Sù-tô͘ Hēng-tōan 第 10 章 - 巴克禮全羅

1

Tī Kai-sat-lī-a ū chı̍t lâng, miâ Ko-nî-liû, chòe Í-tāi-lī iâⁿ ê pé-chóng,

2

i sī kèng-khiân ê lâng, kap chôan ke kèng-ùi Siōng-tè, chōe-chōe chín-chè peh-sìⁿ, siông-siông kî-tó Siōng-tè.

3

Jı̍t-sî iok-lio̍k saⁿ tiám cheng, tī īⁿ-siōng tiong bêng-bêng khòaⁿ-kìⁿ Siōng-tè ê thiⁿ-sài jı̍p-lâi chiū-kūn i, tùi i kóng, Ko-nî-liû.

4

I chù-ba̍k khòaⁿ, chin kiaⁿ, kóng, Chú ah, ū siáⁿ-sū? Chiū kā i kóng, Lí ê kî-tó, lí ê chín-chè í-keng chiūⁿ kàu Siōng-tè ê bīn-chêng chòe kì-liām.

5

Taⁿ lí tio̍h chhe lâng khì Iok-phàⁿ, chhiáⁿ hit ê Se-bûn, chheng chòe Pí-tek ê, lâi;

6

i hioh tī hôan-phê sai-hū Se-bûn tau , i ê chhù tī hái-piⁿ.

7

Kap i kóng ōe ê thiⁿ-sài í-keng thè-khì, Ko-nî-liû chiū kiò nn̄g ê lô͘-po̍k, kap chı̍t ê kèng-khiân ê peng sî-siông kun-sûi i ê;

8

chiong chiah ê tāi-chì lóng kā in kóng, chiū chhe in khì Iok-phàⁿ.

9

Keh jı̍t, in kiâⁿ lō͘ í-keng kūn siâⁿ, iok-lio̍k jı̍t tiong-tàu, Pí-tek chiūⁿ chhù-téng kî-tó;

10

chin iau, ài chia̍h; lâng tú-tú teh pī-pān tǹg; Pí-tek ê sîn-hûn iû tī siōng gōa;

11

chiū khòaⁿ-kìⁿ thiⁿ khui, ū khì-kū kàng-lo̍h, chhin-chhiūⁿ tōa pak pò͘, pa̍k sì ê kak-thâu, tūi tī tōe-nı̍h:

12

lāi-bīn ū tōe-chiūⁿ ta̍k lūi sì-kha ê siù, thâng-thōa, kap thiⁿ tiong ê pe-chiáu.

13

Koh ū siaⁿ tùi i kóng, Pí-tek, khí-lâi; thâi lâi chia̍h.

14

Nā-sī Pí-tek kóng, Chú ah, tòan-tòan m̄-thang, in-ūi hōan-nā chho͘-sio̍k ê mı̍h kap bô chheng-khì ê, góa bē bat chia̍h.

15

Tē jī pái ū siaⁿ koh tùi i kóng, Siōng-tè só͘ hō͘ i chheng-khì ê, lí bo̍h-tit lia̍h chòe chho͘-sio̍k.

16

Án-ni saⁿ pái; hit ê khì-kū liâm-piⁿ siu chiūⁿ thiⁿ.

17

Pí-tek sim-lāi teh tiû-tû só͘ khòaⁿ-kìⁿ ê īⁿ-siōng sím-mı̍h ì-sù, tú-tú hit tia̍p Ko-nî-liû só͘ chhe lâi ê lâng, ū mn̄g kàu Se-bûn ê chhù, khiā tī mn̂g-gōa,

18

Chhut siaⁿ teh mn̄g khòaⁿ ū Se-bûn, chheng chòe Pí-tek ê, hioh tī chia á bô.

19

Pí-tek iáu teh siūⁿ īⁿ-siōng ê sî, Sèng Sîn kā i kóng, Ū saⁿ lâng teh chhē lí.

20

Taⁿ tio̍h khí-lâi, lo̍h-khì, kap in khì, m̄ bián giâu-gî; in-ūi sī góa chhe in.

21

Pí-tek lo̍h-khì, kìⁿ hiah ê lâng, kóng, Góa chiū-sī lín só͘ chhē ê lâng; lín lâi sī ūi-tio̍h siáⁿ-sū?

22

In chiū kóng, Pé-chóng Ko-nî-liû sī gī lâng, koh kèng-ùi Siōng-tè, hō͘ Iû-thài chôan kok só͘ o-ló, hōng sèng ê thiⁿ-sài chí-sī i, tio̍h chhiáⁿ lí kàu i ê chhù, sòa thiaⁿ lí ê ōe.

23

Pí-tek chiū chhiáⁿ in jı̍p-lâi, lâu in hioh-teh. Keh jı̍t khí-sin kap in khì, koh ū Iok-phàⁿ ê hiaⁿ-tī kúi-nā lâng kap i tâng kiâⁿ.

24

Koh keh jı̍t, jı̍p Kai-sat-lī-a. Ko-nî-liû í-keng chū-chı̍p i ê chhin-lâng kap hó pêng-iú, teh thèng-hāu in.

25

Pí-tek tú-á jı̍p-khì ê sî, Ko-nî-liû ngiâ-chih i, phak tī i ê kha-chêng, lâi pài i.

26

Chóng-sī Pí-tek khan i khí-lâi, kóng, Khí-lâi; góa ka-kī iā sī lâng.

