Sù-tô͘ Hēng-tōan 第 9 章 - 巴克禮全羅

1

Sò-lô iáu-kú it-bī háng-hoah ài thâi Chú ê ha̍k-seng, khì kìⁿ chè-si-thâu,

2

tùi i kiû phoe hō͘ Tāi-má-sek chiah ê hōe-tn̂g, nā tú-tio̍h thàn chit ê Lō͘ ê lâng, bô lūn lâm-lú, i chiū thang pa̍k in, tòa kàu Iâ-lō͘-sat-léng.

3

Kiâⁿ kūn Tāi-má-sek ê sî, hut-jiân tùi thiⁿ ū kng ûi-lûi chiò i;

4

i chiū po̍ah-tó tī tōe-nı̍h, thiaⁿ-kìⁿ siaⁿ kā i kóng, Sò-lô, Sò-lô, siáⁿ-sū khún-tio̍k góa?

5

I kóng, Chú ah, lí sī chī-chūi? Kóng, Góa chiū-sī lí só͘ khún-tio̍k ê Iâ-so͘.

6

Chóng-sī lí tio̍h khí-lâi jı̍p siâⁿ, lí só͘ eng-kai chòe ê beh kā lí kóng.

7

Tâng kiâⁿ ê lâng chēng-chēng khiā-teh, thiaⁿ-kìⁿ siaⁿ, iā bô khòaⁿ-kìⁿ lâng.

8

Sò-lô tùi tōe-nı̍h khí-lâi; ba̍k-chiu thí-khui, bōe khòaⁿ-kìⁿ sím-mı̍h; lâng khan i ê chhiú, chhōa i jı̍p Tāi-má-sek.

9

Le̍k-kè saⁿ jı̍t bōe khòaⁿ-kìⁿ, bô chia̍h iā bô lim.

10

Tī Tāi-má-sek ū chı̍t ê ha̍k-seng miâ A-ná-nî-a; Chú tī īⁿ-siōng tiong kā i kóng, A-ná-nî-a ah. I kóng, Chú ah, góa tī chia.

11

Chú tùi i kóng, Khí-lâi, khì hit tiâu koe-lō͘ kiò chòe Tı̍t ê, tī Iû-tāi ê ke chhē Tāi-sò͘ lâng, miâ Sò-lô: in-ūi i tú-tú teh kî-tó;

12

koh ū khòaⁿ-kìⁿ chı̍t lâng, miâ A-ná-nî-a, jı̍p-lâi, kā i hōaⁿ chhiú, hō͘ i ōe khòaⁿ-kìⁿ.

13

Nā-sī A-ná-nî-a ìn kóng, Chú ah, góa thiaⁿ-kìⁿ chōe-chōe lâng kóng, chit lâng tī Iâ-lō͘-sat-léng bat cháiⁿ-iūⁿ tōa pháiⁿ khóan-thāi lí chiah ê sèng-tô͘;

14

koh i tī chia ū chiah ê chè-si-thâu ê kôan, thang lâi pa̍k kìⁿ-nā kiû-kiò lí ê miâ ê lâng.

15

To̍k-to̍k Chú kā i kóng, Chòe lí khì; i sī góa kéng-sóan ê khì-kū, beh pò-iông góa ê miâ tī gōa-pang, kap kok-ông, í-kı̍p Í-sek-lia̍t kiáⁿ-sun ê bīn-chêng;

16

góa iā beh hō͘ i chai, i tio̍h in-ūi góa ê miâ siū jōa chōe ê kan-khó͘.

17

A-ná-nî-a chiū khì, jı̍p i ê chhù; chhiú hōaⁿ i, kóng, Hiaⁿ-tī Sò-lô, Chú, chiū-sī lí lâi ê sî lō͘-tiong chhut-hiān hō͘ lí khòaⁿ ê Iâ-so͘, chhe góa lâi, hō͘ lí ōe khòaⁿ-kìⁿ, koh tit-tio̍h Sèng Sîn chhiong-móa.

18

Liâm-piⁿ tùi i ê ba̍k-chiu ū mı̍h ka-la̍uh, chhin-chhiūⁿ hî-lân, i chiū khòaⁿ-kìⁿ; khí-lâi siū sóe-lé;

19

í-keng chia̍h chiū ióng-kiāⁿ. Sò-lô kap Tāi-má-sek ê ha̍k-seng saⁿ-kap tòa kúi-nā jı̍t.

20

Liâm-piⁿ tī chiah ê hōe-tn̂g soan-thôan Iâ-so͘, kóng I sī Siōng-tè ê Kiáⁿ.

21

Thiaⁿ-kìⁿ ê lâng lóng gông-ngia̍h, kóng, Chit lâng kiám m̄ sī hit ê tī Iâ-lō͘-sat-léng chân-hāi hōan-nā kiû-kiò chit ê miâ ê mah? koh lâi chia tiau-tî beh pa̍k lâi thoa in kau hō͘ chiah ê chè-si-thâu.

