Thiap-sat-lô-nî-ka hō͘ 第 2 章 - 巴克禮全羅

1

Hiaⁿ-tī ah, lūn-kàu lán ê Chú Iâ-so͘ Ki-tok ê lîm-kàu, kap lán chiah-ê chū-chı̍p kui I, góan kiû lín,

2

bô lūn tùi sîn, á-sī tùi ōe, á-sī tùi phoe ká-mō͘ góan ê miâ ê, kóng Chú ê jı̍t hiān-chāi kàu lah, lín ê sim-chì bo̍h-tit khòai-khòai iô-tāng, iā bo̍h-tit kiaⁿ-hiâⁿ;

3

bô lūn ēng sím-mı̍h hoat, it-khài bo̍h-tit hō͘ lâng ín-iú; in-ūi hit jı̍t iáu-bē kàu, tek-khak tāi-seng ū pōe-kàu ê sū, kap hit ê chōe-ok ê lâng, chiū-sī tîm-lûn ê lâng, chhut-hiān;

4

i sī chòe tùi-te̍k, iā chū-ko pôaⁿ-kè it-chhè chheng chòe Siōng-tè kap siū kèng-pài ê; sīm-chì chē tī Siōng-tè ê tiān, piáu-bêng chòe Siōng-tè.

5

Góa iáu kap lín tī-teh ê sî, bat chiong chiah ê sū kā lín kóng, lín kiám bōe kì-tit mah?

6

Taⁿ hit ê chó͘-tòng i, hō͘ i kàu i ê kî chiah chhut-hiān ê, lín iā chai.

7

In-ūi put-hoat ê pì-bı̍t í-keng teh ūn-tōng, to̍k-to̍k hiān-kim ū chı̍t ê chó͘-tòng i ê, tı̍t-kàu hit ê chó͘-tòng ê tùi tiong-ng tû-khì.

8

Hit sî hit ê put-hoat ê beh chhut-hiān, Chú Iâ-so͘ beh ēng I ê kháu-khì lâi bia̍t i, ēng I lîm-kàu ê hián-hiān lâi hòe-bô i.

9

Hit ê put-hoat ê lîm-kàu sī chiàu Sat-tàn ê ūn-hêng, ēng it-chhè ê kôan-lêng, sîn-jiah, kap ké ê tiāu-thâu,

10

koh ēng it-chhè put-gī ê khúi-khiat kiâⁿ tī hiah ê teh tîm-lûn ê, in-ūi in bô chiap-la̍p chin-lí ê thiàⁿ lâi tit kiù.

11

Ūi-tio̍h án-ni Siōng-tè chiong chha-biū ê ūn-hêng kàng hō͘ in, hō͘ in sìn pe̍h-chha̍t;

12

hō͘ kìⁿ-nā m̄ sìn chin-lí, khì hoaⁿ-hí put-gī ê, lóng siū gí-tòan.

13

Nā-sī Chú só͘ thiàⁿ ê hiaⁿ-tī ah, góan eng-kai thòe lín siông-siông kám-siā Siōng-tè, in-ūi Siōng-tè tùi khí-thâu kéng lín, beh hō͘ lín tit kiù, sī chāi-tī Sîn ê chiâⁿ-sèng kap sìn chin-lí.

14

Ūi-tio̍h chit-ê, I tùi góan só͘ thôan ê hok-im bat tiàu lín, lâi tit-tio̍h lán ê Chú Iâ-so͘ Ki-tok ê êng-kng.

15

Só͘-í, hiaⁿ-tī ah, tio̍h khiā-chāi; lín só͘ tit-tio̍h ê thôan-siū, bô lūn sī tùi chhùi kóng ê, á-sī tùi góan ê phoe, hōan só͘ ha̍k-sı̍p ê, tio̍h chip-siú i.

16

Lán ê Chú Iâ-so͘ Ki-tok, kap lán ê Pē Siōng-tè, chiū-sī thiàⁿ lán, iā tī un-tián chiong éng-óan ê an-ùi kap hó ê ǹg-bāng siúⁿ-sù lán ê,

17

gōan I an-ùi lín ê sim, kian-kò͘ lín tī it-chhè hó ê só͘ kiâⁿ, hó ê só͘ kóng.