Sù-tô͘ Hēng-tōan 第 11 章 - 巴克禮全羅

1

Sù-tô͘ kap tiàm-tī Iû-thài ê hiaⁿ-tī thiaⁿ gōa-pang lâng ia̍h siū Siōng-tè ê tō-lí.

2

Kàu Pí-tek chiūⁿ Iâ-lō͘-sat-léng ê sî, hiah ê hōng kat-lé ê lâng kap i cheng-piān, kóng,

3

Lí bat jı̍p-khì chiū-kūn bô siū kat-lé ê lâng, kap in saⁿ-kap chia̍h.

4

Nā-sī Pí-tek chiàu chhù-sū tùi in pâi-lia̍t kóng, Góa tī Iok-phàⁿ siâⁿ kî-tó;

5

sîn-hûn iû tī siōng gōa ê sî, khòaⁿ-kìⁿ īⁿ-siōng, ū chı̍t ê khì-kū chhin-chhiūⁿ tōa pak pò͘, pa̍k sì ê kak-thâu, tùi thiⁿ tūi-lo̍h kàu góa ê bīn-chêng;

6

góa chù-ba̍k khòaⁿ, siông-sè siūⁿ i, khòaⁿ-kìⁿ ū tōe-chiūⁿ sì-kha ê cheng-siⁿ, iá-siù, thâng-thōa, kap thiⁿ-tiong ê pe-chiáu.

7

Koh thiaⁿ-kìⁿ ū siaⁿ kā góa kóng, Pí-tek, khí-lâi; thâi lâi chia̍h.

8

Góa kóng, Chú ah, tòan-tòan m̄-thang; in-ūi hōan-nā chho͘-sio̍k ê mı̍h, á-sī bô chheng-khì ê, lóng bē bat jı̍p góa ê chhùi.

9

Nā-sī siaⁿ tē jī pái tùi thiⁿ ìn kóng, Siōng-tè só͘ hō͘ i chheng-khì ê, lí bo̍h-tit lia̍h chòe chho͘-sio̍k.

10

Chhin-chhiūⁿ án-ni saⁿ pái; ta̍k hāng mı̍h chiū koh siu chiūⁿ thiⁿ.

11

Hut-jiân ū saⁿ lâng tùi Kai-sat-lī-a chhe lâi chiū-kūn góa ê, tú-tú khiā tī góan só͘ tiàm ê chhù gōa.

12

Sèng Sîn kā góa kóng tio̍h kap in khì, bo̍h-tit hun-piat. Koh ū chit la̍k ê hiaⁿ-tī kap góa khì; góan lóng jı̍p hit lâng ê chhù;

13

i chiū kā góan kóng, àn-cháiⁿ-iūⁿ bat khòaⁿ-kìⁿ chı̍t ê thiⁿ-sài khiā tī i ê chhù, tùi i kóng, Tio̍h chhe lâng kàu Iok-phàⁿ, chhiáⁿ Se-bûn, chheng chòe Pí-tek ê lâi;

14

i beh ēng ōe kā lí kóng, lí kap lí chôan ke tùi chiah ê ōe beh tit-tio̍h kiù.

15

Góa tú-tú teh kóng ê sî, Sèng Sîn kàng-lîm tī in, chhin-chhiūⁿ khí-thâu tī lán chı̍t iūⁿ.

16

Góa chiū kì-tit Chú ê ōe, kóng, Iok-hān sī ēng chúi kiâⁿ sóe-lé; to̍k-to̍k lín beh tī Sèng Sîn siū sóe.

17

Taⁿ Siōng-tè kì-jiân ēng chit ê un-sù hō͘ in, chhin-chhiūⁿ tī lán sìn Chú Iâ-so͘ Ki-tok ê sî só͘ hō͘ lán ê chı̍t iūⁿ, góa sī chī-chūi, ōe chó͘-tòng Siōng-tè ah?

18

Hiah ê lâng thiaⁿ che ōe, chiū chēng-chēng, ia̍h kui êng-kng Siōng-tè, kóng, Án-ni-siⁿ, sī Siōng-tè ia̍h hō͘ gōa-pang lâng hóan-hóe lâi tit-tio̍h o̍ah-miā.

19

Ūi-tio̍h Sū-thê-hóan ê sū só͘ siⁿ-khí ê khó͘-lān lâi sì-sòaⁿ ê lâng, piàn kiâⁿ kàu Hui-nî-ki, Ku-pí-lō͘, An-thê-o; bô tùi pa̍t lâng kóng tō-lí, chí ū tùi Iû-thài lâng kóng nā-tiāⁿ.

20

Nā-sī kî-tiong ū Ku-pí-lō͘, Kó͘-lī-nāi, kúi-nā lâng kàu An-thê-o, ia̍h tùi Hi-lī-nî lâng thôan Chú Iâ-so͘ ê hok-im.

21

Chú ê chhiú kap in tī-teh; sìn lâi kui tī Chú ê, in ê siàu-gia̍h put-chí chōe.

22

Lūn-kàu chiah ê lâng ū siau-sit thôan kàu Iâ-lō͘-sat-léng, hō͘ kàu-hōe thiaⁿ-kìⁿ; in chiū chhe Pa-ná-pa khì An-thê-o;

23

í-keng kàu, khòaⁿ-kìⁿ Siōng-tè ê un, chiū hoaⁿ-hí; khó͘-khǹg chèng lâng ēng sim-chì kiat-liân tī Chú;

24

in-ūi i sī hó lâng, ū Sèng Sîn kap sìn móa-móa; tùi án-ni ke-thiⁿ chōe-chōe lâng kui tī Chú.

25

I khì Tāi-sò͘ chhē Sò-lô;

26

í-keng tú-tio̍h, chiū chhōa i kàu An-thê-o. In tī kàu-hōe tiong chū-chı̍p chı̍t nî kú, kà-sī chōe-chōe lâng; koh ha̍k-seng chheng chòe Ki-tok-tô͘ sī tùi An-thê-o khí.

27

Tng hit sî ū kúi-nā ê sian-ti tùi Iâ-lō͘-sat-léng lo̍h-khì kàu An-thê-o.

28

Kî-tiong chı̍t lâng, miâ A-ka-pò͘, khí-lâi khiā, khò Sèng Sîn lâi chí-bêng phó͘ thiⁿ-ē beh tōa ki-hng; tng Kek-ló-tiu ê nî-kan kó-jiân ū chit ê sū.

29

Tùi án-ni ha̍k-seng tiāⁿ-tio̍h ì-sù, ta̍k lâng chiàu i ê le̍k-liōng, kià khì kiong-kip tiàm Iû-thài ê hiaⁿ-tī;

30

in chiū chiàu án-ni kiâⁿ, tùi Pa-ná-pa kap Sò-lô keng-chhiú, kià kau hiah ê tiúⁿ-ló.