27

Kap i kóng ōe chiū jı̍p-khì khòaⁿ-kìⁿ chōe-chōe lâng chū-chı̍p;

28

chiū tùi in kóng, lín chai Iû-thài lâng kap pa̍t cho̍k ê lâng chhin-kūn, á-sī lâi-óng, pún sī bô ha̍p lē; nā-sī Siōng-tè í-keng chí-sī góa, bô lūn sím-mı̍h lâng m̄-thang kóng i chòe chho͘-sio̍k bô͘ chheng-khì;

29

só͘-í góa siū chhiáⁿ, bô the-sî, chiū lâi. Taⁿ mn̄g, lín chhiáⁿ góa sím-mı̍h ì-sù.

30

Ko-nî-liû kóng, Sì jı̍t chêng chit ê sî, góa tī chhù-lāi, ē-po͘ saⁿ tiám cheng, teh kî-tó; chiū hut-jiân ū chı̍t lâng, i-chiûⁿ kng-iàⁿ-iàⁿ, khiā tī góa ê bīn-chêng,

31

kóng, Ko-nî-liû, tī Siōng-tè ê bīn-chêng lí ê kî-tó í-keng thiaⁿ-kìⁿ, lí ê chín-chè í-keng tit-tio̍h kì-liām.

32

Taⁿ tio̍h chhe lâng kàu Iok-phàⁿ, chhiáⁿ Se-bûn, chheng chòe Pí-tek ê, lâi; i tiàm tī hái-piⁿ, hôan-phê sai-hū Se-bûn ê chhù.

33

Só͘-í góa liâm-piⁿ chhe lâng kàu lí hia; lí lâi chin hó. Taⁿ góan lóng tī Siōng-tè ê bīn-chêng, ài beh thiaⁿ Chú só͘ bēng-lēng lí lóng-chóng ê ōe.

34

Pí-tek khui chhùi, kóng, Taⁿ góa chin-chiàⁿ chai Siōng-tè bô ēng gōa-māu chhú lâng;

35

to̍k-to̍k tī ta̍k pang-kok kìⁿ ū kèng-ùi I lâi kiâⁿ gī ê lâng, hō͘ I hoaⁿ-hí chiap-la̍p.

36

Siōng-tè só͘ kià hō͘ Í-sek-lia̍t kiáⁿ-sun ê ōe, tùi Iâ-so͘ Ki-tok lâi thôan hô-pêng ê hok-im, (I sī bān ū ê Chú),

37

chit ê siau-sit lín chai sī tī Iok-hān só͘ thôan ê sóe-lé í-āu, tùi Ka-lī-lī khí kàu piàn Iû-thài;

38

chiū-sī Ná-sat-le̍k lâng Iâ-so͘, Siōng-tè ū cháiⁿ-iūⁿ ēng Sèng Sîn kap châi-lêng boah I; I chiū sì-kòe kiâⁿ chòe hó sū, i-hó kìⁿ-nā Mô͘-kúi só͘ ap-chè ê; in-ūi Siōng-tè kap I tī-teh.

39

Kìⁿ-nā I tī Iû-thài lâng ê tōe-hng kap Iâ-lō͘-sat-léng só͘ kiâⁿ ê, góan chòe kan-chèng; lâng chiū tiàu I tī chhâ-nı̍h, lâi hāi-sí I.

40

Kàu tē saⁿ jı̍t, Siōng-tè hō͘ I koh-o̍ah, sòa chhut-hiān,

41

m̄ sī hō͘ chèng peh-sìⁿ khòaⁿ, sī hō͘ Siōng-tè tāi-seng só͘ kéng-sóan ūi-tio̍h I chòe kan-chèng ê lâng khòaⁿ, chiū-sī góan chiah-ê, tī I tùi sí-lâng tiong koh-o̍ah ê liáu-āu kap I saⁿ-kap lim-chia̍h ê lâng.

42

I koh bēng-lēng góan thôan hō͘ peh-sìⁿ, kan-chèng chit-ê sī Siōng-tè só͘ lı̍p-tiāⁿ chòe o̍ah-lâng sí-lâng ê sím-phòaⁿ si.

43

Chèng sian-ti ia̍h ūi-tio̍h I chòe kan-chèng, chiū-sī hōan-nā sìn I ê lâng, tùi I ê miâ tit-tio̍h chōe sià.

44

Pí-tek iáu-kú teh kóng chiah ê ōe ê sî, Sèng Sîn kàng-lîm tī kìⁿ-nā thiaⁿ tō-lí ê lâng.

45

Hōng kat-lé ê sìn-tô͘, kap Pí-tek saⁿ-kap lâi ê, in-ūi Sèng Sîn ê siúⁿ-sù ia̍h kàng-lo̍h tī gōa-pang lâng, chiū lóng kî-kòai.

46

In-ūi thiaⁿ-kìⁿ in ēng chiah ê khiuⁿ-kháu teh kóng, koh o-ló Siōng-tè chòe tōa.

47

Pí-tek chiū ìn kóng, Chiah ê lâng í-keng siū-tio̍h Sèng Sîn, chhin-chhiūⁿ lán chı̍t iūⁿ, chī-chūi ōe kìm-tit ēng chúi kā in kiâⁿ sóe-lé ah?

48

Chiū bēng-lēng in tī Iâ-so͘ Ki-tok ê miâ siū sóe-lé. Tùi án-ni chhiáⁿ i tòa kúi-nā jı̍t.