22

To̍k-to̍k Sò-lô it-hoat ū lêng-le̍k, pok-tó tòa tī Tāi-má-sek ê Iû-thài lâng, piān-bêng chit-ê sī Ki-tok.

23

Kè chōe-chōe jı̍t, Iû-thài lâng saⁿ-kap kè-bô͘ beh thâi i; chóng-sī in ê kè-bô͘ Sò-lô chai.

24

In ia̍h jı̍t mî tī siâⁿ-mn̂g-nı̍h tng-tán beh thâi i;

25

nā-sī i ê ha̍k-seng thàu-mî chiong Sò-lô ēng nâ tùi siâⁿ-chhiûⁿ kā i lūi-lo̍h-khì.

26

Í-keng kàu Iâ-lō͘-sat-léng, beh kap ha̍k-seng kau-pôe; in lóng kiaⁿ i, m̄ sìn i sī ha̍k-seng.

27

To̍k-to̍k Pa-ná-pa chhōa i chiū-kūn sù-tô͘, chiong i tī lō͘-tiong cháiⁿ-iūⁿ khòaⁿ-kìⁿ Chú, Chú kap i kóng ōe, í-kı̍p i tòa Tāi-má-sek cháiⁿ-iūⁿ hó-táⁿ tī Iâ-so͘ ê miâ lâi thôan, lóng-chóng kóng-khí.

28

Chiū tī Iâ-lō͘-sat-léng kap in chhut jı̍p, hó-táⁿ tī Chú ê miâ lâi thôan;

29

ia̍h kap kóng Hi-lī-nî ōe ê Iû-thài lâng kóng ōe piān-lūn; to̍k-to̍k hiah ê lâng tô͘-bô͘ beh thâi i.

30

Hiaⁿ-tī chai, chiū sàng i lo̍h Kai-sat-lī-a, hō͘ i tò-khì Tāi-sò͘.

31

Tùi án-ni piàn Iû-thài, Ka-lī-lī, Sat-má-lī-a ê kàu-hōe ū pêng-an, tit-tio̍h kiàn-lı̍p, kiâⁿ tāi-chì kèng-ùi Chú, iā siū Sèng Sîn ê an-ùi, lâng-gia̍h ná ke-thiⁿ.

32

Pí-tek piàn kiâⁿ sì-hng ê sî, iā lo̍h-khì chiū-kūn tiàm-tī Lū-tāi ê sèng-tô͘.

33

Tī hia tú-tio̍h chı̍t lâng, miâ Í-nî-ngá, in-ūi hōan-tio̍h piàn-sūi, tó chhn̂g poeh nî.

34

Pí-tek kā i kóng, Í-nî-ngá, Iâ-so͘ Ki-tok i-hó lí lah; khí-lâi, lí ê pho͘-á ka-kī chéng-tùn. I liâm-piⁿ khí-lâi.

35

Kìⁿ-nā tòa tī Lū-tāi kap Sat-lûn ê lâng khòaⁿ-kìⁿ i, chiū kui-ho̍k Chú.

36

Tī Iok-phàⁿ ū chı̍t ê lú-tō͘, miâ Tāi-pí-tāi, hoan-e̍k chiū-sī To-ka: kiâⁿ hó sū kap chín-chè móa-móa.

37

Tong sî phòa-pīⁿ sí; lâng sóe i ê sin-si, hē tī lâu-téng.

38

Lū-tāi kūn Iok-phàⁿ, ha̍k-seng thiaⁿ-kìⁿ Pí-tek tī hia, chiū chhe nn̄g lâng khì chhē i, kiû kóng, Chhiáⁿ lâi góan chia, m̄-thang iân-chhiân.

39

Pí-tek chiū khí-sin kap in khì. Í-keng kàu, chhōa i chiūⁿ lâu; chèng chiú-kóaⁿ lâng khiā tī Pí-tek ê sin-piⁿ, teh háu, chiong To-ka kap in tī-teh ê sî só͘ chòe ê i-ho̍k hō͘ i khòaⁿ.

40

Pí-tek chiū kah chèng lâng chhut-khì, kūi-lo̍h-khì, kî-tó; o̍at-tńg-sin ǹg sin-si, kóng Tāi-pí-tāi, khí-lâi. I ê ba̍k-chiu thí-khui; khòaⁿ-kìⁿ Pí-tek, chiū khí-lâi chē.

41

Pí-tek chhun chhiú hû i khí-lâi, kiò chiah ê sèng-tô͘ kap chiú-kóaⁿ lâng jı̍p-lâi, chiong koh-o̍ah ê To-ka kau hō͘ in.

42

Thong Iok-phàⁿ lóng chai; chiū ū chōe-chōe lâng sìn Chú.

43

Pí-tek tī Iok-phàⁿ kú-kú kap chı̍t ê hôan-phê sai-hū Se-bûn saⁿ-kap tòa.