Thiap-sat-lô-nî-ka hō͘ 第 3 章 - 巴克禮全羅

1

Hiaⁿ-tī ah, kiat-bé lâi kóng, lín tio̍h thòe góan kî-tó, hō͘ Chú ê tō-lí liû-hêng tit-tio̍h êng-kng, chhin-chhiūⁿ tī lín tiong-kan chı̍t iūⁿ;

2

koh hō͘ góan tit-tio̍h thoat-lī tī bô lí ê pháiⁿ lâng; in-ūi lâng bô lóng ū sìn.

3

Chú chiū-sī sìn-sı̍t, I beh kian-kò͘ lín, koh pó-hō͘ lín bián hō͘ hit ê pháiⁿ ê hām-hāi.

4

Lūn-kàu lín, góan tī Chú chhim sìn, góan só͘ bēng-lēng ê, lín hiān-kim ū teh kiâⁿ, āu-lâi iā beh kiâⁿ i.

5

Gōan Chú chhōa lín ê sim jı̍p tī Siōng-tè ê thiàⁿ kap Ki-tok ê thun-lún.

6

Hiaⁿ-tī ah, góan tī lán ê Chú Iâ-so͘ Ki-tok ê miâ bēng-lēng lín, kìⁿ-nā hiaⁿ-tī bô hoat-tō͘, bô chiàu góan só͘ thôan-siū ê lâi kiâⁿ, lín tio̍h lī-khui i.

7

In-ūi lín ka-kī chai tio̍h cháiⁿ-iūⁿ o̍h góan; in-ūi góan tī lín tiong-kan bē bat bô hoat-tō͘;

8

iā m̄ bat pe̍h-pe̍h chia̍h lâng; hóan-tńg sī tio̍h-bôa kan-khó͘, mî-jı̍t chòe kang, bián-tit thoa-lūi lín tiong-kan chı̍t lâng.

9

M̄ sī in-ūi góan bô kôan, to̍k-to̍k sī ài ēng pún-sin chòe lín ê bô͘-iūⁿ, hō͘ lín o̍h góan.

10

In-ūi góan iáu kap lín tī-teh ê sî, bat án-ni bēng-lēng lín kóng, Nā ū lâng bô beh chòe kang, i iā tio̍h m̄ thang chia̍h.

11

Sī góan thiaⁿ-kìⁿ lín tiong-kan ū lâng só͘ kiâⁿ bô hoat-tō͘, lóng bô chòe kang, kan-ta chòe hūn-gōa ê sū.

12

Chhin-chhiūⁿ chit hō lâng góan tiàm-tī Chú Iâ-so͘ Ki-tok bēng-lēng in, koh khǹg in, tio̍h thiâm-chēng chòe kang, ka-kī thàn chia̍h.

13

Hiaⁿ-tī ah, lín kiâⁿ hó sū, m̄ thang ià-siān.

14

Nā ū lâng bô sūn-ho̍k góan chit tiuⁿ phoe só͘ kóng ê, lín tio̍h kā i kì-teh, iā m̄ thang kap i kau-pôe, hō͘ i ka-kī kiàn-siàu.

15

Chóng-sī bo̍h-tit khòaⁿ i chòe kiû-siû, tio̍h kéng-kài i chhin-chhiūⁿ hiaⁿ-tī.

16

Gōan pêng-an ê Chú, ta̍k sî ta̍k hāng sū, pún-sin siúⁿ-sù lín pêng-an. Gōan Chú kap lín chèng lâng tī-teh.

17

Góa Pó-lô chhin-pit chhéng-an lín; tī ta̍k tiuⁿ phoe ēng chit-ê chòe kì-hō; góa chiū-sī án-ni siá.

18

Gōan lán ê Chú Iâ-so͘ Ki-tok ê un-tián kap lín chèng lâng tī-teh.3