōe sian-siⁿ, chiàu ka-kī ê su-io̍k;

4

koh o̍at thâu m̄ thiaⁿ chin-lí, khì ǹg bô iáⁿ ê ōe.

5

To̍k-to̍k lí hōan sū tio̍h chiat-chè, jím-siū kan-khó͘, kiâⁿ thôan hok-im ê ê kang, lâi chīn lí ê chit-hūn.

6

In-ūi taⁿ góa ê huih teh chòe kòan-tiān, góa kè-sì ê kî kàu lah.

7

Góa í-keng cheng-chiàn hó ê cheng-chiàn, í-keng chīn pháu-cháu ê lō͘-chām, í-keng siú só͘ sìn ê tō-lí.

8

Taⁿ liáu-āu ū gī ê bián-liû kā góa pī-pān hē-teh, chiū-sī Chú chòe kong-gī ê sím-phòaⁿ-si tī hit jı̍t beh hō͘ góa; m̄ nā hō͘ góa, iā beh hō͘ kìⁿ-nā him-bō͘ I hián-hiān ê lâng.

9

Lí tio̍h tì-ì kín-kín lâi chhē góa.

10

In-ūi Tí-má him-bō͘ chit ê sè-kan, chiū lī-khui góa, khì Thiap-sat-lô-nî-ka; Kek-le̍k-sū khì Ka-lia̍p-thài, Thê-to khì That-má-thài.

11

Chí-ū Lō͘-ka kap góa tī-teh. Tio̍h chhōa Má-khó kap lí saⁿ-kap lâi, in-ūi i tī ho̍k-sāi ê kang ū lī-ek góa.

12

Chhui-ki-kó͘ góa í-keng chhe i khì Í-hut-só͘.

13

Góa tī Te̍k-lô-a lâu tī Ka-pò͘ in tau ê gōa-saⁿ, lí lâi ê sî tio̍h sòa tòa lâi, ia̍h tio̍h tòa hiah ê chheh, hiah ê iûⁿ-phê ê koh khah iàu-kín.

14

Phah-tâng sai-hū A-le̍k-san-tāi chōe-chōe hāng hāi góa, Chú beh chiàu i ê só͘ kiâⁿ lâi pò-èng i.

15

Lí iā tio̍h tiuⁿ-tî i, in-ūi i put-chí tùi-te̍k góan ê ōe.

16

Góa thâu chı̍t pái hun-sò͘ ê sî bô lâng óa-kūn góa, chèng lâng lóng lī-khui góa; gōan chit ê chōe bô kui tī in.

17

Nā-sī Chú khiā tī góa sin-piⁿ, hō͘ góa ióng-kiāⁿ, hō͘ só͘ tio̍h soan-thôan ê tùi góa lâi it-chīn pò-iông, koh hō͘ gōa-pang lóng thiaⁿ-kìⁿ; góa iā tit-tio̍h kiù chhut tī sai ê chhùi.

18

Chú beh kiù góa thoat-lī lóng-chóng ê pháiⁿ-tāi, iā beh kiù góa jı̍p tī I thiⁿ-nı̍h ê kok; gōan êng-kng kui I kàu tāi-tāi bô chīn. À-bēng.

19

Chhéng-an Pek-ki-lah A-ku-lah, kap O-nî-sek-hut ê ke.

20

Í-lah-to͘ tiàm-tī Ko-lîm-to; Tek-lô-hui-mô͘ phòa-pīⁿ, góa lâu i tī Bí-lī-to͘.

21

Tio̍h tì-ì tī tang-thiⁿ chêng lâi. Iú-pò͘-lô, Po͘-tiân, Lī-lô͘, kek-ló-tia, kap chèng hiaⁿ-tī lóng chhéng-an lí.

22

Gōan Chú kap lí ê sîn tī-teh; gōan un-tián kap lín tī-teh.4